Posts Tagged ‘قناة سكوب’

Statuses

بوصله خربانه

In أخلاقيات,عام on 19/10/2010 بواسطة t7l6m مصنف:

عند باب الدوانيه بالسروه أزعجني صديق عزيز بسالفه
وأنا بزعجكم فيها
سألني إذا تبي خبز وين تروح ؟ قلت له خباز قطعه 9
قالي فهمت قصدي بالضبط
:قصدك الخبز عند الخباز
رد :لا مو أي خباز، بالنسبه لك خباز قطعه 9

وبعدين
رد رفيجي بإسلوبه الساخر والمليئ بالأمثله والتشبيهات
تخيل واحد يبي تشباتي ويروح مكدونالدز
وإذا بيشرب قهوه يروح البنشرجي
وإذا طفح الماي في بيتهم إتصل على الكهربجي
وإذا يبي يحلق شعره يعرج على راعي الأوتي
وإذا عياله مو فالحين بالدراسه وداهم المستوصف
ويقضي عطلته الصيفيه بالبر ,تغيير
وإذا إخترب قاري ولده يصلحه عند الخياط

قلتله واضح ,الحبيب مضيع ,والإتجاهات عنده مخربطه
خضخض راسه مادري تأييد أو يقولي ماعندك سالفه وكمل كلامه
ترى إللي صار هاليومين هذي سِبّته
قلتله :شقصدك ؟موفاهم!
خزّني وجاوبني بسؤال:إذا حسيت إن وزاره ظلمتك شتسوي؟
قلت:أشتكي ,أتظلم ,أكلم المسؤلين ,أرفع قضيه
قال:كلامك منطقي,يعني ماتغلط على المسؤول بالوزاره ولا على أهله بالتلفزيون جدام كل الكويت ولا تعايره بأشياء صارت من عشرات السنين أو تعايره بمميزات يحصل عليها
قلت:إحتمال كبير أسبه بقلبي بس ما أغلط عليه أو على أهله جدام الناس .أهله شكو.أهو بالنهايه موظف يعني عبد مامور العله بوزارته إللي ظلمتني.
قال:إنزين إذا إنت المسؤول إللي غلطوا على أهلك شتسوي
قلت:مافيها روح تعال,أرفع قضيه وأشرشح المحطه إللي بثت الغلط بالمحاكم
قال:يعني ماتكسر لمبات بيتهم أو تنبشر سيارته أو تكسر جامتها أو تخرع الخدم في بيتهم
قلت :أكيد لا,شقالولك آنا فوضوي
قال:ماقول إلا الفوضى والتسيب خربت بوصلات الناس وضيعت إتجاهاتهم والناس نست شي إسمه القانون
وختمها الله يهديه بكلام مصري
آل ايه آل دولة قانون آل -وهدني وركب سيارته
تركني وأنا في حيرة ,مافهمت من كلامه ولا شي ! ومادري شقصده؟

ويلح على تساؤل لم أجد في كلامه إجابة له
تهقون إللي فيه قلب يروح دكتور أنف وأذن وحنجره؟

Statuses

ريحوا بالكم

In أخلاقيات,عام on 18/10/2010 بواسطة t7l6m مصنف:

ماني من متابعين سكوب ولا أواطنها
بس ياجماعه شالسالفه؟
شصاير عندنا؟
أولا وين كلامنا عن التنظير والطنطنه بالديمقراطيه وحرية الرأي وإحترام الرأي الآخر وباقي الجوقه
وشلون يشققون قنفات سكوب ويكسرون لمبات الأستوديو
وين الأمن و حماية الوطن والمواطنين
وشلون نقبل بالفوضى
وإذا قبلناها على من لانحب وسكتنا فسيصيبنا طشّار
وشلون سكوب إللي نصبت أقواس النصر ونشرت جحافل المغنين والفرق الموسيقيه المدججه بالطِيران(جمع طار) بعد ماراثون الإستجوابات الأربعه تحال للنيابه بتهمة التحريض على قلب نظام الحكم بالقوه

أسئله لا أبحث عن إجابات لها ولا أريد إجابات وإللي يرحم والديكم لاتجاوبوني
فمن دواعي سروري الشخصي الجهل بها كما أن عدم معرفة إجاباتها يجنبني أمراض الضغط وتصلب الشرايين
ويكفيني لراحة البال إيماني المتجدد بمقوله مروريه تزداد مصداقيتها ويتسع نطاق تطبيقها بدءا من الشوارع إلى العديد من المجالات المحليه
توقع غير المتوقع
وفي الختام أردد مقولة أحد المدرسين العرب “السياسه بنت كلب”
وأكرر تأكيدي” ماليش دعوه بالسياسه”