T7l6m

عن الوناسه كتبت وعن التحلطم ما أيوز
مرات أحسّ بنفسي 24 ساعه طاق بوز
لا تلوموني بناس ضارب عندها الفيوز
لا تحترم بلد لاترحم ياهل لا تحشم عيوز

عايشه حياتها طول بعرض بعياره
خمّه جمبازيه يحسبون البوق شطاره
لا أدب لا تعامل لادين و العقليه ثُوارَهْ
كل شغلهم غلط وشورهم خواره

متأذيه منهم الناس وهمّ مأذين البلد أذيه
إن مسك وزاره باق ويبوق إن مسك جمعيه
وما يحرّم البوق ,يبوق لو يمسك هيئه خيريه
عسى الله يفكنا ويفك الكويت من الحراميه

وفي ناس ماتبوق لكن مشهوره بالثواله
الراس فاضي وإذا فيه مخ كبر السباله*
لا تفلح بالمعاملات والشغل معاها عبّاله**
تأخر معاملات الناس دوم شغلها طواله

وفي ناس مجرمين النذاله عندهم زايده
ماتهمها الكويت تهمّهم المصلحه والفايده
يتاجرون بالبشر ويتاجرون بالأغذيه الفاسده
سوالفهم خطر على البلد عمايلهم جايده***

وناس إذا تكلموا قالوا دستور وقانون
مايدرون إنهم خواره قاعدين يخربطون
والناس غسلت إيدها منهم بصابون
وكلامها مايمشي إلا على المينون

إبتلشنا بالحكومه وبمجلس الأمه
الوزير يعامل النائب جنه ريل أمه
والنائب وده يطق الوزير بمخمه
كل واحد يقول عن الثانين خمّه

الناس تاهت والبلد في ضياع
كل يوم إحباط والمواطن ملتاع
راحت الجديه والشباب صاع
والمسؤول دايخ للحجي بيّاع

الكويت محتاجه حكمة عيالها العاقلين
يفكونها من الحراميه ملاعين الوالدين
عسى الله ياخذهم قولوا معاي آمين

*سباله:حبة الفول السوداني.
**عباله:مشقة,وأذيه.
***جايده:شديدة,قويه.