T7l6m

لي شفت موتره فز قلبي
شلون ان شفت حسنه وجماله

ما تعود على هالأحاسيس قلبي
مسكين من شافها حالته حاله

من تقاطع دربه مع دربي
شفته ملاك وشفت حوله هاله

سلب مني الروح وأسر قلبي
صغير فتان رشيق كالغزاله

وصار محبوبي وحبيبي وحبي
وذابت الروح برقته ودلاله

سلمته روحي وتملك قلبي
وترخص له العين ملكه وحلاله

وصارت شوفته زادي وشربي
ويكفيني اني أكون على باله

عسى يجمعني معاه ربي
ويصير حلالي وأنا حلاله

حالتي حاله من شفت بنت الجيران
نهاري أفكر فيها وبالليل سهران

بنت اللذينه شيخه على الغزلان
من شافها أصبح بلا خمر سكران

مالها مثيل بين الإنجليز والعربان
وما تقارنها بالحريم ولا النسوان

إهي سمفونيه
وباجي الحريم طقطقه وهبان

إهي بورشه
وهم سوزوكي ,هوندا,أو نيسان

إهي شاورما
وهم بطاط وبيديان

أُهم أروى وأبراج
وهي عليهم إيفيان

وإن صاروا بقصم ودرابيل
إهي بلوريه من البحصلي بلبنان

حسنها ماينوصف بقصيده ولا بديوان

دودهتني من شفتها
أصبحت وأمسيت حيران

البوك بلا فلوس كقصيدة بلا وزن وبلا قافيه:
وهكذا كان,,,,,,,,,,

بالأمس…
بالأمس كان بوكي مليانُ
واليوم أمسى كراعي دكانٍ
يكش الذبانُ

بالأمس متفوخ كوجنة حلوةٍ
واليوم مافيه لايشتري قهوةٍ

بالأمس وارم متروس كاش
واليوم مصعوي ,ذابلٍ, فاش

بالأمس في الأنواط كثرة وتنوع
واليوم بات كبيت مهجور يخرع

بالأمس بات دافئا بلا مراجعات
واليوم كل معامله تقول له هات

شفطت مافيه من أنواط الداخليه
بالطوابع والرسوم أذتنا أذيه

قصوا علينا بمراكز للمواطن خدمة
مهنتها تشفط فلوسه وتنشف دمه

وسلامتكم,
وصح لساني

في بلدي

كروش إنتفخت ومؤخرات تضخمت
وجموع بالخير والنعمة رفلت
أناس خالقها حمدت
وأخرى بالنعمة جحدت

مولات بالناس إمتلأت
ومطاعم بالرواد إزدحمت
سينمات ومسارح بهم إكتظت

ونفوس من المتعة سأمت

عقول شاخت وتحجرت
وأرواح هامت وإنتفضت
لرأيها ثارت وتعصبت
ضاعت أهدافها وبها تعثّرت

بلدي وردة تفتحت
بإفراد شعبها إفتخرت
وبعطائها لهم أجزلت

حتى إنتفخت الكروش
والمؤخرات تضخمت

إزعاج في كل الأوقات
أفواه تنفخ ك “إقزوزات”*
ورجال إمتهنوا الأزمات
أضاعوا متعتنا واللذات

داخوا عيالنا والبنات
وإنقسموا أحزاب وتيارات
بسبب المتابعة والإنصات
وكلام تويتر والندوات

ياجماعة شبعنا خلافات
وملينا من نواب الكلمات
لاتنمية شفنا لا مشروعات
بس صيحه, خناق, وهوشات

ريلاكس ياسادة هّدوا ياسيدات **
وماننسى آنساتنا والمدموزيلات
تركوا السياسة,روحوا المولات
تعشوا بمطعم ,دشوا سينمات
خلوا يومكم سعادة و مسرات
وتركوا عنكم اللغوة والمشاحنات

ودعواي لكم,
أسبغ الله عليكم رحمته والبركات

*القزوز:عادم السيارة
**ريلاكس:relax

وإنسوا السياسة

ضاع الحق محد يدله
إتهامات بدون أدله
لايردهم دين لا مله
كلن عنده سيف يسله

سياستناخربانه فيهابلوه وعله
لافرد يصلح فيها لا رهط لا ثله
من لا تحركه مصالحه يحركه غله
ودّك كل سياسي من شواربه إتله

يارب من كاد للكويت َتْدمره وتشله
الوضع صار تبن ودك تغيره كله
ودك الوزير يصير للعضو خله
يلقمه نخي والعضو يقشر له باجله

أنا أقشر أنا قوي أنا خطير
بنفخه مني اللي جدامي يطير
أشرب ريدبول ما أحب العصير
أبيض مجسم شعري ناعم حرير
وفوق هذاحلو بالإعجاب جدير

ما أحب الكتب وما سمعت بجرير
وأصرف فلوسي ما أعرف التوفير
أسرع وأويل بالسياقه خبير *
ماأحترم شرطي لا مره ولا ريال كبير

ماداوم لي الضحى تسمع لي شخير
مايهمني المراقب ولا حتى المدير
وشفيها إذا غبت عن الدوام شيصير
لاني مسؤول عندي ختم ولاني سفير

ماكو مثلي مالي في الدنيا نظير
ماخاف من الموج والبحر الغزير
أسوق سيكل وبنشي وأركب حصان وبعير
وبالسباقات الأول أبد ما صرت الأخير

عجيبين الناس
كل هالمواصفات ويقولون عقلي صغير
ويقولون تراك بتموت وحداني فقير