T7l6m

يقولون المتفائل ينظر إلى النص المليء من القلاص
وإللي ماعنده سالفه ينظر إلى النص الفارغ
أنا أقول والله فارغين
ييبو لي كويتي ما يتحلطم وأنا آخذ قرض توريق و أعطيه مكافأه له
الحمدلله أمور وايد زينه عندنا وأحوالنا الماديه طيبه
لكن “الحلو مايكملش”

شوارعنا حلوه ومنظمه ,عندنا إشارات وكاميرات والرصيف ملون ,وشرطه ودوريات أكشخ من أمريكا
لكن قائد المركبه تقول قائد الأمه ماله شغل بالقوانين,والشرطه في أمان الله والنتيجه “حارة كل من إيدو إلو”

مدارسنا نظيفه وفيها كمبيوترات ,وألوانها حلوه والصبغ متعوب عليه, والسور لا يحجب البيئه المحيطه (بنين) أو يحميها من البيئه العدوانيه(بنات) ,والكتب متروسه صور ولا ناشيونال جيوغرافيك, والأدراج جديده
لكن المدرسين لك عليهم والمناهج دايخه والإداره ماتدري وين الله حاطها

مستشفياتنا ومستوصفاتنا عندهم عيادات متخصصه وأجهزه حديثه والمخازن متروسه أدويه
وأطباء وممرضات من كل العالم
لكن مواعيد تطول أشهر ,وأخطاء طبيه,و دكاتره متكبرين على المرضى ,ومرضى يطقون دكاتره

عندنا وزارات إختصاصاتها واضحه, يشتغلون فيها خريجين ,ومسؤولينهم الكبار ياخذون سيارات وتيلفونات ومكافآت,
والوزارات متروسه كمبوترات وفاكسات لزوم سرعة العمل
لكن المراجع ياكل تبن من :معامله الموظفين (كنه ياي يطر منهم) والتأخير, والروتين ,وكثرة التوقيعات ,وضياع المسؤوليه,ومرات بسبب غباء وجهل الموظف بالإجراءات أو بصلاحياته

عندنا أسواق حلوه ومولات فظيعه
لكن متروسه مشاكل ,وهوشات, ومغازل ,ويهالو ماتدري شنو لابسين لا وبعضهم يشيلون أسلحه بيضاء سود الله ويّوهُم و إللي ربّوهم فوقهم

عندنا نفط وميزانيه بالمليارات وبنك مركزي وقوانين ورقابه على الشركات ,ومراجعين حسابات
لكن الجمبزه الإقتصاديه هي سيدة الموقف , البورصه دايخه ,والتنميه يتخانقون من يمولها ,و الشباب يدور وظايف ,والشركات معفنه بإعتراف الوزير إللي يرخصهم ويراقبهم

وأشياء وايد لا يسع وقتكم لها ,لكن راح ألوع كبودكم فيها لاحقا
ف إللي مايشوف النص الفاضي من قلاصنا الكويتي أقول له:
عفوا ,وعذرا,وإسمح لي, وسوري

إنت حول

يسولف واحد من الربع عن منظر يضحك شافه ومتحسف ماصوره
يقول على الدائري الرابع بعد جسر الغزالي بسطرة اليوسفي شفت إعلان
“ممنوع عرض السيارات للبيع” وبعد الإعلان طابور من السيايير المعروضه للبيع

قلت :هذيل يمكن فيهم كويتيين متمردين لكن إرجع من دوار شهرزاد (بإتجاه الخالديه)
قبل أول إشاره تلقى لوحه شكبرها “ممنوع وقوف الشاحنات” ودار مدارها شاحنات
المنظر يشكك و يخليك تقرأ الإعلان مره ثانيه قلت يمكن مكتوب “موقف للشاحنات” وأنا ماقريته عدل

إللي يضيق الخلق بالموضوع أن الشرهه مو على أهل السيارات والشاحنات
الشرهه على راعي الإعلان :تحذير, وممنوع, وبالك بالك إحنا جهه رسميه نقدر نخالف
وتخلون الناس تعفط عليكم ! شلون ترضون ؟
المفروض الجهه إللي حطت الإعلان مراقبينها مايغفلون لحظه ويطبقون القانون فورا

وأذكر في الزمانات أن البلديه وبعد أن لاحظت أن (البان) مال الهنود
أصبح جزء من ديكور أرضيات سوق الديره وجدرانه (الطوف صارت جلد نمر)
فرضت غرامه 5 دنانير على إللي (يبصق بان ) وبعد فتره بسيطه إنقطعت هالعاده
ليش؟ لأن المفتشين كانوا يحوسون بين الهنود ويخالفونهم

طبعا في ناس تقول:هديت الوزرا ,والنواب ,والتجار ,والبوقات ,وكسر القانون الفلاني والعلاني
وياي تطبق القانون على هالفقاره المساكين
أقول: إذا المفتش الصغير وشرطي المرور لاحقوا الناس و طبقوا قوانينهم ,وإذا الفقير المسكين إحترم القانون
راح يكون هناك وعي بأهمية الإلتزام بالقوانين وراح نبني “ثقافة” إحترام القوانين عند الناس
و إذا إحنا إحترمنا القوانين إللي فوقنا راح يحترمها غصبن عليه أما بسبة الحيا وإذا مايستحي بيخاف
وإذا مابلشنا بنفسنا , خوفي القانون عندنا يصير كمنجه وللدبمكجيه إيقاع

بلوج بوفلان فتح القريحه وذكرني بالفيلم

في فيلم إسمه “crazy people” يعني الميانين
وهو من بطولة الشمحوطه(حينذاك1990)داريل هانا والقصاصه ددلي مور
قصته بإختصار أن البطل مصمم دعايات في شركة إعلانات
وتحوشه لوثه عقليه(أزمة منتصف العمر) ويقرر أنه لازم يكون صريح بالإعلانات ويطلع إعلانات من طقة(إذا تبي تغازل إشتر جاغوار)،بتصرف
تخيلوا إعلانات الوزارات و الشركات إذا صممها شلون تصير

بعد الديباجه،عزيزي وعزيزتي

إذا أردت ممارسة هوايه لاتتطلب حركه طوف الحمره
من أجل أسرتك:لا تقود المركبه قبل كتابة وصيتك
وإنت منتبه ماتضمن ثوالة الأخرين،لا تستخدم الهاتف أثناء القياده

لا تستعجل بالمعامله تأخيرك يزيد إيراداتنا/البطاقه المدنيه

شبوا الكهربا على كيفكم بس إذا طفت لاتبكون/ترشيد
لا تسرف بالمياه:الإنتاج حده حده والشبكه مشخال والله يستر

أخطائنا الطبيه ماتقدر تثبتها شوفلك واسطه و تعالج بالخارج
المعاهد والمدرسين الخصوصيين ما إنتشروا لو المدارس فيها خير/ التربيه
إشتر لهم من المقصف على حسابك/مناهضة العنف المدرسي
تبي خط مباشر تحمل شوية بهدله/ الكويتيه
مسببين لك رعب ؟لا تخاف!:الأمان والإطمئنان/بيت التمويل
نسلفك كثر ماتبي وندفعك غصبن عليك:بنك تعرفه والثقه مالها سالفه
ماعندك فلوس تسلف بس لاتقعد بالكويت/شركات السفريات

مفتشينا صاحين وحتى لو تطلع بواسطه بنفضحك :لاتهرب/الجمارك
ماعندنا غير أخبار التسع والوفيات،شوف غيرنا/تلفزيون الكويت

وأخيرا،أنت وصحتك بالطقاق بس لا تزعجنا بزقارتك

لقد عاهدت نفسي عند إنشاء مدونتي
أن تقتصر على الموضوعات والقضايا العامه
و أن لا أزج فيها موضوعات شخصيه

ولكن ومع الأسف الشديد و خلال أقل من شهر من تدشين T7L6M
خنت العهد ولحست كلمتي
ولأسباب قاهره ولا تلوموني أو تشرهون ليما تسمعون السالفه

أمس الساعه 10 الليل على شارع دمشق وانا ماشي الهوينا(80 ك/س)
ماسك يمين بين الروضه والعديليه وشغلي قانوني وأخر حلاوه (بالصلاه عالنبي)

أطالع المنظره واللا هالثور الأسود إللي مبقق عيونه وياي ركض وبتوينات بين السيايير
(وانيت شفر شاب العالي ويحذف يمين وشمال)
أنا تبريدت خففت و لزقت بالرصيف واللا الأخ بحذفته يمين حاشني إللا شعره
خرعني صراحه ,وحرني, و رفع ضغطي
وأنا على وشك التعبير لفظيا عن مشاعري تذكرت أن ولدي وزوجتي معاي
وتذكرت مسبة مشرف العيال بدورتهم الصيفيه
كان أصرخ ياخوووووخه(وزدت من عندي) يا إبن الررررقييييييييه

وفي الختام أقول للحبيب راعي الوانيت ومن هم على شاكلته
يا أخي تبي تنتحر كيفك
تبي تتكسر وتتحرول الله وياك
تبي تدخل بغيبوبه حتى إشعار أخر حقك ووقت فراغك وإنت حر فيه
لكن يا@#$% يا إبن ال @#$%@#$#%
لااااا تذبححححححححح الناسسسس يا بجم
واسف على الألفاظ, وإن شاء الله ما أعيدها

لا تخاف ولا تروح بعيد بتفكيرك
الموضوع ماله علاقه بالسجن ألله يكافينا وياكم شره

شلون (يحبسوك) و ماله علاقه بالسجن؟ أوضح لكم

الأمريكان حريفة الكمبيوتر واللي يسمونهم geeks
عندهم رمز يستعملونه بينهم إذا يبون يقولون ان الشخص اللي
يشرحون له شغله بالكمبيوتر جحش مايسمع الكلام ولا يفهم ومجننهم

الرمز هو PEBKAC
Problem Exists Between Keyboard And Chair
بالعربي (تقع المشكله بين لوحة المفاتيح والكرسي)
الرمز عجبني وهو ,على فكره,بالصيغه المخففه يعني (خطأ بشري)

أنا ,و كما هو واضح من شكل المدونه, ماني خبير كمبيوتر
لكن طبقت الرمز و أسقطته علي ناس ماعندهم لا فن ولا ذوق ولا أخلاق
ويقودون سيارات,تخيل شنو يسوون
يحدونك,يلفون فجأه,يطوفون الحمره…..إلخ

إذا شفت واحد من هالنمونه تذكر
ي ح ب س و ك
يقع الحمار بين السكان و الكشن
فتمنياتي للجميع بقياده اّمنه وشوارع خاليه من (يحبسوك)