لا يغشكم العنوان ولا تروحون بعيد.ترى الموضوع مو عن X Men الأبطال الخارقين إللي العمي فيهم يشوف,والبطل تطلع من إيده سجاجين ولا عن الأجزاء الثلاثه مادري الأربعة من الفلم إللي يسولف عنهم .لن أكون بمستوي التحليل الرائع لزميلناوحيد في المنزل ولا بعمق رؤيته في هالبوست http://homeealone.blogspot.com/2011/06/x-men.html.
الموضوع فيه X وفيه رياييل أو, لنكون أكثر دقة, فيه بشر.المقصود ياكرام ويا كريمات ,الترطيب,وضع هذه العلامة على الأوادم.وتحديدا حينما نقول “حطيت إكس على فلان “او عندما نحورها ونقول”أكّست على فلان”.
هناك كثيرون نتعايش معهم بسلام ووئام ولا نضع عليهم هذه العلامة طوال علاقتنا بهم.وهناك من نسِمُهم بهذه العلامة جزئيا أو كليا بعدما نكتشف ,بعد فترة قد تطول أو تقصر,إنهم “خواره”ومو كفو.
ممكن يكون الإكس جزئي يعني واحد سلفته ومارد السلف فتكون ردة فعلك إنك تأكس عليه وما تسلفه مرة ثانية ,ربما,مع الإحتفاظ بحد أدنى من العلاقات.أو مثلا مشهور بخيانة المواعيد فما تلتزم وياه وتحط عليه إكس بالمواعيد,وهكذا.
أما إللي تكتشف إنه كلب إلى جده السادس عشر أو إللي تصير بينك وبينه سالفه خايسه مالها غفّاريه ف تأكس عليه ,أو عليها ,إكس كامل وأبدي ,طبعا مالم تكن متسامح وطيب.
وهناك الناس الواضحه.هالناس من تقعد وياه خمس دقايق تحطّ عليه X كبر راسه.
هؤلاء يتصفون بال 3 غ=غباء,غرور,غشم.
هؤلاء ما يشرفك إنك تعرفهم فتتجاهلهم بعد اللقاء الأول وإذا كنت سيء الحظ وإلتقيت معهم مرة أخرى فستكون مناسبة جديدة لك لتجديد الX وتأكيد قناعاتك السابقة بهم.هؤلاء لا سوالف زينه ولا أسلوب كلام سنع,وفوق كل هذا أخلاق تبن و يشوف نفسه “بالك بالك”.حينما يتكلمون تشعر بسخافتهم وضحالة تفكيرهم وحينما يتكبّرون على من دونهم تدرك نقصهم وحينما يتملقون للآخرين تحتقر سلوكهم.تخيّل كل هذا يصير في أول لقاء لك بشخص لم يستغرق أكثر من دقائق قليلة.
بذمتكم ما تحطّون عليه X .
إذا مروا عليك مثل هالأوادم راح تعرف قصدي.وإذا ما مروا عليك وحدّتك الدنيا على واحد من هالنمونه فستتذكر كلامي.
T7l6m 
النماذج الي ذكرتها تستاهل الاكس من أول خمس دقايق
بس الي ما أأيده بعض الناس تكون بينك وبينه علاقة طيبة ومواقف كثيرة زينة
وبسبب موقف واحد ماعجبهم يقولون خلاص انا حطيت على فلان اكس
ينسون كل الطيب بسبة موقف واحد ولا يحطونلك أي عذر
يعطيك العافية
المقصود مو موقف عابر
والموضوع مو عن موقف ما يعجب الشخص
لا موقف مصيري تبيّن فيه صدق العلاقه ومدى قوتها
أما المواقف أو الطبايع فهذي تغطيها الإكس الجزئي
الله يعافيج وحياج الله
أشهد بالله إن كل كلامك صدق …
أشكرك على التأييد المطلق
وشهادة أعتز فيها
حياك الله أخوي قوس قزح
ملئت مدونتنا ألوان بمرورك ومشاركتك
اعتقد انك نسيت تذكر X عكسى
مثال
واحد حطيت علية ْX مثلا من اول دقيقة ومن اول موقف
يتظح لك بعد فترة قد تطول انة ما يستحق X
وان مسكين مظلوم
صارت معاك ولا لأ
وشكرا
فعلا
كلامك مضبوط
صراحه ما أذكر إذا صارت معاي بس أعتقد الإنطباع الأول عن الشخص له تأثير كبير
المشكله أنه صارت سالفة ال X إللي ذكرتها ووصفتها مؤخرا ويمكن هالشخص طلّع كل شي بايخ فيه من أول خمس دقايق
والمشكله بأسلوبه مع الناس مو معاي أنا شخصيا هي اللي خلتني أأكس عليه.
الشكر لك على الزيارة والمشاركة المفيدة جدا جدا لكي نخفف تحلطم
حياك الله نورتنا ولا تباعد
لووووووووووول تدري تحلطم مر علي واحد جذي في الدوام صج صج مسكين تخيل كنت ضيفه في قسمهم واناقش ملف معين
و يا موظفين الظاهر هو عليهم ومساكين قاعدين في مكتبه علشان اكبر تخيل دخل المكتب بطريقه حدها فضه و قعد على المكتب
و طبعا الموظف غير مكانه لما شافه داش و قعد على المكتب و اتصل تلفون سخيف مثله و انا جمدت جني اشوف فلم جدامي لووووووووووول
شنو هالكبر شنو قلة هالأدب إنزين إنت وموظفينك تنيازون أنا شكو احترم وجودي اسألني شنو البيانات الي المفروض اتزودوني فيها
لووووووووووول كسر خاطري الموظف كان مستحي
حسيته يقول الله يستر لا يتحجى و يعميها مره وحده
طبعا أخينا بالله أكس كبرعقاله علامة تجارية تنحط عليه …
الحمدلله والشكر
إنتي قلتيها “جني اشوف فلم جدامي ”
الأخ ودك تمثّل وتحس عندك موهبه خلها مقتصره على قسمك وموظفينك
التعميم مضر لك
فعلا يستحق إكس وبجدارة
حياج الله يالجودي أسعدني مروركم وضحكني العليق ذو العلامة التجاريه
اخي المتحلطم 🙂
عادة الناس ما تحب الشخص المتحلطم.. لكن تحلطمك له نكهة لذيذة 🙂 و خفيفة على المعدة 🙂 أهنيك عليها
كلامك في محله.. لكن مو شرط نكون علي اتصال مباشر معاهم او معرفه شخصية بهم
مثلا اعضاء مجلس الامة .. و الكثير من الشخصيات العامة .. كم واحد منهم يستحق الاكس ؟؟ :))
اشكرلك مره اخرى اطراءك السخي .. دايما تخجلني اخي العزيز.
شكرا
أخوي وحيد لم يكن إطراء بل هو إعتراف بروعة كتاباتك وإنك تطقنا عشره – صفر بتحيلاتك وأسلوبك ورؤيتك
والإطراء هو قولك بأن لتحلطمي نكهة لذيذه وخفيفة على المعده
وفعلا هناك كثيرين من لا نكون على إتصال مباشر بهم ويستحقون الإكس
فكرة ممتازة لبوست خاص حول مستحقين الإكس من الشخصيات العامة
حياك الله أخوي أسعدتني زيارتك وونسني وصفك
ما ادري ليش هالنظرة القامجه للناس
في ناس حلو مجلسها
وفي ناس حلو معشرها
وفي ناس حلو شرب الشاي معاها
وفي ناس حلو الحش معاها
وفي ناس تستمتع بالتحلطم معاها
وقليل من الناس اذا شفتهم تقلك طول اليوم
وودك تنام اسبوع علشان لا تتذكر انك صبحت بويهم
وطعم القهوة بحلجك يصير شاي
والحلو يصير جنك ماكل آش
والكركدي الى شربته جنك شارب ماي مالح بمجلس هالمليق
الله يكافيك شر النظرة الغامجه
وشر التحلطم
صراحه حسستني إني أمام أستاذ كبير بالتحلطم على تعليقك
والله إنك ضحكتني
حياك الله يالمقهور وسلامات
الx ايضاً لما تسافر مع واحد وتحس انه مليق حتى النخاع لافكر ولا مبالاه ولا احترام للغير والx مطلوب في العديد من الحالات وفي بعض الاحوال لايحتاج لاx بل بكس
صح لسانك
والناس تنكشف بالسفر
ولمعلوماتك أصل الكلمة بمعنى أسفر أي كشف عن
والعرب كانوا يعتبرون السفر مناسبة تكشف عن معادن الرجال وسلوكهم لذا سموها بذلك
وصح لسانك مرة ثانيه في ناس تستاهل بوكسات بدال الإكسات