T7l6m

الفوضى مثل ما كلّنا عارفين متغلغلة وضاربة أطنابها(متعوب عليها) عندنا,لذا سأتناول نموذج واحد وعليكم التعميم .اليوم بالمقبره ,الله يرحم موتانا وموتى المسلمين أجمعين ويصبر أهلهم,لاحظت كثرة العسكريين من السلكين.لن أنتقد سلوك أفراد الجيش ,مو علشان فيصل منهم,فأنا أحيي فيهم سلوكهم العدواني والمرتبط مباشرة بطبيعة عملهم وأحثهم على الإستمرار فيه.
البلوه بالشرطه,ماتشوف ظابط شرطه ونجومهم وتيجانهم ترس جتوفهم ولّا مطوفين الناس ولاعبين لعب بالطابور.إذا كانوا الشرطه بهالمستوى العالي من الفوضى شلون تبون المرور يصير مضبوط ولا المجتمع يصير منضبط.

الضياع تخصص حكومي نادر وجرايد اليوم عطتنا نموذج من هذا الضياع.وزيرة التجارة الأخت أماني بورسلي إجتمعت أمس مع إدارة الرقابة في وزارة التجارة.طبعا بعد الكلام ,الماخوذ خيره ,من حث الموظفين والمسؤولين في الإدارة على القيام بمهامهم والثناء عليهم,وأكيد لازم يطلعون المواطن خرطي وماعنده لامخ ولا سالفه نصحوه بالتقدم بشكاوي ضد المتلاعبين بالأسعار والمخالفين للقوانين بالإضافة إلى أهمية توعية المواطن ال أغغغوووو.
الأخت أماني وطاقمها الرقابي الظاهر يشوفون بعين وحده أو لابسين نظارة الرقابه على المطاعم والقصاصيب ودكاكين الفقاره وناسين الهوامير.الناس عيزت وهي تصيح من سالفة الإنترنت وما سمعنا ولا كلمه من أماني ولا من ربعها.يعني الشركات زادت الأسعار بشكل غير مبرر وخالفت أحكام العقود بينها وبين المشتركين وهالتصرفات مجرمة قانونا وتستدعي تدخل وزارة التجارة من خلال إدارتين :حماية المستهلك,وإدارة الرقابه.
بس التجاره خاموووووووش .يمكن مايقدرون إلا على الفقاره.

نروح حق الفشل,
وكيلة التربيه صرحت إن الوزارة إستقدمت 36 مدرسة رياضه يعني أبلة ألعاب من تونس.ماراح أعلق بس بذمتكم ماكو كويتيه تقبل بهالوظيفه وما في مجال تأهل الوزارة بنات كويتيات حق هالوظيفه المعقدة أكثر من المفاعلات النوويه.

وفي إطار الفشل الحكومي سمعت اليوم نكته,
واحد من الربع راح يستلم شيك البناء من بنك التسليف.الإجراء يطلع واحد من البنك ويكشف على مرحلة البناء لإعطاء القرار بصرف دفعة من القرض من عدمه.مسكين صاحبنا عطوه موعد بعد شهرين,الحبيب تحلطم وتقرطم وقال لهم عندي عمال ومقاولين ناطرين دفعاتهم.ردوا عليه ماعندنا مهندسين زائد دخلنا المعاقين فزاد الضغط علينا.
عجيب أمر الحكومه الموظفين ترس وزارات ماعندهم أي شغل والتسليف محتاج موظفين.طبعا عذر التسليف إنه يبي مهندسين مع أن المهمة لا تتطلب أكثر من معرفة الموظف بمراحل البناء يعني تدريب مايطوّل أكثر من أسبوع.
شلون تبونا ننضبط, أو نراوي التجار المستغلين العين الحمرا وشلون تبونا نحل مشكلة الإسكان والبطاله إذا هذا شغل مسؤولينا و وزاراتنا.
ما أقول إلا ياعيبااااه