كنت دايما أقول حكومتنا عومه
كنت أفتكر إنها ماكوله ومذمومه
والحين أجزم إنها قبّسه و بومه
على كثر الخير عندنا راوتنا البلاوي
إنتشر فيها الفساد وزادت الرشاوي
وضاعت بين ليبرالي وشعبي ويمناوي*
ما تقدر تفرّق بين الجبده والجلاوي
بزمنها طاح العِلم والرياضه والغناوي
ياحكومه إصحي الشعب بمصيبه
يشكي من مروره وتعليمه وطبيبه
والفساد وصل أكله لوّث لحمه وحليبه
وإنتي تضّحكين بتاخذين منه ضريبه
ياحكومه جابلي الشعب وكفايه التجار
من تحبونه ثروته تحسبها بالمليار
ومن تودونه عينتوه للصفقات سمسار
نسيتو الناس ورزيتوا الجمبازي العيار
ياحكومه ترى الشعب يحب الكويت
إهيا عزنا وفخرنا ومالنا غيرها بيت
كل شي فيها بالنازل وتقولين مادريت
ماتدرين الرباده والفساد نار وجبريت
هذا إللي عندي وأدري ما وفّيت
من يسمعك لي قلت وتحجيت
كفايييييييييييييييييييييييييييييه ترى من الصبر مليت
*يمناوي:يميني,محافظ.
T7l6m 
حلوة “..ورزيتوا الجمبازي العيار “..
تدري أخوي شنو مشكلة حكومتنا ؟
إنها قاعدت اتقامر على صبرنا و قوة تحملنا ..
و الله المستعان
والله يالجودي ما أدري شنو علة هالحكومه
وإذا كانت تقامر على صبرنا يعني ما عندها مخ ولا فكر
فهذي مغامره فاشلة تدهور البلد
الله المستعان وسامحونا على التحلطم الجايد
هو الحكومه بس اهيا اللى غلطانه ؟
صحيح الحكومه تتحمل القدر الأكبر من كل شي بالديره .
ولكن بدال لا نقعد نشتكي ونلوم لازم نحركها احنا بدون حتى الاستعانه بالنواب ,
اذا هي مافكرت لازم احنا نفكر , اذا هي ما تعلمت من اخطاءها السابقه لازم احنا نعلمها
ان سالفة الديموقراطيه مو منصه يطلع عليها وزير و بعدين يستقيل
احترامي لك
اخوك منصورالفرج
هلا وغلا أخوي منصور وحياك الله
ياريت نعرف وسيله نعلم فيها الحكومه غير الصيحه بالجرايد والندوات والمدونات
أعتقد الحكومه تعاني من صمم جزئي و ماتسمع إلا الكلام إللي يعجبها
كنت أقول أن الحكومه تتحمل الجزء الأكبر والآن أقول تتحمل كل شيء
فتطبيق القوانين وتحقيق العدالة والمساواة و الأمن إختصاصها وليس لنا يد
مكافأة المستحق ومعاقبة المسيء شغلها وما نقدر نسوي شي
ضمان جودة الخدمات من تعليم وصحه وغيرها مجال عملها مو مجالنا
متابعة وسائل الإعلام المحلية وضمان حياديتها و إلتزامها بالمعايير المهنية مسؤولية الحكومه مو المواطن
أخوي منصور الحكومه مثل قائد للشعب وإسمحلي بالكلمه و شاوي للي ما يفتهم من المواطنين يعني بإيدها العصا والجزره
وتتحمل المسؤوليه لأن بإيدها كل الإمكانيات
إحترامي الشديد لك وشكرا للمشاركه
ونورتنا