تاه منا الحجي وضاع الكلام
وراحت طموحات ونسينا الأحلام
ضاع الراي ويا لفكر وجفت الأقلام
لوعوا جبدي المعارضه والحكومه
وكل كويتي يحس أن اليوم مو يومه
جذب وفساد والضحيه الكويت مظلومه
على طاولة نزاعهم من الراحه محرومه
وين أهل الدستور تعالوا لحقونا
كتبتوا كتاب بسبته ضيعتونا
تحسبون إنّا كفوا بنحترمه ونصونه
غسلوا إيدكم منّا بماي وصابونه
دستورنا والله رجال بيدهم خاطينه
وبفكر نظيف وبعقل وبتفاهم حاطينه
فيه مستقبل عيالهم وتقدم متأملينه
مادروا عيالهم بريولهم دايسينه
ياحكومه ويامعارضه ترا مصختوها
أحكام دستورنا ياحكومه إنتهكتوها
ويا معارضه أذيتوا الناس أزعجتوها
إثنينكم فرقتوا الناس ما وحّدتوها
كلنا واويين ولنا ألف توجه و راي
مستقبلنا ظلمه ما نشوف فيه سراي
نبي تقدم بالعمل والعلم والفكر والراي
تراالعيشه مو ترسة بطن وجقمة ماي
ياوزير وياعضو فارجنا تراك منت قدها
والناس بسبتكم من اليأس وصلت حدها
ناس تشكي وناس صافنه أيدها على خدها
وناس تلعن ناس وتتطنز على أبوها وجدها
T7l6m 
اي والله توهونا معاهم صرنا نستحي نفرح ولا نعيش طبيعي والأوضاع مو طبيعية
صح لسانك وعلى قولة هيدر المدونة: بنتحلطم لين يشبون السراي
ما خلونا لا نرتاح ولا نهيع بعيشتنا
ومع الأسف الظاهر سنستمر بحمل راية شعارنارغم أنفنا