T7l6m

ماودي ألوّع جبودكم بالسياسه في أول يوم عمل,أدري الواحد مو ناقص لكن بط جبدي المدعو حسن فيروزي آبادي رئيس أركان جمهوري إيراني بكلامه الإستفزازي والعدواني.الأخ,خوى ينبه,غلط على قادة الخليج ووصفهم ب”بقايا الأنظمة الديكتاتورية العربية في دول الخليج”.ياريت بس يا بن فيروزي جباتي توضح لنا إنت منو علشان تغلط على جيرانك,ثانيا من زين ديموقراطيتكم إللّي حضرتك تتكلم عن الديكتاتوريات,نسينا ماكلينا.إيران ديكتاتوريه كبرى بتمثيلية إنتخابيه,وحتى منصب الرئاسه اللي شلتوا وشدختوا فيه وطلعت مظاهرات ضد نجاد والإتهامات بتزوير نتائج الإنتخابات طلع رئيس الجمهوريه مسكين مايقدر يسوي شي وبالمفهوم الدارج”طرطنقي”.
نجاد “فنّش” وزير الإستخبارات وقال خامنئي لنجاد إستريح مو بكفيك تفنّش الريال هذا معمم وحبيبنا شوفلك وزير ثاني تلعب عليه أما هالوزير قاعد “غصبن عليك”.
شسوى نجاد؟ طلع من مقر الإقامة الرسمي للرئيس ,وما قام يحضر الإجتماعات,وطوّف زيارة مقررة لمدينة قُم.
رئيس ما يقدر يعفي وزير من منصبه شنو نسميه؟ وين ديمقراطيتكم يا رئيس الأركان.
فيا ولد فيروزي إسمحلي,ولّا لا تسمح عند يدّي,أقولك قمّ زين وعن الربربه والحجي الفاضي,لا تسولف عن الديموقراطيه ولا عن “صحوة الشعوب”لأن يوم شعبك صحى شوي قطيتوهم بالسجون وطقيتوهم بالشوارع.
الأهم بالموضوع أن الأخ صرح أن “الخليج الفارسي ملك لنا” ونصح قادة دول الخليج العربي “أن تتخلى عن الحكم …وترك شعوبها تقرر مستقبلها بحريه ” منو حضرتك علشان تتكلم بالنيابه عن الشعوب أحد شكى لك الحال وبعدين منو تبي تعين حكام بدالهم تبي تورّد لنا جم واحد من إيران يحكمونا.

شنو أكثر من هالعدوانية والتهديد يحتاجها البعض ممن يدافع عن إيران ويتبنى مواقفها لتغيير تفكيره.
وأقول لبعض الأغبياء ذوو الولاء الكلي أو الجزئي لإيران ألا يكفيكم هذا التصريح.