Statuses

لا يقصّون عليكم

In أخلاقيات, إقتصاد on 23/05/2011 by t7l6m

كنا إذا تمشينا على كورنيش النيل ,أكيد بمصر,وشفنا واحد قاعد يسولف ويا وحده على الكراسي يقول واحد من الشياب بصوته الخشن “لا يقصّ عليج” .
المقصه طبعا لا تقتصر على بعض الحبّيبه أو المغازلجيه,وفيه ناس وايد كلكجيه.ومع الأسف عندنا بالكويت مصادر الكلك والجمبزة متعدده ومتنوعه.ولازم ما ناخذ كل الكلام إللي نسمعه أو نقراه إنه قرآن منزل أو حقيقة لا جدال فيها.أنا ما أطالبكم تجذّبون كل شي تسمعونه أو تقرونه لكن أقول دققوا ولا تصيرون “أُذن”*.

يعني لا يقصون عليكم الحكومه والمجلس ويقولون إنهم يحترمون الدستور.
ولا تقص عليكم الجرايد لأن كل صاحب جريده عنده “ليلى” وقاعد يغني عليها.
ولا تقص عليكم البلديه والصحه إن أكلنا مو مسمم أو منتهيه صلاحيته.
ولا تقص عليكم وزارة الكهرباء والماء أن الماي “شغل عدل” ومو ملوث أو فيه مواد مضره.
ولا يقص عليكم واحد يقول إنه إقتصادي ويقول حافظوا على المال العام ويخرّعنا إن الأجيال القادمه بتعيش بفقر إذا زادت المعاشات أو إذا عطتنا الدوله شي,هذا جمبازي يبي مصلحة ربعه.
ولا يقصون عليكم التجار إنهم يبون مصلحتكم ويحافظون على الأسعار أو إنهم يبنون الإقتصاد الوطني ترى مايبنون إلا مجمعات من جيسكم.
ولا تقص عليكم الحكومه وتقول لكم تنميه لأنها ماتدرين وين هوا دارها.
ولا يقصون عليكم الإيرانيين بسالفة متشددين وإصلاحيين كلهم مثل مثل والموضوع توزيع أدوار.
ولا تقص عليكم وزارة التربية إنها تدرّس عيالنا ترى الأبلات لاهين بالموضه والإستاديه بالآي فون.
ولا تقص عليكم الداخليه مشكلة المرور ماراح تنحل لأن الشرطه مايشتغلون والواسطه شغاله.
ولا يقصون عليكم إنهم بيحاربون الفساد لأنه رفيجهم,ولا الواسطه لأنها صاحبتهم.
ولا يقصون عليكم بسالفة الشفافيه لأنهم مايعرفونها أصلا ولا يفهمون معنى الكلمه.
ولا يقصون عليكم إنهم بياخذون منكم ضرايب لأنهم مايقدرون ياخذون من إللي عنده فلوس.
ولا يقصون عليكم ويقولون إن النفط بيخلص ولا تصرفون.صح النفط يبي إيي يوم ويخلص لكن قبل لا يخلص, البرميل راح يوصل 300 دولار أو أكثر وأحلق شنبي إذا كلامي طلع غلط.
ولا يقصون عليكم بالكلام الحلو مثل صحافة حره,إنتخابات نزيهه,إعلام محايد,مؤسسات دستوريه,خطط تنمويه,وحده وطنيه,مؤسسات إقتصاديه وطنيه,نظم و لوائح وقوانين,رفع مستوى وتحسين أداء,تطوير العمل,رقابة ومتابعه,الكفاءة.
كل هالكلام ماخوذ خيره والجيله منه بخمسين فلس.(مايمشي عندي ولا يدش المخ)
أنا ما أقول تشأموا لكن أقول دققوا بالكلام علشان الحكومه والمجلس والجرايد والتجار والوزارات والمسؤولين يحسبون حسابهم أن إللي يكلمونه يفتهم وما يحاولون يطيّرون علينا صواريخ.

*أُذن:أنظر المعنى القرآني للكلمة.

Advertisements

4 تعليقات to “لا يقصّون عليكم”

  1. ندري وكلامك كله بمحله ..ومو قاصيين علينا..ولا راح يقصون علينا
    بس وبعدين..؟؟
    إذا مانحاسب صاحب القرار مانقدر نسوي شي
    وإحنا صرنا مثل راعي الحلال..اللي موكل عياله على حلاله وكل واحد يقول الثاني باق أكثر..يعني مو ناكرين إنهم باقوا بس مختلفين عالكميه..
    الله كريم..الله كريم
    لابد مايتغير الحال بإذن الله..
    وللأفضل بإذن الواحد الأحد
    بس لازم نقوي عندنا إستشعار الخوف من الله وإن الدنيا فااااااانيه

    طولت واسترسلت..
    ومنك العذر

    • لازم نحاسب وننكر الغلط وهذا أقل شي نسويه
      قاعدين نكتب علشان نغير بإيدنا ونتكلم علشان نغير بلسانا
      وبإذن الله الحال بيتغير للأفضل
      ولو كل واحد خاف من الله تصير الكويت جنه
      حياج الله أختي وبالعكس كلامج كله فايده وراي طيب
      عسى الله يصلح حالنا ويحفظ بلدنا

  2. لا يقصون عليك يا المسكين
    ويقولولك راحت الخمسين
    راح تيي بالشمال او باليمين
    ومعاها الاثر الرجعي الزين
    قالو الميزانية ما تعين
    لكن نقول الارزاق من رب العالمين
    النفط مشلع لي الاميه والعشرين
    علشان ما يكون حجه للمتحججين
    عطوا الناس والله يعين
    ولا تبخلون على الفقير المسكين
    الناس بتروح تسافر الصين
    ولا توقفون بطريج الي يبنون
    وادعوا الله يهدى المسئولين
    ولا يوقفون بويه المحتاجين

    • إللي يوقف الخمسين عند الناس ملعون
      وآنا أسميهم إللي يمنعون الماعون
      إن شالله بتقبضها ياحلو يامزيون
      وبتكحل بالأثر الرجعي العيون
      وخلك من الجعوص على الرد مايقدرون
      أقول لهم غسلوا إيدكم بماي وصابون
      وبإذن الله الخمسين يايه لو ماترضون
      والله يعينك ويعين كل إللي يبنون

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: