Statuses

ملّا بس بالشكل

In أخلاقيات on 16/05/2011 by t7l6m

الناس أشكال وأجناس والأشكال خدّاعه.يعني تشوف وحده مو محجبه ومستوره أكثر من بعض المحجبات,وتشوف واحد دشداشته تسحب بالقاع ولاطّ اللحيه والشنب أبرك من بعض الملتحين.
اليوم سالفتنا عن الملالوه الممثلين وعندي نماذج واقعية الله يحاسبني عليها.
الأول,واحد ملتحي طلع من المسجد عقب الصلاة ,ركب سيارته ومشى عكس السير في الموقف علشان يوفر 40 متر وخمس ثواني.
يا أخي مو من السنه إعطاء الطريق حقه؟ليش ما تعطيه حقه.
الثاني إمام في مصلى الوزاره.خلص من الصلاة والناس إللي تأخروا قاعدين يصلون وفي ناس تقرأ قرآن والأخ قاعد يتكلم بالتيلفون بصوت يزعج الناس.
بذمكتكم الأخ وين والإمامه وين.بعدين الرسول عليه الصلاة والسلام نهى عن تعلية الصوت عند قراءة القرآن لكي لايزعج القاريء الآخرين فما بالكم بسوالف التيلفون.
الثالث جايد شوي,لا والله وايد.كنت موقف سيارتي بعيد وأمشي في مواقف الجمعية المتروسه وأشوف إثنين ملالوه يسولفون بصوت عالي .
وآنا متجه ناحيتهم سمعت واحد يقول “ذاك اليوم راد البيت يايب أغراض وطلعتلي السيلانيه “مريت يمهم وسلمت ردوا السلام وكمّل الأخ سالفته”ومالي خلق مادري شقالت لي جان أعطيها طراق”.
صراحه ما قدرت أمسك نفسي إلتفت عليهم وقلت “إتقي الله,إتقي الله”.
يالله ,الأخ وين والديانه واللحيه وين.أولا ما رفق بالقوارير مثل ماوصى الرسول عليه الصلاة والسلام,ثانيا ما تحمل مسؤولية فرد من رعيته,ثالثا يوم الله بلاه ما إستتر وتفاخر بظلمه.
الأخ الرابع مجرم أصلي.الأخ لحيته لي سرّه ومشهور بضرب الخدم إللي يشتغلون عنده.مره حارس أو صّبي إنحاش منه وراح حق معزب ثاني.كلمه الريال وقالّه الصّبي عندي وآنا أبي أكفله وبعطيك إللي تامر فيه.رد عليه الملا وقاله ماعندي مانع شرط تييبه وياك علشان أوقع التنازل.قالّه الريال مافي داعي أييبه,ولزّم الملا “شرطي علشان أتنازل تييبه وياك”.ياب الكفيل اليديد الصّبي وأول ماشافه الملا تولّاه طراقات وفناجر,وعقبها وقّع الأوراق.
بذمتكم هالأشكال التعبانه والنماين القبيحه مو عار عليها اللحيه وتوصخ سمعة الملتحين إللي يخافون من الله.
ياجماعه اللحيه سنه وقبل لاتتبع السنه في هذي الجزئية إتبع السنه بالأخلاق والتعامل والسلوك.
وتذكر إن الرسول عليه الصلاة والسلام قال”إنما جئت لأتمم مكارم الأخلاق”
فرجاءاً لكل من يريد تربية اللحيه :أما إنك تكون قدها ولا بلاها.

Advertisements

6 تعليقات to “ملّا بس بالشكل”

  1. بلاها و بلاه هو بكبرة …

    تكلمت عن فئة ما أحبها حسبالهم لي ربوا اللحية بتزيدهم سماحة ما يدرون إن ويههم ودر باللحية و بدونها و مبينه أفعالهم عليه …
    تدري إلي ينرفزوني لي نادوا هني بوذي و لا هندوسي محمد شنو يقهروني اسم الرسول عليه أفضل الصلاة و السلام تستخدمونه بهذه الطريقة … ليش ؟!!؟ شنو المنطق ..

    مشكور تحلطم على البوست و سوري على تعليقي أمس إذا ضيق خلقك ..

    و سوري تعليقك في المدونة عندي انمسح مع تعليق ثاني بسبب عطل في البلوج بس أنا راح ارد عليك لآن عندي نسخه منه 🙂

    مشكوور وايد

    • مع الأسف بعض من يربي لحيته تظاهرا ورياءا وربما كسلا يعطي صورة سيئة عن المتدينين اللي يخافون الله
      وسالفة الأسم أنا محتار بعد شمعنى محمد
      وعلى فكره يقولون إن بالمغرب ينادون إللي مايعرفون إسمه”سيدي علي” فالظاهر تقليد
      زين ليش مايقولون يا مناحي بدال محمد
      الشكر لكم على المشاركة
      والتعليق ماضيق خلقي ومافي داعي لأي إعتذار على التعليق لأنه رايكم وإللي أحترمه وأقدره
      وهمّ مافي داعي للسوري عن مسح التعليق
      حياج الله أختي دايما تنورين مدونتنا بالمشاركات الطيبه

  2. موضوع شيق شكرن 🙂

  3. صبحك الله بالحير يا تحلطم

    اي والله صاج مو كل من حطله لحيه و قصر الدشداشه صار مطوع و في منهم تشوفه بالسوقه بس يخز و يطالع الحريم في المحلات
    و يدخل مع زوجته محل ملابس نسائيه الخاصه صراحه قمه بقلت الادب و الإحراج
    و في بعد إلي يلحق البنات في مواقف السيارات و الله حفظهم بوجود رجل الامن اهو واحد حاطينه على كل المواقف مادري اخطبوط مو آدمي لازم يزيدونهم صراحه مواقف المجمعات خطره و تخرع كل مافيها احد الله يحفظنه انشالله
    اقولك هذيل ماخذين الشكل و التدين عشان يكسبون احترام الناس او ستر عليهم
    مثل بعض بنات الجامعه تشوفهم يدخلون سفور ويطلعون بعبايه و نقاب مايبين منهم شي و تصعد مع واحد بالسياره بكل ثقه و لا من شاف ولا من دري على قولت اخوانه المصريين مسكينه تراعي سمعتها بين الناس و ما خافت من ربهاإلي ساترها برحمته
    هذيل البنات ماخذين النقاب ستر و خربوا على سمعت المنقبات والله شوف عيني في السوق وحده عجوز قاعده ناطره ولدها على ما يجيب السياره جان يجي واحد و يطق لها هرن و يفتح باب السياره عشان تصعد معاه و اهي مره كبيره مالها بهالسوالف بس شتقول شنو تدعي على من أخذ شرع الله ستر على بلاويهم الله عليهم انشالله
    تدري عن فتوةالشيخ محمد بن صالح العثيمين قال في النقاب : ( في وقتنا هذا لا نفتي بجوازه، بل نرى منعه، وذلك لأنه ذريعة إلى التوسع فيما لا يجوز,وأن على المرأة أن تتقي ربها في هذا الأمر، وألا تتنقب؟ لأن ذلك يفتح باب شر لا يمكن إغلاقه فيما بعد ) ( … الشيء إذا كان مباحا ويوصل إلى محذور شرعي فإن الحكمة تقتضي منعه، وهذه قاعدة معروفة عند أهل العلم؟ فالشيء المباح: إذا كان وسيلة أو ذريعة إلى شيء محرم صار ممنوعا ).
    يعني حرم النقاب عشان المفهوم الماشي على البنات المتنقبات

    الله يهدي كل المسلمين و يثبتنا على دينه مثل ما يحب و يرضي ربي
    دايم ردد هذا الدعاء ( اللهم يا مقلب القلوب ثبت قلبي على دينك )

    و مشكور على الموضوع و جزاك الله الجنه يا تحلطم و كل المسلمين

    • صبحج الله بالخير أختي
      وجزاكم الله خير على الدعاء وعسى الله يهدى جميع المسلمين ويحفظهم ويثبتنا وياهم على طاعته
      صراحه أول مره أسمع عن فتوى النقاب ومع الأسف وصل الحال إلى أن الستر يصبح ذريعة لأشياء أخرى
      مع الأسف ناس تتخذ الديانه والتدين بالشكل ويسيؤن لسمعة الناس المتدينه إللي تخاف ربها

      حياج الله أختي والشكر لكم على المشاركة المميزه والكلام النافع والدعاء
      اللهم إجعلنا وإياكم ومن نحب من أهل الجنة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: