يقال أن الأفندي إللي إسمه آينشتاين له وصف لنظريته النسبيه.يقول العالم بو كشّه “إذا جلست مع فتاة جميلة لمدة ساعة تمر الساعة كأنها دقيقه وإذا جلست دقيقة مع بروفيسور كئيب تمر الدقيقة كأنها ساعة:هذه هي النسبية” ,أو كما قال العالم الفيزيائي الألماني الأصل والأمريكي الإستحواذ ولو أهو عربي على مخه جان إشتغل بياع خضره.
ماعلينا ,إكتشفت إني كنت أفكر منذ طفولتي بالنسبية وقبل أن أسمع بآينشتاين ونظريته.كنت أتساءل:ليش نقول برد الجاي وإحترّ العصير(أو البيبسي للدقه) رغم أن كِلا السائلين سيصلان إلى درجة حرارة الغرفة بعد فترة زمنية.حللت الموضوع بفكري الطفولي العلمي وقلت السبب يرجع إلى تفضيلنا لدرجة حرارة كل مشروب فالجاي لازم حار يلسع والبيبسي لازم بارد يعور البلاعيم.ولم تساعدني قدراتي الكتابية حينذاك لكنت وضعت الصياغة العلمية لنظريتي “النسبية الكويتيه”.
كثير من مشاعرنا لها إرتباط ما بالنسبية:
*الحين النتايج والكل يتمنى أن تكون نسبته مقاربة لنسبة أشطر واحد/وحده بالصف.
*شخص يقول بيتنا حكومه وسيارتي قديمه:أنا فقير.صح بالنسبة لشخص بيتهم بشويخ وسيارته مايباخ .لكن مقارنة بشخص منتف يركب باصات ووانيتات وساكن مع خمسه في غرفة بالجليب يطلع عليه “بيل جيتس”.
*طالب يدرس ساعه ويلعب بالآيفون يقول تعبت من الدراسة مقارنة بطالب يلعب بالآيفون لمدة ثلاث ساعات وبالبلاك بيري ساعة أخرى.لكن مقارنة بطالب يدرس 24 ساعة ,بإستثناء 6ساعات نوم وساعتين أكل وراحه طول اليوم, تطلع دراسته غشمره.
*موظف يخلص جم مراجع ويوقع جم ورقه يقول اليوم تعبت لأنه يقارن شغله بزميله إللي مقزرها مجمعات وقهاوي.لكن إذا قارن نفسه بعامل تمديد بايبات الماي اليدد السود والحرارة 48 يطلع شغله كشته للشاليه أو الجاخور.
*إللي يسافر ويقول تعبنا بالطياره لأنه يقارن نفسه (بالسياحيه)مع ربع الفيرست.لكن لو يقارن نفسه مع المسافرين برا في باصات ,أقول ياكل تبن أحسن له.
*الموظف العزوبي إللي معاشه الف ,ومايسوي شي,ويشكي الفقر لأنه يقارن نفسه مع العسكري أو موظف محظوظ(واسطته قويه) معاشه بضع آلاف.لكن المفروض يحمد ربه عالنعمه, إذا قارن نفسه مع محاسب الجمعية إللي دوامه 8 ساعات من التوتر المتواصل بسبب اليهالوه المزعجين والكبار الأكثر إزعاجا .
*إللي يحوشه إسهال أو إمساك أو نشله ويشكي المرض وفيني مافيني لأنه يقارن نفسه بالآدمي الصاحي.لكن إذا دخل مستشفى العظام وشاف المكسرين وشاف أهل الأمراض الجايده يقول الحمدلله مافيني شي.
أكرر وأقول الأمور نسبية والجميع الحمدلله بخير وعافيه ومو ناقصنا شي إلا الحمد.
حمدوا ربكم على النعمه لأن النعمة زواله.
إحمد ربك على النعمه ولا تشوف إللي فوقك شوف إللي يتمنى حالتك.
T7l6m 
على العهد دائما بالكلمة السهلة التي تتوجه للعمق مباشرة فتوجه الاخلاق عبر صورة بسيطة مقنعه لم تنقصها المقدمة المعلوماتية الجذابة التي تسهل علينا بعدها إلتهام السطور وهي محلاة بالطرافة التي تمط الشفاه يمنة ويسرة 🙂 إلى آخر كلمة.. بالفعل هي النسبية في كل شيء وحتى حين النظر الى أصالة قلمك نسبة الى تفاهة بعض الاقلام الشهيرة على الصفحات الاخيرة من صحفنا حيث تمارس الملاقة والشتيمة بإسم الكلمة الساخرة بينما يطبل لها تدني مستوى الذائقة العامة هي ذاتها النسبية التي تجعل اسمائهم شهيرة واسمك مجهول تماماً لو كان آينشتاين بيننا لكان بياع خضره او خباز..
على كلن وراك وراك ياعزيزي والزمن طويل عسى يبارك لنا بأعمارنا ويطولها على الخير وعسى طال عمر قلمك ديمه فوايد ومتعه .. انصحك بتويتر كلمتك اتطير بالعالي اهناك واذا موجود دلني على رابطك
يالحبيب شوف لي واحد يقرا على بلوقي ماني قادر ادخل له
أخوي الغالي بوحمّود ما عبّر مرتين
الأولى هالغطّه الطويله عن التدوين بكبره وخليتنا فعلا نحاتيك ونفقدك في فترة كانت كل ليلة منها “ليلة ظلماء”
وإنت البدر في بوستاتك لا وحتى في شعارك.
والثانيه على الدشه القويه والكلام اللي ما أقدر أوصفه سوى إنه خلاني أتشقق
كلامك الطيب والمشجع أخوي جاسم يعكس ذوقكم وكريم أخلاقكم
كل يوم نطل على بلوقك بس ماعندي المفتاح علشان إنت تدخل عليه
والله يازين ملاحقكم وإحنا إللي وراك وراك والزمن طويل والله يعطينا وياك والجميع الصحه والعافيه وطولة العمر باللي يرضي ربنا
وأمس لاحقتك على تويتر
حياك الله بو حمّود نورت مدونتنا بعد الغياب
و أرجوك لا تعيدها لأنه جد فقدناك
موضوع وايد حلو ,في قصيدة جميلة جداً للشاعر إيلياأبو ماضي بعنوان(كم تشتكي) يقول فيها: كم تشتكي وتقول انك معدم ,والارض ملكك والسماء والأنجم
ولك الحقول وزهرها ونخيلها ,ونسيمها والبلبل المترنم
والماء حولك فضه رقراقه ,والشمس فوقك عسجد يتضرم
القصيدة طويلة ستجدهافي النت وهي تتكلم عن النعم التي انعمنا بهاالله ,وما أكثرها وما أقل الشكر عليها .
إي والله ما أكثر النعم وما أقل الشكر على النعم
القصيدة وايد حلوه وكلماتها رقيقة ومعبره
أشكرج أختي عرفتينا بالقصيده
حياج الله وأسعدتني مشاركتكم
نحمد ربنا ونشكـره
أما سالفـة الوساطة هذه تخنقنـي … حرام يوضف واحد ماعنده ماعند جدتي ويطرشوا واحد فاهم ومتعلـم …
يروقني هذا النوع من الكتابات فهي نوع من الأدب الساخـر … او مايسمى الكوميديا السوداء في العصور الوسطى .
طرح جرىء وممتـع .
الحمدلله على كل حال
والواسطه تخنق الجميع (إللي ماعندهم واسطه)
وهي سبب خرابنا
يسعدني روقانكم لِما قرأت
وزعلتني على اللون مايصير نغير الأسود!
حياك الله يابن رامبو
شكرا لمروركم ومشاركتكم وإن طاب لك عاود
السلام عليكم والرحمة
اعذرني اخوي راح اعلق في منحى مختلف بما انك اكتشفت قانون النسبية قبل ما تدري ان فيه اختراع اسمه انشتاين ابلشونا فيه “دنيا حظوظ”
تعليقي عن التعليم عندنا في العالم العربي عموما بما اني مو في الكويت،
وانا صغيرة تقريبا 5 سنين كنت احب العب بالورق واقصه مربعات واجي بعدين اقصه قطع صغيرة واشكله دائرة ، طبعا حواف الدائرة مختلفة عن زوايا المربع كنت احب اقيس واعوض وابدل الين اوصل لدائرة بنفس قياس المربع تقريبا ” ورب النعمة بدون مبالغة ”
وصلت لاخر سنة ثانوي وتونا ندرس النفاضل والتكامل وطبعا كل الدفعة اذا ماكان كل طالبات السعودية غالبا مايعرفون ايش المغزى والغرض من التفاضل والتكامل……. بعدها بفترة بالصدفة قابلت قريبتي اتولدت واتربت في الهند وكانت بعدها تدرس هذاك الوقت وبالصدفة ذكرت لي ان التفاضل والتكامل قوانين وتطبيقات تعويضية وتحولات …بالضبط نفس اللي كنت اسويه وانا عمري 5 سنين!!!
ايش يضر التعليم العربي انه ينقذ تطبيقات بدال النظريات اللي ماندري ايش سالفتها ويحسسونا اننا اغبياء على حساب التطور والعلم؟؟؟
واكرر اسفي عالتعليق اللي ماله دخل بالموضوع .
حياكم الله أخت أماني
وشجون التعليم مشتركة ,أقصد مشاكله وقصوره وبلاويه
مع الأسف من أكبر عيوب التعليم عربيا التركيز على الجانب النظري وإهمال الجانب التطبيقي
ولو كان هناك توازن بين الجانبين لتطور التعليم ولإزداد حب الطلبة(ذكورا وإناثا)له وإستفادتهم منه.
لا داعي للإعتذار أو الأسف فالمدونة بيت الجميع وهايد بارك للكل
منبر لأراءكم وساحة للإستفادة من معلوماتكم
أسعدنا مروركم وهذه المشاركة المفيدة
الله يا تحلطم . إسلوبك رائع فى طرح موضوعاتك .. ولا يمل الواحد من قرائتها تماما مثلما اجلس مع حسناء جميلة ويمر الوقت و أنا لا أدرى
وفعلاً كل شيء فى هالحياة نسبى .. جميل طرحك عزيزى ولا يخلو من النقد والحكمة فى آن واحد .. عندما أرى كتابتك أتذكر كاتب كان يكتب عمود فى جريدة يومية وكنت أقرأ نقده اللاذع كل يوم حتى إننى قد أدمنت شراء الجريدة من اجل ذلك الكاتب …
تحية لك منى
أجمل وصف لموضوعاتي
ومجاملة تسر الصديق وتغيظ العدا
بس شوي قويه يعني موضوعاتي =حسناء
أعتقد إنها تساوي الجلسه مع آينشتاين أو واحد من العجايز من كثر التذمر إللي تحتويه
أشكرك أخي قوس على الإطراء
وأسعدني مروركم
اذا بتقارن الاشياء خلنا نقارن بين المسئولين علشان نطور البلد ونوصل حق انشتاين
مسئول مخه متروس معلومات وافكار
ومسئول ما يدري شنو الفرق بين القطو والفار
ومسئول يحرق نفسه بالدوام
ومسئول ما تخليه يبيع بيض وطماط
ومسئول يداوم مع الزرازير
وافندي ما يشرف الا وراه الف طير
ومسئول تشوفه وتقول ابن سيرين
وغيره تقول معقوله ما تعفست دشداشته لي الحين
ومسئول تحتار تشوفه بكل طريج
وبعضهم ما يدل اهو باي فريج
ومسئول لي رحت تدخله بسهاله
وآآآآه منهم تنام وتقعد عند بابه علبالك قامت الساعه
ومسئول تدش وتطلع منه وتقول ليش الوقت بسرعه يطير
وفي ناس تتمنى لو الغرفه تنقص نصين وراضي بالي يصير
وسلامتك
الله يصلح الحال
ويرحمنا برحمته
ويصبرنا على بلاءه
ويعينا على الحمد والشكر والثناء
الحمدلله الواحد بخير وعافيه
والله يصلحنا ويصلح الجميع
والكبر لله
هونها وتهون
وحياك الله
الحمد لله
الحمد لله
الحمدلله
تدري وأنا أقرأة البوست بكل أندماج و لما وصلت إنك كنت اتفكر بالنسبية في لحظات مخي فصل وقلت منو اكبر تحلطم ولا اينشتاين ؟؟!!!؟؟
أكيد هو 🙂
الحمد لله الذي بحمده تتم النعم
مشكور تحلطم على التذكير
فعلا الحمدلله
وكثر ما نقولها فنحن مقصرين بالحمد على النعم
لا منو يقول آينشتاين أكبر مني يالظالمه
أهو من مواليد القرن الثامن عشر (1879) أما أنا من ربع القرن السابع عشر
الشكر لكم على المرور والمشاركة
وعسى الله يجعلنا وإياكم من الشاكرين
وإنت صاج
صج إحنا بخير ونعمة
ألف حمد وشكر لله وعسى الله لا يغير علينا يارب
بوست قيم الله يعطيك العافية 🙂
الحمدلله على النعمه
وعسى الله يكثر إللي يحسون فيها ويقدرونها ويحمدون ربهم عليها
شكرا أختي للمرور وكلماتكم الطيبه
** ايه الحمدالله ألف مرة و على قولة امي حليمة ” الله يرحمها ” لو ما الحسد ما مات أحد ..
الحمدلله
والله يرحم أمّج حليمه وموتي المسلمين
وصدقت بالكلمه
حياج الله ميمه