Statuses

الشباب حكمة وملاقه

In أخلاقيات on 09/06/2011 by t7l6m

آخر يوم بالأسبوع والكل زهقان حتى السياسيين,والعياذ باللهّ,مالهم خلق والسبّه الوثيقه.ومافي داعي نزيدكم غثا فوق غثا السياسة والظروف الجويه.
باجر في مسيرة إختطفها النواب من الشباب وأرى من المناسب التحدث قليلا عن شبابنا بشطريه الواعي والدايخ ولن أتناول مسيراته المسائية أخاف أتطنز ,دون وعي وإدراك مني,إذا قارنتها بمسيرات شباب اليمن ومصر.لذلك سأتطرق إلى موضوع الشباب على خجل.أجل على خجل ولكن دون وجل.
*الحاضر للشياب والمستقبل للشباب مقولة موضوعية .تدرون ليش المستقبل للشباب؟
لأنهم بيشيبون بالمستقبل وتبتدى معارضة شباب المستقبل على شياب جيلهم إللي أهم شبابنا الحالي.
في حوار فكري ,مادري صبري,بين مجموعة من أشباه المثقفين ,تجنبت الحديث خلاله لأنهم مو كفو,قالوا الكثير عن الشباب أنقل لكم هنا قليل منه.وعلى قولة أحمد “ناقل الكفر ليس بكافر”:
الشباب طاقتهم عاليه.لأنهم يستعملون 98 أوكتين(خصوصي).
الشباب ضايع.لأنه معتمد على ال GPS .
الشباب عنوان المستقبل.والشياب عنوان MBC2 .
الشباب طموح.لأن الشيّاب عندهم إللي يبونه.
الشباب واعي.لكنه لايخلو من سكارى ومساطيل.
الشباب يتابع التطورات التقنيه.ذاك أول الحين حتى الشيّاب,أو بعضهم,عنده Iphone .
الشباب رياضي.والدليل زحمة القهاوي في المباريات القويه.
الشباب تحدي.فيه خير يقعد عشر دقايق بالشمس الساعه وحده الظهر.
الشباب منفتح على الثقافات الأخرى.اللي مايصدق يروح ستاربكس ويشوف جم شايب قاعد.
الشباب مظلوم.ويصير ظالم إذا حطيته بين البنات.
الشباب مو فاهمينهم.لأن ثلاث أرباعهم مو فاهم نفسه.
الشباب ملتزم.بكل شي إلا بالمرور والدوام.
الشباب أنيق .لا تعليق.
الشباب يحب التغيير.ما تشوف السياره ماتطوّل عنده.
الشباب يعاني من صراع الأجيال.من قالّه يعاني.قلعته.
الشباب مجسّم ومعضّل.الله ,لا,يعافي الحبوب والأبر.
الشباب مغامر.لأن الشايب أعقل من أنه يستّب بسيكل أو يويّل بالبانشي.
طبعا الكلام ينطبق على جزء من الشباب أتمنى أن يكون صغيرا.

Advertisements

8 تعليقات to “الشباب حكمة وملاقه”

  1. عجيييب البوست وبردت حرتي ياني منغثة من الشباب @@

    • الحمدلله أن عجبكم البوست
      لكن ترى مو كل الشباب مثل ما كتبت
      إن شالله فيهم الخير
      والله يصلح الباجين
      ويصلحنا وياهم
      حياج الله أختي

  2. يسعد اوقاتك …
    على قوله الاوليين..بس بخليها عالشباب اهي عن الرجال
    راحو شباب اللي بنوا الدروازه …مابقى الا شباب المطنزه و العازه…

    شباب دياي مكينه…

    ربي يهديهم ان شاءلله
    وبعد ماكو التجنيد االازامي اختربو زووود يكافي الشر

    عيل في شاب عمره 40 يقول امبيه و صجججج
    يالللعجب ياللعجب
    بافلوو وننغز بعد مو ماك جيكين
    مو الكل طبعااا الظليمه شينه
    صباح شباب القلب الصالح:)

    • مساء الخير
      الشباب مساكين طاقه وطموح بدون توجيه وبدون تقدير شنو نتوقع منهم
      يعني تخيلي الهيئة المسؤولة عنهم أكبر جهة حكوميه فيها مشاكل
      إن شالله الشباب فيهم البركه
      وما يزعلون من نقدنا لبعضهم
      حياج الله أختي

  3. كل مرحلة شبابها يشبهها و يمثلها
    ولو عشنا رح نشوف شباب ما تقدر تميزهم هم إنس و للا جن
    اكيد موب الكل .. لكن هى سمة عامة و بتمثل هذا العصر المجنون
    وتغيراته المتلاحقة ..
    الحين طفل 5 سنوات يبغى ال iPhone وما يتنازل .. و المصيبة يعرف اشلون يحوسه ههههههه
    والشياب مو قادرين يتنازلوا و يعترفوا إنهم شابوا
    خلها على الله اخوى … زمن العجب ..

    • أن أشهد أنه زمن العجب والعجائب
      والشباب اللي ماتقدر تميز هم عن الجن موجودين حاليا بملابسهم العجيبه وتسريحات الشعر الغريبه
      أما نكران الشياب فإنه يرجع إلى عدم شعورهم بأنهم شابوا وحبهم للإستمرار كشباب حتى دخول القبر
      الله المستعان
      حياك الله أخوي أسعدني مروركم ومشاركتكم

  4. رائع الصراحه نقد جميل ويفيد بس طبعا للشباب اللي يحس ويقدر المسؤوليه

    اما بخصوص التعليقات اللي قريتها انا اعتقد ان التجنيد الالزامي ولا الوقت له دور انه يخلي الرجال رجال بمعنى الكلمه لانه كل شي وله اساس واقصد البيت ومراقبة الاهل للولد ولا ننسى الوازع الديني

    وانا اوافقك الراي ان الشباب الصالح اكثر من اللي تكلمت عنهم لان لو خليت خربت ..

    بس الفئه هاذي هي اللي ضاهره دايم مثل مانتو عارفين يحبون القز وايد .. فدايم نلاحظ النقد يكون لعموم الشباب مع العلم ان لكل قاعده شواذ

    اشكرك على طرحك الرائع واسمحلي عالاطاله

    • شكرا لطيب كلماتكم
      فعلا دور البيت والأهل مع الوازع الديني أساس الأخلاق وأضيف عليهم دور الأعلام والمدرسه
      أكيد المقصود مجموعة محدودة من الشباب لكن مع الأسف يخربون على باقي الشباب ويعمّون عليهم النقد
      الشكر لكم على مروركم ومشاركتكم
      والمدونة لكم وللمشاركين كافه والإطالة مرحب بها
      حياك الله أخوي نورتنا بزيارتكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: