أنا من النوع إللي ينسى النكت,أسمع النكته وأموت عليها من الضحك وعقب نص ساعه أنساها.ما أنسى أول وآخر نكته سمعتها وأحاول أقول وحده فيما بينهما.
أول نكته سمعتها,وأعتقد أول نكته لنا كلنا,مالت جحا والحمامه إللي سوتها عليه وقال لها:الشرهه مو عليج على أمّج إللي ما لبستج صروال.
صراحه ماضحكت يوم أنا ياهل وسمعتها.منطقتها(فكرت فيها منطقيا) قلت صج غبي هالجحا شلون يبي حمامه تلبس صروال.
آخر نكته شوي تلوّع الجبد:أكو عيوز ركبت تاكسي رايحه فحيحيل وكل شوي تعطي السايق سبال,يوم وصلوا قال لها :”حجيه هذا خوش سبال من وين شاريته؟” ضحكت وقالت:لا ياوليدي أنا قاعده آكل سنيكرز وماعندي ضروس فأعطيك السبال.
بمصر قبل الثوره كنت ويا صديق جمبازي إذا ركبنا تاكسي والسايق مشغل أم كلثوم يسألني صاحبي:منو إللي تغني؟ أضطر أرد عليه وأقول له شاديه,يعترض صاحبي وينفعل يقول :لا شعرّفك هذي نجاة الصغيره.
عاد إستلم ردة فعل السايق يقعد يشرح لنا منو أم كلثوم ونسوي نفسنا ما نعرفها والسايق حدّه مصدوم.
مره على نفس السالفه طحنا بواحد كلكجي أول ماسمع نجاة الصغيره وشاديه ضحك وطفى الرادو.قال “إنتوا رايقين إسمعوا النكته دي”
يقول مره حسني مبارك بالسياره مر على حمّام شعبي سأل المرافقين شنوا هذا شرحوا له شنو خدمات الحمام الشعبي.نزل الريس الحمام.عقب مارجع بيتهم سولف حق المره والعيال شنو سوى بالحمام.من باجر راح جمال نفس الحمام ونظفوه وفركوه نفس أبوه يوم طلع سألهم جم الحساب قالوا له 1000 جنيه قال شدعوه أبوي أمس ياكم وخذيتوا منه بس إميه.
ردوا عليه:صح بس إنت أوصخ من أبوك.
وإذا الله قدّر,مستقبلا, نعطيكم شوية نماذج من ردات فعل سواقين التاكسي,وشويه من نكت العيال ونكتة الأمريكي مع موظف الضرايب.
البوست بناءا على طلبات بعض الرواد إللي ملوا من التحلطم وطلبوا التغيير.
لا تزعلون ترى مو شماته بحسني لأنه كاسر خاطري.
T7l6m 
إييه جذيه الواحد يقرا شي يونس يضحك ,مشكور اللي استجبت لطلبي ويليت تكتب مواضيع مفرحة عالاقل مرتين بالاسبوع وهذي نكت اهديها لك ولقراء مدونتك .
* كويتي شلاخ تقول له زوجته :انت شجاع وبطل
قال لها :فاتج ايام الغزو كنت شهيد
*القذافي في احدى خطبه :السفن ترفض النزول في مطار بنغازي لانه اصبح خرابة
الواحد ماوده يكتب إلا الأشياء اللي تونّس لكن مايخلون الواحد
لازم يطلعونلك بشغله تعكر المزاج وتضييق الخلق
إن شالله نغير بمواضيعنا ونضيف شوية إبتسامات عليها
الشكر لكم على النكت الإضافيه
حياج الله أختي
هذا الكلام الي نبيه من زمان
افرح ولا تشوف ويه الزعلان
فرفش وخلك من الناس الرايقين
مصر ام الدنيا وما ترجع منها عطشان
تغير مزاجك لو كان مسئولك تعبان
تخليك تنسى ان ناطرك بالدوام ثعبان
وانشاء دوم تكون فرحان
هلا وغلا بالمقهور
شكلك طايحله ميد وصبور
ونسيت الجرايد وأخبار الدستور
يسعد اوقاتك
يزاج الله خير منى كنت ضد الفكره بس يازلتي مره بالاسبوع مو ازود…او بنهايه اي تحلطم نكته توسيع صدر..ونعين و نعاون مستر متحلطم…
في كتاب عن قصص التكاسي بمصر
بس غميضه مره كنت ماره مختبر الدكتور ضايق خلقه جان اعطيه اياه كان يحاتي اهله ايام الثورااان يكافينا الشر..
يوم سعيد ان شاءلله …
صباح الخير أختي
صراحه أول ماحطيت المدونه سوالفي أونس من الحين حتى التحلطم طنازه وضحك
بس لوعة الجبد لها أعراض جانبيه أطلعها ,مع الأسف,عليكم
وبإذن الله في القادم من الأيام ستجدون ما يسركم
حياج الله أسعدنا مروركم ومشاركتكم