Statuses

خرابيط ليست للنشر

In أخلاقيات, حلمنتيشي on 11/06/2011 by t7l6m مصنف: , ,

تكتب نثرا أو شعرا
خضره أو فجلا كله سلطة في زمان المفاجأت
كلامنا اليوم خرابيط وهلوسات
فيه سياسه وفيه شوية زعترات

ماله علاقه بالنثر والشعر
ولو إمتحان بواسطه أخذ صفر

طول بالك علي وخلك حيادي
والخرابيط بهالزمن شي عادي

كل شي في هذا الزمن جايز
أخذ الحماس من الشباب والحكمة من العجايز

أحد توقع فقير مسكين ماعنده وظيفه يزيح بن علي
ويخربط نظام حسني ويسويه جلي*

مجنون ليبيا يدور مخرج آمن
واليمني سقط بالكمائن
حالته الصحيه كسيفه
والثورة وصلت لي عاصمة الخليفه(1)
بشار يقتل شعبه والناس كفيفه
وبعد الربيع نظامه يعيش خريفه

كل شي غريب يصير وبالصيف تسمع رعد
منو توقع يستقيل أحمد الفهد

ويحليل ربعنا أهل الوثيقه
خلوهم يتظاهرون بالحديقه

لا تلومون الناس إذا عقلهم زخ
شلون مظاهرات في بلد أهلها جخ
ماتدري منو الصياد ومن طاح بالفخ
ولد العم يقول بسبة ولد عمه “أخ”

صيفنا هلّت لواهيبه وهبّت
والحب بالأفلام الهنديه “مهبت”
الإثاره بالكويت وبالمنطقه طبت
والناس من الحر بالعطله قبّت

لا تلوموني لي قمت أقول خرابيط
وسولفت عن السياسه مع البلاليط
أشوف نواب تلعب بالزبابيط**
والناس تمشي وتهتف “طيط طيط”

إسمحوا لي إذا شعرتوا بإهانه
مومقصوده من واحد مايعرف ريهانه***
باع سيارته وشرى بدالها عربانه
وعنده السياسي أخلاقه خربانه

لا تقولون شفيه صاحبنا هستر
قاعد أكتب وأتأمل البمبر
خلكم عالحداق وصيد الفسكر
طاوعوني وخلوا ريوقكم زعتر
(1)=عاصمة الخليفه دمشق
*جلي=Jello
** زبابيط=جمع زبّوط
***ريهانه= مطربه أمريكيه خاله

Advertisements

8 تعليقات to “خرابيط ليست للنشر”

  1. جم مره نصحتك وقلتلك اطلع من جو التحلطم السياسي ودش جو التحلطم الجميل
    ليش ما تتخيل ان الكويت وين ما تلتفت تشوف ورده بالشارع
    ووين ما تلف ويهك الجميل شفت الناس تضحك
    واذا طلعت بالسياره على طول الخط خضره
    واذا رحت الوفره ما تشوف الا مزارع فواكه
    واذا رحت العبدلي ما تشوف الا الخرفان اتراكض وبين ريولهم الدياي
    واذا رحت الصبية تشوف مصانع تعليب السمج
    واذا رحت الخيران ما تدري اي منتزه تدش
    واذا رحت الفيحا تشوف ذيك الجمعية من عشر طوابق فيها كل شي
    واذا رحت العديليه وشفت بانين ذاك الاستاد الي تشتهي بس تشوفه
    وتروح الروضه وتتفاجأ ما فيها بيوت ولا مسوينها منتجع شكبره بوسط الديره
    وتروح السوق ولا مجمع الوزارات مكتوب عليه الافنيوز فرع رقم 2 بعد ما حدثوه
    واخر شي لا تتفاجأ لان هذا بسبب تنفذ خطة التنمية بحذافيرها وهاذي النتيجه
    ان الكويت صارت دوله متقدمة وانت صار عمرك 2500 سنة

    • الله يهديك يالمقهور قلنا خرابيط وطقيتنا عشره صفر بخرابيطك
      وما يصير خاطرك الا طيب
      ردي الكامل عليك بتشوفه في بوست موضوعه خيالاتك الجامحه
      وبعدين الله يسامحك من بد كل مناطق الكويت بتحول الروضه منتجع
      إلا إذا قصدك تبرنا ويطلع التثمين زين
      حياك الله يالمقهور وترى ولهنا عليك

  2. انا بعد اقول الزعتر مفيد

    عجيـــــــــــــــــــــــــــــــــــــــــــــــــب
    انت عجيب

    احترامي

    • مفيد ويقولون يزيد الذكاء

      شكرا دكتوره هذا من ذوقكم العجيب
      حياج الله نورتينا واسعدتنا مشاركتكم

  3. ضحكتنى يا تحلطم
    صرت أقرا كلامك و ألطم
    وأعيد اقرا عشان أفهم
    ومقول تعليق و أندم

    هههههههههههههههههههههه

    أجمل مقال قرأته .. الله يسعد كل أوقاتك ..

    • شكرا أخي العزيز
      كلامك إطراء لزيز

      إذا كان أجمل مقال قرأته فإن تعليقك أجمل من المقال بكثير
      حياك الله وجعل كل أوقاتك سعيده

  4. هههههههههههههههههههه

    صراحه اللي. جازلي بالموضوع الجيلي

    بس يبيله زعتر وزيت زيتون ذكرتني بايام الاردن

    ابدعت ياتحلطم

    تحياتي

    • الحمدلله أن الموضوع سبب بعض الفرفشة للقراء
      وموضوع الجلي خفت مايفهمونه حطيت الترجمة معاه
      صراحه ماتوقعت أن الزعتر والزيت لهم هالكثر شعبيه بس لذيذ
      حياك الله عزيزي نورتنا وأسعدتنا مشاركتكم المشجعة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: