Statuses

أنا وشكسبير

In أخلاقيات on 05/07/2011 by t7l6m

الكاتب المسرحي الإنجليزي “شكسبير”والذي يحلو للشيخ البعير القذافي تسميته ب”شيخ كبير” له مقولة مشهورة قيلت قبل حوالي 411 سنة في مسرحية”هاملت” ولا زالت ترددها الألسن وتلوكها الأفواه To be, or not to be .كان هذا سؤال حدث به نفسه الشخصية الشكسبيريه في المسرحية المسماة بإسم الأمير الدنماركي “هاملت”.
لو كان شكسبير كويتي يكتب مسرحياته في العقد الثاني من الألفية الثالثه لقال هاملت للربع أشياء كثيرة تعبر عن واقعنا ومنها:
*يوعان ولا مو يوعان,طيّح العشا.
*مريض ولا مو مريض,شوف لك واسطه في العلاج في الخارج:الناس صيف.
*موظف ولا طالب ,تكلم بالسياسه.
*تداوم ولا بإجازه,روح القهوه.
*غني ولا منتّف,إشتر سياره كشخه.
*تكرف ولا ماتشتغل,طالب بكادر.
*زين ولا خرطي,عيّنوه لأنه موصّين عليه.
*تحتاجه ولا ما تحتاجه,إشتر آي فون.
*دستوري ولا مو دستوري ,حوّل الإستجواب المحكمة الدستوريه.
*تييك الفاتوره ولا ماتييك,لاتدفع الماي والكهربا.
*مستعيل ولا مو مستعيل,إسرع وإطلع بتوينات.
*يمك زباله ولا مو يمك,قطّ وصاختك بالقاع يالقلق.
*تعبان ولا مو تعبان ,أخذ طبيه ولا تداوم.
*فيه مصلحة الكويت ولا مافيه,صوّت يا عضو مثل ماتقولك الحكومه.
*حارة أمان ولا مو أمان ,إمش عليها مايسوون شي الشرطه.
*فاسد ولا مو فاسد,إعلامنا بمكوناته يشتغلون حق مصالح الملاك واللي يدفع أكثر.
وأخيرا,
*كلامك منطقي ولا مو منطقي,خلهم يولون ولا تسمع كلام أحد إنت بس إللي صح.

Advertisements

12 تعليق to “أنا وشكسبير”

  1. تحلطم يا القلق طالعه من قلبك … صوتك وصل أخوي و عدى الحدود الإقليميه …

    وإن شاء الله اتعدل ..

    وراح نقضي على كل الظواهر السلبية …

    ما ادري ليش يت رولا على بالي اعوذ بالله من الشيطان الرجيم

    عساك على القوة

    • الله يقويج
      ضحكتيني.لي هالدرجه واضح موقفي من القلقين؟

      مافي شك بإذن الله إتعدل وتصير أحسن وتروح كل السلبيات
      لكن لازم نتعب شوي ونتحلطم وايد والناس تصحصح عدل

      و تعليقي الوحيد على الإستعاذة بالله من الشيطان الرجيم حينما تطري رولا على بالكم مقترنة بالظواهر السلبيه:
      أعوذ بالله من الشيطان الرجيم

  2. واقع مر نسال الله يفرجها
    استمر برد جبودنا

    تقبل مروري

    • حياج الله
      بإذن الله سيصبح الواقع المر حلو وجميل ولا شك بأن الله سيفرجها

      بتأييدكم وتشجيعكم وبجبودكم التي تبرد بسبب تحلطمنا سنستمر بإذن الله

      أسعدني مروركم ومشاركتكم ونتطلع إلى مزيد منها

  3. والله كلامك يعبر عن أحوالنا بالحرف الواحد
    قل لى : وش صار بالإجتماع حق اليوم ؟
    اشوفكم ما طولتوا .. لا يكون تأجل للصيف القادم هههههههه
    تحياتى لك

    • والله ياخوك أحوالنا تحتاج إلى مجلدات لتعبر عن تفاصيلها,والبوست جزء من ما أشاهده وتفاصيل أخرى كثيرة غائبة عني
      الإجتماع منهك بسبب جهل أهم المشاركين فيه ونتائجه التي ستتعبنا لفترة طويله,الله المستعان.

      حياك الله أخوي قوس .أسعد دائما برأيكم ومروركم

  4. لو شكسبير مسلم جان سأل الحكومه احنا برجب ولا بشعبان ياحضرات
    لان الشهر القادم رمضان شهر العبادات
    مو شهر اللويه والاجتماعات
    ما صدقنا نخلص من القرقه والاستجوابات
    وننطر الشهر الفضيل شهر الصلوات
    خلو الناس تنسى حوسة الدوامات
    وتتفرق بالليالي حق الزيارات
    وننسى المجلس والهوشات
    ونقضي نهارنا وليلنا بالتفكر بالآيات
    ونرتاح من كتابة المذكرات
    وخلو الخطه حق اجيال الاولاد والبنات
    لاحقين السنه طويلة وتكفي عمل مجلدات
    وما فرقت تاخرت الخطه سنه ولا سنوات
    كلها مدارس ومساجد وطرقات
    ما شفنا فيها مصانع ولا محطات
    وما اقول الا الله يعين الناس على الخطابات وعجاف الفضائيات والتصريحات
    والله المستعان

    @ حاولت اترك الكتابه ولكن ما قدرت على معزة البشوات

    • أي والله سبحانه المستعان
      خلها على الله
      الحمدلله ماتركت الكتابه
      وأمتعتنا بأحلى الكلمات
      المفروض تنحط فوق الرزنامات
      علشان نستمتع فيها بالدوامات
      ونتذكرها في الزمانات
      ونطلق ضحكات وآهات

      حياك الله يالمقهور ولا تتعزز علينا مره ثانيه

  5. مساء الخير

    احلئ مابالنقد اسلوبك الساخر

    وفعلا شر البليه مايضحك

    ان شاء الله رااااااااح ينصلح الحال بس يبيله جهد ووقت واهم شي الفكره والنيه خدمة الكويت

    تحياتي

    • مساء النور
      شقولك غير بإذن الله تنصلح أحوالنا بسرعة ويحس الجميع بضرورة إستخدام المخ والعقل والمنطق
      حياك الله أخوي تصور نورتنا

  6. اللي ما عنده اي فون ، خل يستريح

    • لازم آيفون
      يعني تيلفون ذكي ماركه ثانيه ماينفع
      حياك الله ياللي طولت غيبتك
      والله يخلي الآيفون خلاك تعلق
      كل النور من هالتعليق

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: