قبل مده دزولي إيميل بنفس العنوان لكن بدال الكويت كاتبين مصر .كانت مجموعة صور عن أشياء غريبه ولوحات فيها ترجمات حرفيه بالإنجليزي لكلمات عربيه وضيعت المعنى.قبل شوي شفت مشهد مايصير إلا بالكويت.المشهد عبارة عن سياره واقفه ثاني حاره والحاره اليمين فاضيه يعني الأخ يقدر يسفط يم الرصيف.الأدهي والأمّر أن واحد بطه لابس درنجسوت (ترايينج سوت)ومبوبز( يمكن معناتها جالس القرفصاء)ويتكلم مع سايق السياره,يعني ماكل شويه من الحارة اليسار.الأخ البطه في جلسته تداخلت ساقاه ومؤخرته وبقية جسمه ليصبح كتلة من اللحم ,أو بالأحرى(ولمزيد من الدقة أضف نقطة على الحاء) كرة من اللحم.الأخ ماخاف إنه سياره تمر بالقرب منه وتلامس جسمه إللي يهبل ويفتخ وتطشره ليصبح “صدور دجاج مع جلد وعظم” مع الإعتذار لساديا.
يا أخي ,خوى ينبك,تبي تموت أو تبي تنتحر أو تبي تصير معوق كيفك بس شنو ذنبه راعي السياره إللي يحقق ,بدون قصد,رغباتك المريضه.
طبعا أخوكم من قرادته مر ناحية هالبطه وماعجبه الوضع,وكان من الضروري والملّح أن أعبر عن رأيي فنحن في بلد ديمقراطي ولكل مواطن الحق بالتعبير عن رأيه حتى وإن كان خارج قاعة عبدالله السالم.جربت ناحية الكورفيت إللي قاعد يمها البطه فدقيت هرن (لتخريعه والحمدلله نجحت)مقرونا بحركة إمتعاض من يدي(والله مو حركه وصخه)الأخ قعد يشوّح بإيده موعاجبه.صراحه ضحكت على قواة عينه وقلت مايصير هالموقف إلا في بلدنا الحبيب .وكان سبب ضحكي عنوان البوست.
T7l6m 
لا وأنت الصادق موجود هالمنتج كثير بالسعودية بس تشوف كأنه شنطة بلاستيك بيضا و راسها أسود يعنى شعره الطويل ..بس لا سويت مثلك ما يترك صاحبنا السالفه تمر لوجه الله اللا يقوم و يظل يطاردنى طول الليل وتصير فيلم أكشن أمريكى ههه ..
فى ناس ياصل معهم الإستهتار الى درجة لا تتخيلها وبالخصوص لو جابك حظك الردى بشارع عام وقت إنتهاء المباراة .تشوف العجب العجاب والغريبه إن الشرطه تتركهم و يروح النظام فى غيبوبه ..يقول خلهم يفرحوا هالبزارين ,, ويمكن الشرطة يسوون أكثر منهم لأن عندنا الشرطه يفحطون كل ما جات الفرصة لهم .. أيييييه وش أقولك .. ..خلنا بنس نروح رحلة السفارى ووسع صدرك ..
تحياتى وودى لك
هلا أخوي قوس
طلع المنتج موجود عندكم؟الله يعينا ويعينكم على هالبلاوي
وإحنا مثلكم في بعض المناسبات كالأفراح وبعد الفوز بالمباريات
وإحتفالات العيد الوطني والتحرير
والله صادق خلنا على السافاري
حياك الله
و الله ما ادري شقول، الموضوع مار علي من قبل شيء يلوه الجيد، بس تعليق قوس قزح ضحكني، يا عالم في شعوب مصيبتها ترفها !
تحيا الكويت و تحيا دول الخليج، السعودية و قطر و البحرين و الامارات و عمان!
و الباقي كيفهم !!!!!!!!!!!
أكيد يمر عليك موقف مثل هذا في هذه الأرض الطيبه المبتلاة ببعض الميانين
والموضوع مروري بس أشم شوية سياسه بالتعليق
حياك الله نورتنا