أعتقد العنوان واضح بمعنى سوالفنا اليوم منوعه من كل قطر أغنيه ,ومن كل بستان ورده, ومن كل صينيه لقمه,ومن كل قلاص جقمه.
-الدكاتره وما أدراك مالدكاتره:سأخيب ظنونكم ولن أتكلم عن الأخطاء الطبيه أو على وزارة الصحة ولا حتى عن المرضى المليقين والتافهين والمزعجين والدلوعين.موضوعي عن الوصفة الطبيه.
أمس رحت الصيدليه عندي وصفه دوا حق ولدي(الحمدلله سهالات حساسيه فقط) وقلت حق الصيدلي إن شالله تفهم الخط الهيروغليفي إبتسم وقالي واضح :حبوب مادري شسماهم وبخاخ.ياب الدوا وتوهق بالبخاخ مايدري إستعماله جم مره .قال”مو واضح كم مره الإستعمال بس إستعمله مره وحده” إستعان بصديق (صيدلي شايب) وماتوصلوا للجواب الدقيق.
المضحك بالموضوع أن الدكتور كاتب إسم الولد بخط ماشالله وايد حلو يعني ناقشه نقش.الحين الله يهديك دكتور ليش ماتكتب أسم الدوا عدل ,وعلى فكره هذي ظاهره طبيه عالميه.أنا ماعرف السر بس يمكن يستحي يكتب إسم الدوا ويغلط بالإملاء(spelling) .
-أمس على خط فحيحيل أطالع السيايير إللي يايه بالمنظره ولا السيايير منهدّه صوبي ويايين مسرعين,وأنا بالنص بينهم(ماعندي سالفه).قبل لأ ألوم نفسي شفت العداد ولا سرعتي 120 حسيت لحظتها إني ما أساير الزمن.
-أكو إعلان بالشوارع عن جريدة الجريده مكتوب فيه ,بمامعناه,”الجريده الأولى في النمو” طبعا ما أشكك في مصداقية وصدق المعلومه لكن أضرب لكم مثال.نفترض أن كل الجرايد توزيعها 10 ألاف نسخه ونسبة نموها 20% والجريده كانت توزع 1000 نسخه يوميا العام ,إذا باعت السنه 2000 نسخه يوميا نسبة نموها يصير 100% .
القصد من الموضوع إنك تقدر تلوي الكلام لمصلحتك.مثال ثاني,بعد تسرب الإشعاعات بالمفاعل الياباني بعد التسونامي قالوا إن معدل الإشعاع يفوق المستويات المقبوله بثلاثة آلاف مره,تدرون شكثر تساوي؟300000% نعم ثلاثمائة الف بالمئه.
وإن شالله في بوست آخر سنفضح سوالف الإقتصاديين,وجمبزتهم.
– في ناس عندهم رساله في الحياة ,وفي ناس عندهم missed call
-في بخيل سأل زوجته تبين فلوس ولا تيلفوني اليديد ?
الزوجه (تدري ماورى الزوج إلا دينار وأقل): ابي تيلفونك اليديد
الزوج:تسعه خمسه ثلاثه………
-بن لادن ذبحوه وقلنا خلصنا من سالفة الإرهاب وتمرمط الناس على الفيز وفي المطارات.وكان الجواب الأوبامي سريعا ان بن لادن قُتل ولكن القاعدة مازالت تعمل.يعني لاطبنا ولا غدا الشر ,وراح تظلون إرهابيين ياعرب ويامسلمين.المضحك في الموضوع أن المبنى الفخم المحصن في الحي الفخم إللي منخش فيه بن لادن “كلفته مع تحصيناته مليون دولار”يعني أرخص من بيت 400 متر بجنوب السره.good damn ويبون يرفعون قرض البنيان علشان ترتفع كل الأسعار يبتلش المواطن ويستفيدون التجار.
-الشيء بالشيء يُذكر,تجارنا ,والعياذ بالله,يستغلون أي فرصه لزيادة الأسعار ويجدون المبرر بأي تغير محلى أو إقليمي أو دولي سياسيا كان أو إقتصاديا.ويستثمرون إرتفاع أسعار المواد الأوليه,وتغير أسعار العمله(اليورو إرتفع ولا الدولار طاح وهكذا) لزيادة الأسعار.لكن أن تصل بهم الجمبزة والخيال الواسع لإستغلال الكوارث الطبيعيه فهذا ما لم أتوقعه.
تجارنا قرروا يرفعون أسعار التواير تدرون ليش ؟قالوا بسبة تسونامي اليابان.قلنا التواير تستوردها الكويت من كل العالم بشقيه المتقدم والمتخلف.من أمريكا وألمانيا وكوريا والبرازيل وأندونيسيا والصين,شمعنى كل الأسعار ترتفع.
قالوا التجار,لأن المواد الخام تستورده كل مصانع العالم من اليابان.
العياره والجمبزه شلون صايره؟حمره ولا خضره.
T7l6m 
في ناس عندهم رساله في الحياة ,وفي ناس عندهم missed call
حكمه … تحلطمك اليوم حكمة
عساك على القوة
الله يقويج أختي
وهم طلع البوست تحلطم؟
ترى مو قصدي أتحلطم
حياج الله ودايما منورتنا
مساك الله بالخير
والنوير
بيني وبينك…انا عندي عقدة بموضوع الخط..لما اييني تحويل من دكتور ثاني والله اتيني البجوة..وتلقاني اسأل السسترات الهنود يترجمون لي الخط…
اللهم لك الحمد خطي كبيــــــــــــــــــــر مقاس 20 🙂 بالخطوط
و واضح والكلمات واضحة ومبينه وعدد الجرعات واضح…والأهم من ذلك لازم احط سمايل فيس
اخر الورقة والا شكرا من القلب..والا يعطيكم العافيه ههاهاهاههاهاه …
مرات يا اخوي ياتحلطم أحس اني غلط بوزراة الصحة..يعني مر عليك دكتور كوميدي:)؟؟ وكل هذا من العقدة الي حاشتني من بعض الدكاترة الله يهداهم وخطوطهم….
حكمة المس كول…بيني وبينك…في ناس مو مسد كول …ألا اوت او كوفيرج ايرياه:)
وعلى السرعه.ياخوووك ماعليك منهم توني ناقه 600 دينار مخالفات سرعه
وحياتك صرت ماعدي ال 80 أقول حق امي الحكومه أدبتني ههاهاهاهاه…
مساء الحكم…والملاحظات الجميلة…
وقرقيعانو قرقيعاااااان:)))
صباح النور دكتوره
وعلى فكره طبيت بالمرضى في البوست بعد معلوماتكم في التعليق السابق
أشوه إن عضو في الهيئة الطبية الكويتيه يدعم كلامي عن خطوط الأطباء وكنت أتمنى إجابة على اللغز وليس التأييد فقط
وبالعكس دكتوره لازم تحسين أن الوزاره غلط وإنتي الصح
والحكمه كنت أساسا كاتبها “في ناس عندهم رساله في الحياة,وناس عندهم whats up بس غيرتها
لكن بكل أمانه صياغتكم للحكمه أكثر بلاغة وتأثيرا وواقعية
لا توصيني على السرعه أنا ريال ملتزم(وأدري بمواقع الكاميرات)
حياج الله دكتوره وشكرا للمرور والمشاركة الإيجابيه
مساك الله بالخير..
يصير أعلق مرّة ثانيه؟؟
والا عليها رسوم:)
اذا رسوم رمزيه كان بها…وان ماكانش..:) تستاهلون..
المهم..أقولك حل اللغز من منظوري الشخصي..وتجربتي المهنيه..
وبصراحه فكرت فيها وايد..وتوصلت لهالشي..وعلى شان لا أظلم وانظلم
انا بقول ال 4 احتمالات الي اتفسر هالظاهر الغير صحيه
التفسير الأول:
وللأمانه…العيله…
والسرعه…و عدد المرضى الكبير..والانتظار الي بره..كله يخلي الدكتور
مستعيل ومصرقع ويالله يكتب أول حرفين ويخطلك خط شطوله عقبها…وبصراحه انا
ما اقدر اقط اللوم على احد اهني…
لأن ضيق الوقت وعدد المرضى وجذي..للأمانه هالشي ماله حل..
يعني مانقدر انقول للمرضى لاتمرضون مثلا!!! ومانقدر انزيد اليوم ساعتين فوق
ال 24 ساعه..فربي يعين…
التفسير الثاني واللي يغلب الأول
انه الدكتور نفسه مو عارف اسم الدوا….
فيكتب خط هيروغلفي…فيه من ريحة الإسم الصجي..
وهذي حصلت مره جدامي صراحه وشخلت الدكتور مع انه اكبر مني…
يعني سألته مالك خلق تفتح كتاب يمك وتأكد من اسمه
ياخي اكتب الاسم العلمي وخلاص مو لازم الماركه يعني!!!
واذا اسم المرض او الحاله مو متاكد منها اسأل ترا مو عيب..
حتى لو انا اصغر منك ممكن اكون اعرف..مكن اسأل..استغفر الله
تمر عليك نماين بحياتك اتضيق خلقك…المهم
التفسير الثالث
لعانه!! اي نعم..لعانه..
يتلعين مع الصيدلاني..والا الدكاتره الي بعده…يعني..من الآخر
لعانه!! مالها اي تفسير أنظف او ارقى من معنى الكلمة!
🙂
التفسير الرابع
دكتور ماله خلق!
تلقاه مو نايم عدل..نايم عدل ومثقل ريوق..مادري
بس ماله خلق يكتب مثل الناس…
يعني من هالنمونة وايد ترا…
يكتب اول 3 حروف والباجي جبال وتلال صغيره يم بعض جنّه الأخ موقع!!!
اي شمشكلتك اكتب مثل الناس!! ماعنده رد!!!!
ياخوي الشق عود وماكو فايده:) وانا على هالطاري راح اصورلك عينات
بس أبي أيمع أكبر عدد على شان لأ أنجك:)
وراح اوريط الفرق بين خطي وخط بعض دكاترة جيلي…السلبي اولايجابي
سامحنى عالهذره بس قلبي متروسه 🙂
أولا شكرا دكتوره على التفاعل وكنت أنتظر أن يشهد شاهد من أهلها
وعليه فإن التعليق مجاني،أما بعد:
شخصيا ،وبناءا على الحالة المذكورة في البوست ،لا أميل إلى الإحتمال الأول لأن الدكتور كان مو مستعيل ومافي مرضى(عياده خاصه)
والإحتمال الرابع أستبعده لأن الدكتور كان بمزاج رايق وقعد يسولف بعد الفحص وينصح الولد بأشياء إضافية لتخفيف الحساسيه
فبالتالي إما لعانه أو مو عارف اسم الدوا
حياج الله دكتوره وشكرا على التوضيح