الناس أجناس ومعادن ,منهم حديد مْصَدِّي ومنهم بلاتين
منهم من يخاف الله ويعبده ,ومنهم عبيد الشياطين
فيهم من حياته جدّ و ناس لاهين باللعب تافهين
أخلاقهم مو مثل مثل ,في ناس خمّه وفي طيبين
ومنهم الأمانه طبعهم, ومنهم حراميه وبواقين
أشكالهم وأذواقهم تختلف ,فيهم جياكر وفي مزايين
فيهم الطويل والقصير وفيهم الضعيف وفيهم المتين
وناس أنيقه بملابسها وفي ناس هدومها خلاجين
وفي ناس نظيفه مرتّبه وفي ناس قلقله وصخين
وفي ناس حياتها فوضى وفي من يحترم القوانين
وفي من يلتزم بوظيفته وناس من الدوام منحاشين
وبالفلوس الله فرّقهم ,منهم أغنيا ومنهم مساكين
فيهم أهل تجاره و”بزنس” ,عقود ومشاريع بالملايين
وفيهم موظف طايح الحظ ,يحاتي شصار على الخمسين*
لا تغرك الدنيا يابن آدم,أمرك بإيد برب العالمين
يوم بالملايين تلعب ويوم ماعندك فلوس البنزين
ويوم بالصحة إتمتع ويوم مثل البنك تاكل أسبرين
ويوم كل الناس حواليك ,تقول قطاوه على مصارين
ويوم الكل منحاش عنك ,تقول أيرب من المنبوذين**
أعقل وعن الغرور والربربه,ترى العقل زين
فكّر و أعرف أصلك ,تراك مخلوق من طين
*البيت مخصوص للمقهور
**أيرب:المصاب بالجرب(الله يكافينا الشر)
T7l6m 
صح لسانك بدعت
تصبح على خير
صح بدنك أخوي كركرور
أسعدنا مروركم ومشاركتكم
حياك الله دوم عندنا ويجعل أيامك كلها خير
خوش حجي كله صح بس وين اللي يقنع الكل رافع خشمه الموظفه راعاي ماعاش رافع خشمه عن العاطلين والمدير عن الموظفين والطببب عن المراجعين والناجح عن الفاشلين والحلو عن الشينين
شنسوي نقول إللي عندنا وندعي للجميع بالهدايه
والكبر لله
وإبليس أعوذ بالله منه ما طلع من الجنة إلا بسبب الكبر
وإن شالله يقنع الآدمي
حياكم الله وشكرا للمشاركه
:))
إبداع..
ماشالله عليك…
قضية بل قضايا صغتهم بقلب قضايا..وبكلمات موزونه وجميلة
…دائما تبهرني بإبداعك..
وترى ننتظر قصة:)
الله يصلح الحال..
والحمدلله على كل شي
قواك الله
من ذوقج دكتوره
وممنون على الكلام المشجع
والقصص قاعدين نقط بين فتره وفتره قصيصونه زغيرونه
وإن شالله وحده بهالمواصفات بتشوفينها قريبا جدا(يومين ثلاثه)
اللهم أمين يصلحنا جميعا
الله يقويج إختي وشكرا لمروركم والتعليق
اختيار موفق للكلمات الواضحة للمعاني
صح السانك
صح بدنج
وشكرا للإطراء
حياج الله سعدنا لمروركم
جمعة مباركة جمعة الفرح بأن الله , متحلطم اشتقت لبوستاتك طافني الكثير لظروف سفري
راح اقراها كلها .
لكن البوست هذا عجيب
في التناقضات
مرة تودي ومرة تجيب
وانت ماقصرت
وهاذا حال البشر
غريب
وقلوب الناس تختلففف
فيها الفض
وكثيييير منها الخصيب
فيها ناشفة عروقة
وفيها غصنها رطيب
فيها يردم الصدع
وفيها تعيث تخريب
*
*
متحلطم كفيت ووفيت
واشهد ان عداك العيب
دامك اتحلطم صح
دامك اتحلطم رح
بفالك لا تلتفت
لا يدخلك الشك
لا يسكنك الريب
*
*
الناس نشوفها
نتعامل معاها كل يوم
وهاذا قدرنا المحتوم
بننسى لنا عادات
ونترك لنا اسلوم
كل البشر تخطي
والخطأ فيها عابر
وبعض الغلط يدوم
*
*
متحلطم قواك الله
وكل اللي تقوله صواب
واللي عليك سـّوه
حتى لو بقلبك ضـّوه
وينولك من الله ثواب
شاكر لك تحلطمك
وغيرتك ووطنيتك
وأخلاقك وأدبك
وصفاء ذهنك ونبل صفاتك
^
^
^
شايب مزيون
أولا الحمدلله على السلامه ونورت الكويت بردّتك لنا
ونورت مدونتنا بهالطله الحلوه
وإذا فقدت بوستاتي أنا صراحه فقدت التعليقات الجميلة والمفيدة والموزونه والمزيونه مثل راعيها شايبنا المزيون
والله يالمزيون أني أتمنى أن أكون كما تراني وأن يصدق فيني وصفك الرائع
أخجلتني بكلماتك العذبة ولا أجد رد يليق بها وبشخصكم الكريم
حياك الله دائما ضيف كريم وأخ عزيز
ولا تبطي علينا ترى نفقدك
الخمسين راحت يا الحبيب
الخمسين راحت مثل شرب الحليب
ضاعت بين الفتوى والمجلس بالبريد
وكل من يقول عندي التأخبر وأزيد
واحنا ناطرينها تدل الطريج
حق مخبات المقهور وامثاله في الفريج
بس ما اعتقد ان الحل جريب
لاني اشوفها كانها طاحت بجليب
ماني متفائل ولاني شايف بديل
لان باجر راح ايي التاخير من وزير جديد
ما اقول الا لا تنطر هالفلسين
وشوف شغلك احسن وجابل الشباب الحلوين
حياك الله يالحلو وأقولك
الخمسين بإذن الله ياييه
لاتحاتي يالمقهور يايه الخمسين
وإذا غرقت بينقذها لك دلفين
إتييك باجر إذا ماياتك الحين
والأثر الرجعي يزيد يصير الفين
وبتستانس انت وربعك المقهورين
وسلامتك
ومسرع ما فقدناك