مركز النصر الرياضي سلسلة محلات تبيع ملابس رياضه وأدوات ومستلزمات رياضية.المحلات معروفة بسبب إنتشارها, خاصة في الجمعيات التعاونية,وأسعارها.لسنا بصدد عمل دعاية ترويجية للنصر فلن أحصل على أي شيء بالمقابل حتى فنيلة القادسيه أو صندل كروكس تقليد.لكن لابد من الإشادة بعمل المركز لخدمة المجتمع.
النصر الرياضي ليس شركة كبرى مثل إيكويت أو زين وبالتالي فإن مايقدمه من خدمة للمجتمع لن يتم ملاحظتها على لوحات الدعاية في الشوارع.لكن خدمتهم ستكون مباشرة للناس وفي أماكن تواجدهم وليست على نواصي الشوارع والخطوط السريعه.
النصر دشن حملة صحيه عنوانها “صحتك بالدنيا” في عدة مجمعات تجارية من 26/5 إنتهت أمس 18/6 .كانت الحمله للتوعية بكيفية الوقاية من أمراض كالسكر و القلب وضغط الدم والسمنة وهشاشة العظام.وشملت الحملة على قياس ضغط الدم والسكر بالإضافة إلى الوزن والطول.وتضمنت إستشارات تغذية بالتعاون مع أخصائيين ومشرفين تغذية بوزارة الصحه.
شخصيا تعجبني مبادرات القطاع الخاص التي تخدم المواطنين مباشرة .قد تحمل الحملة شعار الشركة وتروج لها بطريقة أو أخرى لكن فوائدها للمواطنين أكبر ,وهو مايثير إعجابي.
أشكر مركز النصر الرياضي دوره المباشر في خدمة المجتمع ,وأتمنى أن يفكر القطاع الخاص الكويتي بمبادرات ولو متواضعة لخدمة الناس بدلا من الإكتفاء بشفط جيوبهم.شركات كبرى لا تقوم بجهد ذو فائدة مباشرة مثلما قام به النصر,لذا فهو يستحق الإشادة وهم يستحقون التحلطم.
العنوان تم إقتراحه من زميل لعين وجاء كما ترونه في قمة الدقه.
T7l6m 
الشركات العالمية جزء اساسي من ارباحها يروح لخدمة المجتمع وينظر لها نظرة سلبية من المجتمع اذا ما خدمة مجتمعاتها
والكل يدري ان الشركات الكبيرة في الكويت تخصص رعايات لانشطة مجتمعية بس ما ادري الفلوس هذي وين تروح
شكرا تحلطم مواضيع مميزة ومهمة
مع الأسف يبرزون نفسهم أكثر من خدمة المجتمع ونلاحظ هذا في إعلاناتهم مثل حملة زين المروريه وحملة إيكويت “خلك طبيعي”عن ضغط الدم
يعني يكتفون بالإعلانات
أما النصر فنزلوا للجمهور مباشرة
الشكر لكم لمروركم والمشاركة
حياج الله
ممممممم معاك أكيد ومع سويت بس فعلا شي غريب يعني أحس الشركات الكبيرة في الكويت صعب جدا اتشارك بشي لآن خدماتها أو منتجاتها أسعارها مرتفعه جدا … بالنسبة لسوق العالمي .. يعني لو بنتكلم عن الإتصالات حول العالم الإتصالات قيمتها انخفضت و زين اسعارها في تزايد جنه الشعب يزعب من جليب .. و لو بنشوف اسعار السيايير نفس الشي بره أرخص من الكويت .. ولا في قانون يحكمهم …
عساك على القوة تحلطم حلوة لفتتك لنصر …
الشركات بالكويت تشارك لكن مشاركتهم مثل ويهم القصد منها رفع العتب ودعاية لهم لا أكثر
وما نشعر بفوائد المشاركات من بند موجود في ميزانيات الشركات الكبرى عنوانه”المسؤولية الإجتماعيه”
الأسعار طبعا على كيفهم القانون يحط السعار على صمون الفلافل والمشويات فقط والباجين لاعبين فينا طوبه وأولهم شركات الإتصالات والإنترنت والأدويه
الله يقويج
وضروري نشير لمن يخدم المجتمع ومن له دور إيجابي وبناء في مجال عمله.
حياج الله .
مساااك الله بالخير…
أدري طلع مع إسمي غبار … عادي من الجو مو مني
والله ولهت على مواضيعك الحلوه والهادفه
بس ضروف الشغل شويه
بقعد أقرا اللي طافني كله…
وبالنسبه للنصر شغله حلو بس الله يهداه لو يفكنا من هالتقليد
وفكرة الحمله بصراحه راقيه صج ناس تفكر بخدمة المجتمع
الله يوفقهم ويرزقهم كل من على نيته ( مهمه جدا النوايا )
يزاك الله خير
وماقصرت
مسّاج الله بالخير
وأقول آنا من وين يانا هالنسناس والبراد بعز الصيف
إحنا ولهنا على مواضيعج وكل شوي نطل على الليوان و”ذروا البيع” بمكانه وما في بوست فوقه.
وفقدنا تعليقاتكم ومشاركاتكم المفيده,الله يسامح الشغل وظروفه.وبإنتظار تعليقاتكم على الموضوعات القديمه اللي تعجبكم لأن رايكم مهم خاصة نقاط وخطوط
الله يهديج النصر بدون التقليد يعزّل
وفعلا وايد عجبتني فكرة الحمله وأماكنها يعني راحوا حق الناس بالمولات
ومافي شك أهم شي النيه
يزاج الله مثله من الخير
نورتينا وسعدنا بمروركم وعودتكم الحميدة إلى الميدان يالليوان
عنوان روعة من زميل اروع وشركات الفقر من توكلنا لحم فاسد وماء مسرطن وشركات الفقر من تأجر املاك الدوله ١٠٠ فلس للمتر ولاشفنا الا مص الجيوب وشركات الفقر من جابت للشعب الفقر
وبيني وبينك علشان تعرف حسن النيه والاجر قول بسم الله قبل كل وجبه لايحوشك تسمم
الحمد لله إن شالله ماننسى نسمي وجزاك الله خير على التذكير
صراحه أدق وصف لشركات الفقر عساهم الفقر
أما الزميل صاحب العنوان فمايمدح السوق إلا من ربح فيه
حياك الله هنا ياهنا الكويت ولاتباعد
ما اعتقد انك ما اخذت شي منهم على هالمدح
لو انا مسئول جان عطيتك على الاقل فنيلة العربي
المهم انا اقترح على الشركات اذا بتفحص الناس تتجه لاشياء جديده
مثلا شلون نصلح مخ مسئول مجيم
ولا شلون نعدل رنق مزاج مسئول عوي
ولا واحد من يشوفك جنه شام شي خايس
ولا داء العظمه الي تارس ممرات الوزارات من المسئولين
ولابشوات العصر الجديد الي ما يمشون الا وراهم كوكش حبربش
ولا المسئولين الي ما يدرون وين الله قالهم
ولا ولا ولا ولا ولا
هذي الامراض الي اقترح يعالجونها لانها من صنع البشر
ولا السكر والضغط والقلب صارت ماركه كويتيه
صراحه يالمقهور موتني من الضحك
كل سطر ،الله يقطع إبليسك،أخسّ من اللي قبله
أولا ياريتك مسؤول جان شفنا دعايه
ثانيا أشوه إنك مو مسؤول جان فحصناك نفس الفحوصات اللي تقترحها
وثالثا ما يصير تكتب جذي ترى قاعد تصك على بالتحلطم وعند حل من أثنين
أما تسوي لي دوره بالتحلطم الأصلي
أو تستلم مفاتيح المدونه بدالي
وختاما مع الأسف السكر والضغط والقلب صاروا ماركه كويتيه الله يكافي الجميع شرهم
حياك الله مقهورنا واييييد إستمتعت بمشاركتك اللي طالعه من قلب
الله يعطيك العافيه على المعلومه هاذي
وانا اقول حتى لو هدفهم دعايه صراحه ياحلو هالدعايه مو نفس اللي قمنا انشوفه بالتلفزيون الحين عالاقل دعايه تفيدك ..
موضوع جيد ومفيد
تحياتي
الله يعافيك
فعلا يحق لهم الإستفادة من جهودهم في خدمة المجتمع
والأهم أن تعم فائدة تلك الخدمة
شكرا للكلام المشجع
حياك الله دوم