مواطن كويتي يسولف.قال ماعندي ملايين لكني بخير ونعمه الله يديمها.وأتعجب من اللي يشكي وهو بالكويت ديرة الخير ,شنو يقول لو أهو بديره ثانيه.عجيبين الناس:
ماعندي زود كاش ما عندي عقارات
وماني من أهل الأسهم والسندات
لاقسيمه بشويخ أملك لا شاليهات
وماعندي ياخور ولا إستراحات
ما أعرف أنصب أو أتاجر بالإقامات
ولا شلون أفتح بقاله وأسس شركات
حتى معاشي حاف بدون كادر أو بدلات
وعيشتي خير ورزق ونعمه من الله وبركات
بالصيف بالكويت ما أعرف المطارات
مفتكّ من لوية التذاكر وحجز الأوتيلات
أودي اليهال السينما ونفتر بالمولات
ناكل, ونتسوق إذا سوّت المحلات تنزيلات
عندي سياره ما أركب تكاسي ولا باصات
وغداي كل يوم إيدام وشوربه وسلطات
والعشا على هوى اليهال بيتزا وسندويشات
بيتي ملكي وحلالي ما أعرف الأجارات
يازينه, الواجهه جيري وتكييفه وحدات
فيه نخله وحق السيايير حطّيت مظلات
والسور بالعيد الوطني أشَكْبّنَه ليتات*
ربي لك الحمد والشكر ماعندي مديونيات
شنو نبي زود ,عجيب من يشكي بديرة الخيرات
ولّا الطمع زايد والناس ركضه على البيزات**
ياريت الناس مثل ماتيمع فلوس تيمع حسنات***
*أشكبنه(فعل):أعلق عليه بمبالغه كبيرة.والحال منه(مشكبن)
**بيزات:جمع بيزه وهي من أجزاء الروبية الهنديه وتستخدم الكلمة بمعنى النقود.
*** البيت من حكم بوجاسم الله يرحمه وكتبت بوست كامل عنه.
https://t7l6m.com/2010/12/21/%D8%A7%D9%84%D8%B7%D9%90%D9%8A%D8%A8-%D9%85%D8%A7-%D9%8A%D8%B6%D9%8A%D8%B9/
T7l6m 
الغناة غناة النفس مو بالبيزات
ناس تتشرط بالماركات
وناس ترضى بالموجود من غير جدالات
يقولون بالامثال مد رجولك على قد اللحاف
اي لحاف دون كرفايات
هذا مبدأ والمبادئ كثار
الحال كله بخانة القناعات
والحمدالله على النعمة
الحمدلله على النعمه
وفعلا الغنى غنى النفس وياما ناس من أهل الملايين ونفوسهم دنعه
والقناعه كنز بس من إللي يحس ويقدّر
حياج الله أختي أسعدتني زيارتكم ومشاركتكم
صح السانك اختصرت كل شي
صح بدنج
والحمدلله لأني كنت أحاول أغطي أشياء وايد بكلمات أقل
حياج الله وشكرا لمروركم ومشاركتكم
ونطروا القصه قريبا
“من أصبح معافى في بدنه آمنا في سربه عنده قوت يومه فكأنما حيزت له الدنيا” حديث شريف
هذا بس الي عنده قوت يومه كأنه حيزت له الدنيا
والي عنده أضعاف أضعاف القوت ولله الحمد شنو حاله؟
“ولتسألنّ يومئذ عن النعيم”
يعطيك العافية فعلا محتاجين مثل هذا التذكير
هذي المشكله.أفقر شخص حياته مريحه بمقاييس ملايين إذا مو مليارات البشر
ناس عنها قوت سنه جدام وبيت وسياره وملابس تلبّس فريج ناهيك عن باقي الكماليات
ويشتكي من الفقر
أقول لأمثاله لن تحس أبدا بالنعمه
حياج الله أختي وشكرا للمشاركة المفيدة لنا
مممم
قناعه وفق ظروفه و حياته باجر العيال يكبرون و يبون سيايير … غير الجامعه …وغيره .. وغيره …
مع ذلك احييه على نظرته …
عساك على القوة …
…. ترى مالقيت تعليق لك كل التعليقات نشرتها !!! …
الله يقويج
اللي رزقه بهالظروف وبهالحياة يرزقه بأصعب الظروف
الرزق من الله وربج سبحانه ما ينسى عبيده ويزيد الشاكرين
آنا مادري وين راح التعليق
آآآآآآآآآآآه من البيزه والبيزات
الي عنده فلوس سفرات ورحلات
والي ما عنده يقعد بالكويت وياكل لقيمات
ويجابل الوييه الجلحه بالدوامات
ويرجع الظهر كله نكد وحسرات
حر وقلجه وفوق هذا ماكو اجازات
ولا شمة هوا حتى في المنتزهات
وحتى البحر اذا رحت كل جتات
ماكو الا تتقاعد وترتاح من مفرق الجماعات
وتشتغل شغله ثانيه حق السفرات
ولا منة كادر او بونص بالحسرات
ولا رضا مسؤلك اذا كان من اصحاب المزاجات
يتفضل او يذلك علشان البيزات
وسلامتك من المذلات
آه من البيزات
ويازين اللقاءات بعد الغيابات
وتدور فناجين القهوة والشايات
ونردد سوالف وحكايات
أيامنا لحظات تتجمع لتصبح ساعات
وأيامنا تتراكم فتصبح سنوات
فهل يلعب بها أصحاب المزاجات؟
حيالله المقهور نورتنا
اللهم لك الحمد والمنه
وربي لاتغير علينا
واصلح حالنا للأفضل
عساك عالقوة خوش بوست
حيالله سله
الحمدلله
والله يصلحنا ويعينا على حمده
الله يقويج دكتوره
أسعدنا مروركم
المشكله ان البعض يعرف و لكنه لا يطبق
الحمد لله على النعمه و الخير
كل الخير لك أخوي
احترامي
الف الحمدلله على النعمه
راح يتعب وايد إللي يعرف وما يطبق
ممتن لزيارتكم وشاكر لكم مشاركتكم
حياك الله
صح لسانه .. ومن سمع ومن قرا و من شاف
كلام كله عدل وشافى وغنى عن الأوصاف
يا ليتنا مثل هالمواطن اللى تحكى عليه .. كان كل واحد نام وهو مرتاح و قرير العين ..
شكراً لك تحلطم .. ما قصرت .. يعطيك ألف عافيه
صح بدنك والجميع
الراحه ليست بكم نملك ولكن بتقديرنا لما نملك
الشكر لكم أخوي قوس على تواصلكم ومشاركاتكم
الله يعافيك ويحييك دائما
الحمدلله على النعمة والعافية بس يليت هالنعمة الي عايشين فيها يستغلونها بشي سنع يعدلون الديرة يحطون لنا ابراج كويت صغار يحطون لنا متاحف يحطون لنا شي يسوى نروح له ونحس ان ديرتنا سياحية .. @@
ولا احنا ماعلينا خوف الحمدلله عايشين بنعمة وعافية مانبي زود الحمدلله
الحمدلله
واللي تتكلمين عنه يدخل ضمن التنميه
وهي مثل بيض الصعو نسمع به ولا نراه
حياج الله طموحه نورتينا
في عوالم النفس دائما هناك خيوط . هناك خيط بين العُجب وتحقير العمل , هناك خيط بين عزة النفس والغرور , هناك ايضا خيط بين الطموح والقناعة
ويبدو ان الشخصية في المقال لا تعرفا لقناعة لذلك لا تعرف الطموح !
على كل حال كل شخص بينام على الجنب الي بيريحو
أعتقد أن الشخصيه ترى أن ما لديها كثير وكافي وتعف يدها عن المال المشكوك فيه
وتعجب الشخصيه من الذين يشكون الحاجة في الكويت
حياك الله يا بن محمدي نورتنا بهالطله الحلوه