في الويك إند لا نتعاطى السياسة فإذا أردت شيء منها,شوف جارنا.ونتجاهل في أيام الراحة الجد والهزل.
فما بالك حينما نسمو بالسماء الدنيا بضع عشرات الآلاف من الأقدام ثم نهوي حتى مستوى سطح البحر.
حينها سنتجاوز الهلوسات ونلامس الهسترات ولن يستوعب كلامنا دكاتره أو سسترات.
أربطوا الأحزمة وعدلوا المقاعد.وإذا عندكم خوذه فهذا وقتها.فموضوعاتنا خطيرة.وأولها الورقة:
ندون فيها كلمات وندبجها
وقطر كنافة عليها يدبقها*
نسكب فيها أفكارا ونشققها
والرسمي منها مرات نزورها
وبرشامة بعد إمتحان نعفسها
الثاني :ال آ آت ,المعنى واضح وإذا لم يكن لا تدقق وشوف اللي تحت:
لاعت جبودنا من الأزمات
وإنتهى موسم الإستجوابات
نرتاح شويه من الهوشات
وبيطلعون لك بدقلباسات**
عيشتنا مكافخ وطراقات
وبالزحمه توقف الباصات
ضاعوا الصبيان والبنات
والعطله موسم السفرات
بتقعد عندك سينما ومولات
والحر نحاربه بمكيفات
لاسيكل بالشارع أو بنشيات
ولا بالبحر تشوف حوريات
ومن يعتقد بمقدمة وختامية نعتذر له فالويك إند موسم العجائب والصيف موسم الجنون قصدي المغامرات .
والآن فكوا الحزام وصرفوا فلوسكم فلا تقشف عندنا ولا ميزانيات بعجوزات.
الحمدلله ميزانياتنا كلها شابات (الإضاءة).
*يدبقها:يصيبها الدبق أو لزوجة القطر
**دقلباسات:حركات أرعه بالمصري وبالكويتي دقلباسات ه
T7l6m 
الظاهر من عوايد الورق يتدبق معاكم
ضاعوا الصبيان والبنات اي والله
والميزانيات الله يديمها ويبارك فيها
صح لسانك ولا فض فوك 🙂
الحمدلله من من عوايده يتدبق
بس إذا الصبع فيه دبق تحسين فيه عدل مع الورق
صح بدنج ولا فض إللي قلتيه(أخاف أقول فوك يطلع للمذكر بس وإذا قلت فاك يطلع فوك)
حياج الله أختي
الحمد الله الصيف وصل خل نرتاح
وناخذ اجازه ونسهر لي الصباح
وننسى الدوام واليهال والبسكوت ومظيع الافراح
ونفتك من وييه بعض الاشباح
ونسافر ونغير جو مع السياح
ونلتقي مع الربع والخلان في ليالي ملاح
واخيرا نفتك من الاقلام والاوراق ومن المملوووووووح
الله يقطع إبليسك يالمقهور
كلامك ألذ من ميد وصبور
وأعذب من تغريد الطيور
الله يفكك من مطيور
وتربط مخه بسيور
مخه كبر مخ زرزور
أنا قريت البوست بس ما ادري منو حاجاني ولهيت ما علقت !!!
خلص الويك بكل أفكاره …
وبدت الإجازة ولونها ما بدت للكل …لي الحين نتايج الثانويه إلي الوزير نقزهم إلا يبي يبشر الأوائل أول ..
و الأهالي يا قلبي على نار …
المهم الله يوفق الجميع يارب
ويسعد أوقاتك اخوي تحلطم بالإجازة و بكل وقت
شكرا
اللهم آمين يوفق الجميع ويفرحهم ويفرح أهلهم
ويفتكون أهلهم من لوية المدارس وعيال اللذين المدرسين الخصوصيين قصدي المنشار
لا وإذا دخلوا علشان يعطون الدرس حسبالهم داخلين ستاربكس من طلبات المشارييب
ناقص شيشه وتكمل
سوري جني طلعت عن الموضوع بس على قولة واحد من الشباب
كل إناء بما فيه ينضح
صج نسيت من حر مافيني
ويجعل أيامكم وأوقاتكم سعادة وسرور