T7l6m

الكل سمع بالصيحة/الشيلة”إما نكون إللي نبي ولا عسانا مانكون”.
شخصيا مستعد أراهن كل من يردد هذه العبارة إذا فعلا يعرف ماذا يريد .إسأل أي شخص منهم “شنو تبي؟” وستسبب له ربكة ,وحيرة, وربما تمزق فكري وإعياء عقلي.الكويتي ,ولكي لا يتم إتهامنا بالتعميم والمبالغة,على الأغلب لايدري ماذا يريد فطلباته متعددة ومتعارضة .منها ماهو مادي ومنها غير ذلك وقد تجتمع تلك الطلبات/الرغبات ونقيضها في شخص واحد.شلون؟:

*الكويتي يبي يحافظ على المال العام ويبي إسقاط القروض .
*الكويتي يبي يحارب الفساد ويدور واسطه!
*الكويتي يبي يضعف وياكل كنافه (ويشرب فوقها دايت كولا).
*الكويتي يبي وظيفه ومعاش وما يبي يداوم.
*الكويتي يبي إمتياز وما يبي يدرس.
*الكويتي يبي حكومة منتخبة ويبي ينتخب ولد عمه وولد قبيلته وولد طائفته!(يعني مايعرف ينتخب)
*الكويتي ما يبي زحمه ويبي يطوف الحمره ويمشي بحارة الأمان.
*الكويتي يبي ماي وكهربا وما يبي يدفع الفاتوره.
*الكويتي يبي عداله(وإسمحوا لي بالمصطلح) ويبي يضرط على الأجنبي.
*الكويتي يبي كادر وما يبي يشتغل.
*الكويتي يبي يسب الناس ويغلط عليهم وما يبي أحد يحاسبه(حرية تعبير ومحاكمة النوايا).
*الكويتي يبي يروح العمره وما يبي ياخذ إجازه(شفيها الطبيه؟).
*الكويتي يبي حرية التعبير وما يبي أحد ينتقده(على طول يشتكي).
*الكويتي يبي الكويت نظيفه وما يبي يوسخ طفاية سيارته (شفيه الشارع).
*الكويتي يبي يحمي الدستور ويبي أشياء تنتهك عرض الدستور(حكومة منتخبة,رئيس وزراء شعبي …إلخ).
*الكويتي يبي زوجه ما تطلع وما يبي يرجع من الدوانية قبل أذان الفجر.

وختاما ,وببعض التحرش بالنصف الآخر:
*الكويتية تبي تتنقب وتبي تحط مكياج.
*الكويتية تبي تتحجب وتبي تطلع قذلتها أو تحط قوطي روب.