أنا من أكبر معارضي جلد الذات ليس لأن الربع جلدهم يبر(سميك) ولا يشعرون بألم الجلدات ولكن لأني أفضل طرح التناقضات عليكم وتحددون موقفكم ورؤيتكم الخاصه بالموضوع وعليه أقدم لكم(ودي أقول رائعتي بس أخاف تشبهوني بمحمد عبده)الآتي:
حريمنا مرتاحه شغلها تسويه خدامه أسيويه
مايهم جنسيتها فلبينيه,سيلانيه أونيباليه
وعيالنا تنابل يشكون مأذيتهم الدراسه أذيه
لاهين باللعب نسبتهم “مو شيّ” بالثانويه
وعقبها ييب شهاده لو مزوّره المهم جامعيه
وبالدوام لا إحترام أو إلتزام والإنجازات خرطيه
ويقولون شغلوا عيالنا نبي كل الوظايف كويتيه
وبالشوارع يحليلهم مو سامعين بقوانين مروريه
سرعه وتشفط وإستعراضات يعتبرونها فنيه
وبالمجمعات يزعجون العوايل ومايعتقون بنيّه
شككوني بالمواطنين شكلهم كلهم فوضويه
وماتطلع نظافتهم والأدب إلا بالدول الأجنبيه
يا أخي إعتبر وأنت بالكويت إنك بجوله سياحيه
أوضاعنا بكل المجالات تبن إقتصاديه كانت أو سياسيه
المجلس والحكومه هواش تقول يهال بالإبتدائيه
ومسؤولينا دايخين بالمؤسسات الخاصه والحكوميه
والأعلام والجرايد تلعب على القبليه والطائفيه
لا منطق لا تفكير وإنسى خطط مستقبليه
البوق صار موضه ,والفساد مو مشكله أخلاقيه
والمواطن ضاع وشربكوه بالقضايا السياسيه
لاتلومونه إذا صار مينون وحاشته لوثه عقليه
إذا كان جوّنا حر و غبارنا يسبب الحساسيه
أوضاعنا تضيق الخلق تييب أمراض عصبيه
والإصلاح سهل مو ناقصنا عقول أو موارد ماليه
الكويت ماتخْلى من أهل الأفكار طيبين النيه
وعندنا ناس مشهود لهم بالكفاءة والوطنيه
عطوهم ثقه ومناصب وحملوهم المسؤوليه
وخلونا نتعامل مع مشاكلنا والمستقبل بجديه
الكويت ياجماعه نعمه ومن رب العالمين هديه
خلونا نحافظ عليها ونسويها بين دول العالم مثاليه
ولا تْفَشّلون رويشد تجّذبون كلامه بذيك الأغنيه
يوم قال أنا كويتي أنا قول وفعل وعزومي قويه
T7l6m 
واقع مضحك مبكيي !!
صح لسانك استاذ تحلطم 🙂
صح بدنج أختي بوكيه
مع الأسف لدينا إمكانيات وقدرات ولكننا نهدرها
بالظبط,واقع مضحك مبكي
حياج الله أسعدنا مروركم ومشاركتكم
هههههههه والله مو كل الحريم مريحات على الخدم … في حريم ما يرضون الخدم يمسكون يهالهم …
وفي حرام قطع تبي خدامتين على بنتين ولا ثلاث يهال … عجز وكسل .. والحياة بالكويت سهلة والحياة السهلة مملة .. كل شي جاهز ماحب جذي والله 😦
أكيد مو كل الحريم معتمدين على الخدم
ومثل ماقلتي في بعض الحريم ماتدري عن عيالها
الحياة السهلة نعمه تحتاج الحمد
وأهل سبأ كانت حياتهم سهلة وطلبوا الصعوبه وأن الله سبحانه يباعد بين أسفارهم وجحدوا النعمه
وآخرتها خسروا نعمتهم
اللهم أدم علينا نعمك وإجعلنا من الشاكرين
حياج الله أخت طموحه
أسعدنا مروركم وتعليقكم
صح لسانك أخوى .. طرح جيد .. قصيدة سياسية إجتماعية
تكقى عن صحيفة كاملة ..لكن حنا نشوف إن الكويت مثال
يحتذى به فى الخليج عندهم ديمقراطية و معقول متفتحة
تعال شوف عندنا وش صاير ..
تحياااتى لك :))
حياك الله أخوي وشكرا للإطراء
فعلا لدينا ديمقراطية وصحافة وكثير من الأشياء الإيجابية والتي نفتخر بها
وإنتقادنا ليس قدحا وذما بل دعوة للتطوير ورغبة ببلوغ مراتب أعلى
الكويت والكويتيين ولله الحمد والمنة في خير كبير ونعمة واسعة
وعايشين في دلع على رأي إخواننا المصريين
الله يوفقكم وبإذن الله المستقبل سيكون مزهرا لبلدكم ولكل سعودي
حياك الله أخوي أسعدنا مروركم وإستمتعنا بمشاركتكم
كلمات واقعية ممزوجة بآحرف سياسية بحته …!
قلم صريح ممتع ومتمكن ..
اعجبتني … موفق 🙂
شكرا أختي أسما لمروركم و على الإطراء والكلام الطيب
أسعدني أن يكون الموضوع قد حاز على إعجابكم
حياج الله