Statuses

السّرج والبقر

In أخلاقيات, إقتصاد, النفط و الطاقه on 17/05/2011 by t7l6m مصنف: ,

أشياء وايد تحسّ إنها ما تكمل إلا إذا صار شي ثاني معاها أو ما منها فايده إذا مو معاها هالشي .و هذي الأشياء ممكن تكون ماديه أو معنويه وعندنا وايد أمثله,وأكيد عندكم أمثله أكثر عنها.
الموضوع عن الأشياء إللي مو شيّ تصير مع بعض.
والأوليين قالوا”يا شين السرج عالبقر”
شالفايده من:
-بورش أو لامبورغيني والسرعه 120.
-النفنوف حلو والجسم دب (أو فيل).
-الكلام حلو والقلب جقّل.
-الجمال ,والأخلاق تعبانه.
-السياره كشخه وراعيها 24 ساعه يشكي من الديون والأقساط.
-الخط حلو والكلام المكتوب متروس غلطات إملائيه.
-الدوانيه متروسه,واحد يطالع التلفزيون ,إثنين يسولفون و20 لاهين بالآيفون.
-الدوريه واقفه وشابه ليتاتها الحمره والزرقه,والسيارات يمرّون جدامها بتوينات وسرعه .
-المداليه ب100 دينار والسياره أقدم من سيارتي.
-الجنطه ماركه بألف دينار ومافيها ربع دينار.
-الكاونتر متروس موظفين ومحد منهم يمشّي مراجع.
-البيت دورين وسرداب وأهله:الزوج والزوجه وياهل واحد.
-التيلفون غالي وراعيه يطر دينار ونص حق كرت تعبئه.
-مدرسين خصوصيين والشهاده على الحفّه.
-سياحه شهر بأمريكا وأوروبا وطول السنه ماكل تبن من أقساط قرض السفره.
-مدارس كشخه والمدرسين مالهم خلق والطلبه كشته والوزاره نايمه.
-السياره نظيفه وراعيها وصخ ويوصخ الشارع بزبالته.
-الزواج والريل ما ياز عن المغازل.
-علامة ممنوع الوقوف والسيارات واقفه يمها .ومخصص للمعاقين ويسفط فيه واحد يراكض.
-شركات بالبورصه ما توزع أرباح أو تخسر وتقول للمساهمين إنقذونا.
-النفط سعره فوق 100 دولار وعندنا مسؤولين جعوص.
-تشرب دايت مع الوجبه وتحلّي بكنافه(أنا واحد منهم).
-الذرابه ويا الناس والزغاله والقلب الجاسي مع الخدم والفراريش.
-خطة التنميه وماكو خطة تمويل لها.
-البنك المركزي والبنوك لاعبين لعب بالناس وبالقانون.
-النقاب واللي مبين من الويه متروس مكياج.والحجاب وتحته قوطي بزاليا والهدوم كاسيات عاريات.
-المنصب وراعيّه قوطي أو دنبك.
-الخطط بدون تنفيذ.
-الرياضه بدون نتايج.
-الديوقراطيه بدون وعي .
-الإعلام بدون مسؤوليه.
-لحيه بدون خوف من الله.
-أسلوب حلو ومضمون ماكو.
-البلاليط بدون بيض(والكلام لأحد الجيران).
أدري الموضوع طويل وطوّلت شوي بس بختمها بسؤال:
شالفايده من برنامج حواري سياسي كويتي والمذيع لبناني.
وربما تكون لنا عودة أخرى مع الموضوع.

Advertisements

8 تعليقات to “السّرج والبقر”

  1. مششكور خي علي الموضوع
    برغم طولة لكنة مفيد
    تحياتي اختك في الله بتول

  2. موضوع خطير عجيييب
    بسيط لكن رسالته قوية
    إبداااع حقيقي
    موفق^_^

  3. عسى ما شر
    صار لك جم يوم مو مبين
    ان شاء الله يكون المانع خير
    الله يحفظك

    • هلا وغلا
      الحمدلله ماشر بس شويه إنشغلت
      الله يسلمك ويحفظك
      مشكور على السؤال
      وتوني نزلت موضوع طلعت فيه شويه من المغثه اللي تحرق الأعصاب بس عاد طولوا بالكم على
      حياك الله يا أحلى صديق سفر
      ونورتنا بطلّتك الحلوه علينا

  4. هذا المثل ينطبق على الي مغتر وداق الثقل وسيارته اخر موديل وقازلك على الحب يطلطل بالسيايير يدورله على بنت @@

    • أكيد ينطبق المثل على هالأشكال
      لا ولاحظ بعض أهل السياكل يحوس بين السيارات ويسوي scan حق أهل السيايير
      حياك الله
      أسعدتنا زيارتكم ومشاركتكم “التحلطميه”
      وإن شالله الموضوع اليديد ,وإن كان شويه مزعج,يعجبكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: