Statuses

من ودّك تزحلق

In أخلاقيات, المرور on 22/10/2011 by t7l6m مصنف: , ,

قال لي صديق عن الموضوع الوحيد إللي عجبه بجرايد الخميس وكان حول تطوير العلماء الأميركيون أكثر مادة انزلاقاً في العالم .المادة المطورة حديثا تتمتع بخاصية فريدة من نوعها. فالاحتكاك بين المادة وما يحصل على سطحها طفيف، لدرجة أنه لا يمكن عمليا لأي شيء أن يبقى عليها، حتى لو كان ماء، مسحوقاً أو نملة حيّة. فكل شيء ينزلق منها على الفور.
حصلت المادة على اسم «سليبز»، وهي اختصار للكلمات الإنكليزية التالية: Slippery Liquid-Infused Porous Surfaces. ويتوقع أن تُستخدم في الأسطح الداخلية للأنابيب الناقلة عمليا من دون احتكاك وأن تصبح أساسا لتطوير مواد جديدة تدخل في تصنيع زجاج يتمتع بخصائص للتنظيف والتصليح التلقائي، ومواد الدهان، وسطوح المواد المضادة للبكتيريا والأجهزة البصرية المتطورة.
طبعا الإستخدامات من تفكير العلماء لكن تخيلوا عندكم هالماده منو تزحلقون.شخصيا لو يعطوني شوي منها لوجدت لها إستخدامات كثيره:
1-إستخدمها لعربانة الجمعيه.حظي مو شي وياها دايما ثقيله أو تاخذ يمين أو شمال طبعا بمزاجها وتخيلوا معاناتي.
2-أقطها على السياره إللي تمشي جدامي بطيئه و يسولف راعيها مع السياره إللي يمه.
3-أحطها تحت تواير السياره إللي تسكر على سيارتي وأدزها لي نص الشارع وأخليها.
4-أعطي شويه حق السوريين وشويه حق اليمنيين لزوم بشار وصالح.
5-أمسح صالة البيت فيها وأحولها سكاتينج حق اليهال.
6-أحط شويه شكر وأحاوطه بالماده علشان أشوف النمل شلون يتزحلق.
7-أمسح فيها نظارتي وشاشة اللابتوب علشان ما يتوصخون.
8-أحطها بمجلس الوزراء وبمجلس الأمه لأنهم باطين جبدي.
9-أقطها ,مع دعاء,على كل المخربين من إعلام فاسد ,وشخصيات تحرّض وتضرب الناس بالناس,وتجار الأكل الفاسد,والحراميه ,والمرتشين والراشين ودعاء يارب تكسر رقابهم كلهم.
10- طبعا يمكن للناس إستخدامها وفقا للحاجه مثلا ,موظف يزحلق مسؤول,زوج يزحلق زوجته إذا طلبته شي غالي أوالزوجه تزحلقه إذا ما سفرها بالصيف,بنت تزحلق مغازلجي مزعج

Advertisements

8 تعليقات to “من ودّك تزحلق”

  1. اختراع عجيب الصراحة ،بس دير بالك تحلطم تري الديره كلها بتشوفها اتزحلق 😉

    • فعلا إختراع عجيب وإستخداماته مفيده
      لكن عندنا مثل ما قلتي الكل بيتزحلق

      حياج الله أختي
      شكرا لمروركم

  2. أتوقع تحلطم فهمك خاطئ للموضوع شنو هالماده إلي بتزحلق الكل و الجميع .. و أهم شي شاشة اللاب توب و نظارتك علشان ما يتووصخون

    و طبعا غير النمل إلي اكسروا خاطري بتخليهم يتزحلقون … و أحلى أمنيه قريتها لك إنك بتمسح فيها الصاله علشان تصير سكيتانج لليهال …

    الله يحفظهم و يخليهم لك و يخليك لهم و تحقق أمانهم كلها 🙂

    عساك على القوة … وما أدري ليش كنت راح أكتب كل عام وإنت بخير D:

    • الله يقويج
      الموضوع فهمته مثل ماهو مكتوب ماده تزحلق كل شي
      غير النمل بغيت أسوى مقلب باللي يبون يسوون تراي (حق الإجازه)واحط شوي من الماده علشان يدعمون وما ياخذون إجازات
      الله يسلمج يالجودي على الدعاء للعيال,آمين وعسى الله يتقبل
      وإنتي إن شالله بخير وعافيه
      الظاهر الوطنيه عممت المسج إللي تهنيني فيه بعيد ميلادي

  3. والله خوش اختراع انا محتاج منه كمية كبيرودي ازحلق الدول العربية بشعوبها وايب ناس قصدي استوردناس من برة تعرف تشتغل عدل وتفهم معنى التنمية والاصلاح وكيف اسس وتضع مستقبل حق اعيالنا قبل لايتزحلقون مع غيرهم

    • تصدق عاد لو تزحلق الشعوب العربية
      الحكام راح يستوردون مواطنين من أفريقيا وقرى الهند والفلبين
      فرصه لهم إييبون ناس ما تفتهم ولا تطالب

      وعورتني كلمتك قبل لا يتزحلقون عيالنا
      الله الحافظ وسبحانه المستعان
      حياك الله بوعيسى وبإنتظار تعليقك على بوستنا القادم
      عن جامعه الكويت

  4. و الله هالمادة ممتازه . متى أينزلونها للسوق ؟
    اعجبنى الإستخدام رقم ( 10 )
    انا احب أستخدمها للضيوف ثقيلى الدم .. و بالاخص لما الحريم ما يحلى لهم الكلام اللا على الباب وهم يودعون . يفتحون قصص جديدة وانا ابغى أزحلقهم على سيارات أزواجهم و أنسكر بابنا ..

    احجز لى 10 كحم

    تحياتى لك

    • أنا حصلت وكالتها بالكويت والخليج العربي والشرقين الأقصى والأدنى
      وقررت يكون البيع بالجرام
      راح أخليها مثل الذهب
      وسيتم توزيعها مجانيا للحالات الإنسانية مثل حالتكم
      حياك الله أخوي قوس نورتنا وزحلقتنا من السرور

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: