T7l6m

قلت له :يوم جديد مليء بالتفاؤل بالخير والبركه والسعادة.

قال:
ليش شصار بالبلد,وقفت الإضرابات؟ لأ .
إستعدلوا النواب؟قاموا يفكرون بمصلحة البلد؟ لأ .
سجنوا النواب القبيضه ؟ لأ .
عيل صادوا الراشي؟ لأ .
أكيد الحكومه صحت؟هم لأ, لي الحين الحكومه نايمه بالعسل,والهرده.
يمكن المرور إنضبط وقلت الحوادث؟ لا لي الحين شوارعنا ساحات حربيه.
زين,تحسن التعليم وصارت مستشفياتنا دوليه؟ لأ (مصحوبة بضحكة ) .
لا تقول الجرايد قاموا يخافون من الله والتلفزيونات وقفت عن الإثاره؟ أكيد لأ ,صج إنت مسكين.رزقهم من بيع الجذب والتشويش على مخ الناس.
موظفينا قاموا يشتغلون عدل ؟ لأ
عيل زادوا المعاشات أو قرض الإسكان أو قاموا يوزعون قسايم 1000 متر؟ طبعا لأ (بإبتسامة واسعة).
تأهلنا حق كاس العالم,أو خذينا دورة الخليج,أو كاس العرب,أو بطّلوا منتخباتنا يتهاوشون مع الناس ؟لأ ,لأ, لأ,والأخيره أكيد لأ لأن منتخب السله طق البوسنيين بعقر دارهم قبل أسبوع وفشلونا.
شوف هذا آخر شي عندي:صلحوا بالوعة مشرف ؟ لأ.

قال بسخرية :عيل ليش صباح التفاؤل والكلام الحلو المصفف؟
قلت:لأني صحيت من الحلم وعشت بالواقع.لأني تأكدت إن الحكومه ماعليها متكّل والمجلس ما عليه متكّل وإثنينهم ماعليهم شرهه.وأن وايد كويتيين يشتغلون ضد مصلحة بلدهم وهم مايدرون,وفي ناس تخرب البلد بغباءها و تنشر الفوضى فيها.وأن صاحب القرار نايم والمواطن ضايع.
قال :كل هالكلام عندك ومتفائل؟
قلت :ليش ما أتفائل وأكو رب كريم.آنا يأست من البشر وسلمت أمري لله.وياريت كلنا ندعي ربنا يحفظ لنا بلدنا ويديم علينا نعمته.لأن أهل القرار ضايعين وبيضيعونا معاهم.