Statuses

فديتج…ويييععع

In أخلاقيات on 29/05/2011 by t7l6m

فديتك وفديتج كلمه بايخه ما أحبها ولا أحب أسمعها لأن إللي يقولونها مايقصدون المعنى و يمكن مايفهمونه.فالكلمة ,بإستخدامها الحالي ,فيها الكثير من الجذب والكلك والمبالغة والتملق والعياره وهي أسباب كافية بالنسبة لي ,على الأقل ,علشان ما أحبها.
ويقول قاموس المعاني أن “فدى” يقصد بها:استنقذه وخلَّصه مما كان فيه بماله أو بنفسه “فداه بنفسه/ بمالهِ/ بروحه”
والإستخدام الدارج للكلمة يعني “تروح له فدوه” يعني تموت علشانه.وبكل صراحة جم واحد في الدنيا يستاهل الواحد يضحي بنفسه علشانه,طبعا بإستثناء الوالدين والعيال والزوجة بالتأكيد(كلّش ولا مدام تحلطم)
حاليا بعض الناس مو مستعده تضحي بدقيقتين من وقتها ,أو تكنسل طلعة,أو تلغي خطة لمشاهدة فيلم فما بالكم تضحي بنفسها.
المفروض إللي يستخدم الكلمة يكون صريح وواضح ويحدد حجم الفداء والتضحية إللي مستعد يقدمه.
الريال مثلا يقول حق الوحده اللي توّه يعرفها: فديتج بمدالية السياره,أو بكرت تعبئة بوخمسه,أو بطلعة الحداق,وهكذا.
المرأة بالمقابل وبذات الصراحة ترد:فديتك بزيارة السبا(spa),أو بجنطتي القديمه,أو بسبير السياره,أو بالماسكرا.

تدرون شنو ياب السالفه وشنو قصة فديتج.
قبل شوي طالع من الفرع و شفت ورقه (post it) الصفره الصغيره ملزوقه على باب السياره على المسكه ومكتوب فيها”فديتج “والرقم.
أولا:يالبطالي يالجذاب شلون تفدي وحده ما تعرفها.
ثانيا:يالحول شلون تلزق الورقه بالغلط.
ثالثا,والأهم:ياللي ما عندك ذوق ماكو بالفرع إلا وحده حامل وياها خداماتها,ووحده وياها بنتها كبر الفيل(مع الإعتذار للفيل).وكلهم طوفوني وحاسبوا جدامي(وخليت اللي عقبهم من الذكور يحاسبون مساكين كل واحد باكيت سجاير ولا بيبسي).

وفي الختام أقول لا تصدقون اللي يستخدم الكلمه ترى قاعد أو قاعده تجاملكم.

Advertisements

14 تعليق to “فديتج…ويييععع”

  1. لوووول ملاحظة في محلها ,كثير من الكلمات الي نقولها مانقصدها
    بس صدقني اذا كانت مقصودة راح تحس فيها لان من القلب
    اقولك شغله غريبة ؟قبل يومين كنت افكر بفلم تايتنك واقول ماكو الحين احد يموت علشان الي يحبها ويضحي بنفسة مثل بطل الفلم بس خبر عن زوج ضحي بنفسة علشان ينقذ زوجته في الاعصار الي حاش امريكا قبل فترة خلاني اعيد النظر
    وهذا رابط الخبر
    http://news.yahoo.com/s/yblog_thelookout/20110527/us_yblog_thelookout/husband-gave-life-to-save-wife-from-tornado-he-was-my-hero

    • مافي شك الكلمه إذا طلعت من القلب يختلف تأثيرها
      لكن واحد مايعرف وحده ويقولها فديتج واضح الجذب والعياره من كلامه
      قريت الخبر وكسر خاطري الزوج والزوجه اللي راح تعيش أرمله بعد هالزوج البطل
      الريال ماقالها فديتج بس فداها عمليا.
      خل نشوف اللي ما يوقف لسانهم عن هالكلمه شنو يسون بالإعصار !
      حياج الله أختي

  2. كاااك ادري ان الي يقولها ما يقصدها .. بس مادري ليش الكلمة علقت بلساني ..

    يالله يمكن افديه او افديها بعشر دنانير … دينارين يالله …

    افديه بعزيمة عشا مثلا …. مو شرط الروح … وبعدين شدعوة احنا نبطل المعجم الوجيز ونطلع كل كلمة شمعناها … لوووول والله حدك مشتط ياخووووي … بس معاك حق انا اقولها لرفيجاتي خواتي اوكي .. بس انغث لمن اشوف واحد توه متعرف على وحدة يقول لها فديتج … كل تبن فديتج .. شوي يكلمها تالي يقول تقزورة و بنت شوارع … @@

    والمصيبة بالاول قال فديتج … علشان جذي اقول للبنات الي يقول لها فديتج علطول تزفه وتلعن شرشبييييل اهله لوووول

    • عادي تعلق باللسان والبحرينيين دايما الكلمه على لسانهم
      بعدين من يقول نبطل المعجم الله يخلي موقع معاني
      المفروض مثل ما قلتي نستخدم هالكلمة مع المقربين والناس اللي نمون عليهم ونعزّهم
      حياج الله أختي طموحه فقدنا تعليقاتج

  3. انا اول شي ما كنت احبها بس من كثر ما اسمعها لساني خذى عليها
    لوووووول الموقف اللي صارلك ضحكني
    الظاهر اهوا حاط على جم سيارة يجرب و حظه نصيبه يمكن تطلعله بنت حلوه مني و لا مني p:
    استمتعت بزيارتك مستر تحلطم 🙂

    • الموقف ضحكني آنا وايد
      بغيت أسوي فيه دقّه أكلمه وأزفّه بس قلت كفايه أنه طلع حول
      وإذا هذي إستراتيجيته حدّه ما عنده سالفه
      أسعدنا مروركم وأمتعتنا مشاركتكم
      حياج الله أختي بوكيه ولا تحرمينا من مشاركاتكم

  4. صباح الخير

    صاج يا تحلطم مو بس كلمة فديتج يقولونها و ما يقصدون معناها هالأيام المجاملات زايده بين الناس يمكن متأثرين من المسلسلات الخليجيه أو التركيه (:
    إذا انت ما حبيبت هالكلمه انا ما احب الكلام المعسول كله إلي يقولونه الريايل للحريم في الدوامات و في كل مكان أهل مو اهل يعرفك و لا ما يعرفك نفس الحجي مثل مشكور يا قلبي و بعد عمري و يا حياتي و تسلمين و لما ينادون بعض و لا يسلم هلا حبيبي ويينه عن اول هلا بو فلان و كلمه ورد غطاها صار كل مجاملات و كلام على الفاضي و المليان على قولتهم يحبون يطولون بالحجي و الجمله ما تخلص إلا اب حبيبي و تسلمين يا حياتي
    صراحه هالكلام ماله داعي لي صارت الوحده حياويه و مو متعوده على هالكلام اتنح شوي اول الصدمه و الويهه يقلب ألوان صج ما يكون قاصد الكلام و هالاسلوب مع الكل بس هم يضايق ويحرج و ماله داعي يحطم قلوب بالكلام الحلو في حريم ازواجهم فيهم داء الجفاف العاطفي لا كلام و لا تعبير عن المشاعر و تداوم كل يوم وتسمع هالحجي والله تحطيم
    انا اقول خلو الكلام الحلو لامك ابوك زوجتك اعيالك خواتك بس للاهل واذا تبون هالكلام ماشي مو مشكله بس رجل لرجل و مرأه لمرأه فقط لا غير
    تحلطم هذا إلي حاط رقمه و كاتب فديتج أنا اقول جيك على سيارتك اخاف داعمها و يبي يصلحها يمكن يطلع منه ورى هالكلمه (؛
    والله انا يعجبوني الناس الذوق إلي يراعون غيرهم انا اذا صار لي موقف والله أدعيلهم من قلبي و انت مشالله عليك الله يجزاك كل خير
    و يعطيك ألف عافيه خوش تحلطم وانا معاك و السموحه على تحلطمي الزايد

    • فعلا عيب ومن قلة الذوق إستخدام هالكلمات بين الرياييل والحريم إللي علاقتهم رسميه أو سطحيه
      لا الحمدلله السياره مدعومه قبل لا يحط الرقم
      صراحه مافيها منّه مره حامل وياها بنيه صغيره مافيها شي أخليها تحاسب قبلي
      وباجي الشباب اللي بإيده غرض أو غرضين مايصير أعطّلهم وآنا تارس العربانه
      الله يعافيج أختي هلا
      ومشكوره على المشاركه الطيبه منكم
      حياج الله دوم

  5. صباح الخيرررر
    صج صج صج حطيت ايدك ع الجرح
    من ناحيتي اكره هالكلمه لا سمعا و لاتلفظا
    احس بديرتنا حدهم ملقوهاا بزياده خاصة الشابات
    حسبالهم رومانس بزياده
    من اول ماهبو فيها نشدت وحده قالتها هالكلمه دخيله ليش تقولنا مالها معنى اصلا
    عمرها بالعشرين
    ردت علي :تقووول انا اصلا من وقت ما كت صغيره استخدمها
    ردت اختها تقولها اصلا توج هابه فيها
    هذا دليل ان يقولون الفاظ ما يدرون شنو اهي و متى تستخدم
    بس عجبني البوست
    عجيييييب 🙂 فديته :p

    • صباح النورررر
      الكره للكلمه مشترك وأحس الناس توهم يطيحون عليها
      وصراحه مالها علاقه بالرومانس
      الحمدلله أن الموضوع عجبكم
      شكرا لمروركم
      والتعليق فديته بالرد
      حياج الله أختي وإن شالله تحوز البوستات القادمة على إعجابكم
      فلا تخلو موضوعاتنا من التحلطم

  6. صباح الخير صباح اجمل صباحاتي على الاطلاق اخاف سيارتك نسائية علشان جذية حسباله وحدة، على العموم هذا شاري سمج بالماي والله يهني السعيد بالسعيدة

    • صباح النور
      وإن شالله كل صباحاتك وصباحات الكويت جميله
      بعدين أكو سياره نسائيه وسياره رجاليه
      هالأيام الحريم يسوقون لان كروزر وجيبات
      إحنا في عصر المساواة حتى الملابس يقولون لك unisex
      يعني رجالي نسائي فما بالك بالسيارات يالعيّار
      حياك الله أخوي نورتنا بطلتك البهيه

  7. لوووووول

    يفداك الغالي إلي ما يسواك p;

    أول ما قريت على باب السيارة قلت اشلون سيارتك و بعدين قريت الجملة أكثر من مره …

    و فهمت إنها مو سيارتك و إنت محتار من له 🙂

    الشي المزعج في هالكلمه إنها تعطي شعور إن إلي تقولها كلكجيه و عيارة و بس 🙂

    سوري تحلطم قاعد اشوف موضوع و ترك على حسب تساهيل الإنترنت بس إن شاء الله هانت مع المواصلات و دروبها ..

    تحياتي

    • تسلمين أختي
      الورقه كانت على سيارتي
      شفتي شلون،نفس الإنطباع على الكلمه
      الله يصلح المواصلات والحين وزيرهم اليديد مريض
      يعني الله يعينكم
      احنا اللي خسرانين يالجودي والسبه المواصلات
      دائما نسعد بمروركم وتعليقاتكم
      حياج الله أختي
      وتحياتي وتمنياتي بإنترنت سريع وماينقطع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: