T7l6m

كنا إذا تمشينا على كورنيش النيل ,أكيد بمصر,وشفنا واحد قاعد يسولف ويا وحده على الكراسي يقول واحد من الشياب بصوته الخشن “لا يقصّ عليج” .
المقصه طبعا لا تقتصر على بعض الحبّيبه أو المغازلجيه,وفيه ناس وايد كلكجيه.ومع الأسف عندنا بالكويت مصادر الكلك والجمبزة متعدده ومتنوعه.ولازم ما ناخذ كل الكلام إللي نسمعه أو نقراه إنه قرآن منزل أو حقيقة لا جدال فيها.أنا ما أطالبكم تجذّبون كل شي تسمعونه أو تقرونه لكن أقول دققوا ولا تصيرون “أُذن”*.

يعني لا يقصون عليكم الحكومه والمجلس ويقولون إنهم يحترمون الدستور.
ولا تقص عليكم الجرايد لأن كل صاحب جريده عنده “ليلى” وقاعد يغني عليها.
ولا تقص عليكم البلديه والصحه إن أكلنا مو مسمم أو منتهيه صلاحيته.
ولا تقص عليكم وزارة الكهرباء والماء أن الماي “شغل عدل” ومو ملوث أو فيه مواد مضره.
ولا يقص عليكم واحد يقول إنه إقتصادي ويقول حافظوا على المال العام ويخرّعنا إن الأجيال القادمه بتعيش بفقر إذا زادت المعاشات أو إذا عطتنا الدوله شي,هذا جمبازي يبي مصلحة ربعه.
ولا يقصون عليكم التجار إنهم يبون مصلحتكم ويحافظون على الأسعار أو إنهم يبنون الإقتصاد الوطني ترى مايبنون إلا مجمعات من جيسكم.
ولا تقص عليكم الحكومه وتقول لكم تنميه لأنها ماتدرين وين هوا دارها.
ولا يقصون عليكم الإيرانيين بسالفة متشددين وإصلاحيين كلهم مثل مثل والموضوع توزيع أدوار.
ولا تقص عليكم وزارة التربية إنها تدرّس عيالنا ترى الأبلات لاهين بالموضه والإستاديه بالآي فون.
ولا تقص عليكم الداخليه مشكلة المرور ماراح تنحل لأن الشرطه مايشتغلون والواسطه شغاله.
ولا يقصون عليكم إنهم بيحاربون الفساد لأنه رفيجهم,ولا الواسطه لأنها صاحبتهم.
ولا يقصون عليكم بسالفة الشفافيه لأنهم مايعرفونها أصلا ولا يفهمون معنى الكلمه.
ولا يقصون عليكم إنهم بياخذون منكم ضرايب لأنهم مايقدرون ياخذون من إللي عنده فلوس.
ولا يقصون عليكم ويقولون إن النفط بيخلص ولا تصرفون.صح النفط يبي إيي يوم ويخلص لكن قبل لا يخلص, البرميل راح يوصل 300 دولار أو أكثر وأحلق شنبي إذا كلامي طلع غلط.
ولا يقصون عليكم بالكلام الحلو مثل صحافة حره,إنتخابات نزيهه,إعلام محايد,مؤسسات دستوريه,خطط تنمويه,وحده وطنيه,مؤسسات إقتصاديه وطنيه,نظم و لوائح وقوانين,رفع مستوى وتحسين أداء,تطوير العمل,رقابة ومتابعه,الكفاءة.
كل هالكلام ماخوذ خيره والجيله منه بخمسين فلس.(مايمشي عندي ولا يدش المخ)
أنا ما أقول تشأموا لكن أقول دققوا بالكلام علشان الحكومه والمجلس والجرايد والتجار والوزارات والمسؤولين يحسبون حسابهم أن إللي يكلمونه يفتهم وما يحاولون يطيّرون علينا صواريخ.

*أُذن:أنظر المعنى القرآني للكلمة.