Articles

المسؤول والبلبول

In إقتصاد, حلمنتيشي on 29/04/2011 by t7l6m

قعدت الصبح رحت “اللد والرمله” تريّقت حمص وفول*
من المطعم رحت سوق الحمام شريت أرنب وبلبول
البلبل ماغرد رحت الحكومه إشتكيت عند مسؤول

ماقصر وعدني يشكّل لجنه تدرس حالة البلبول
قلت له أنا مستعيل وياريت الموضوع مايطُول
قال لا تحاتي إحنا بأسبوع خلصنا من الخيول
سألته شفيهم مايغردون ؟قال لا ماعندهم ذيول

تداولت اللجنه الموضوع وإجتمعت برئاسة المسؤول
وقعدت تفكّر وتسأل الخبراء ليش ما يغرد البلبول
وإستهلكت اللجنه عصير وقهوه ومن الماي بطول

مرّت أشهر خلص الصيف ,طق المطر وسالت سيول
واللجنه شغّاله بالمسؤول والخبراء وأعضاءها الخبُولْ
وكل ما سألت عن المسؤول قالوا باللجنه مشغول

كتبت اللجنه تقريرها, وفيه حيثيّات وإقتراحات وحلول

قالت اللجنه العلّه باطنيه,لازم نعطي البلبل حَلُولْ**
قلت كيفكم حلِّوا بطنه ,بس أبيه يغرد حسب الأصول
قالوا إذا تعرضت حياته للخطر, ترى بالكفاله مو مشمول
قلت مايمشي هالحجي,تذبوحونه تييبون بداله بلبول

قال اللجنه عندها حل ثاني,يطلع لك صوت من الريول
قلت يوز عن الغشمره,شهالحجي! إنت شتقول ؟
ضحك على المسؤول,قالّ ريله تقرقش إذا لبّسته حيُول***

قلت مالت عليك أنت و لجنتك,كلكم خرفان ناقصكم جْفُول

*اللد والرمله:عنده خوش فلافل وحمص بدوار صادق
** حلول:مسهل يخرط البطن
***حيول:حلية تضعها الأنثى برجلها وتصدر خشخشة-

Advertisements

4 تعليقات to “المسؤول والبلبول”

  1. خوش حل للجنه

    عاد تدري صج يبتها ييب ذكرتني بلجنة العلاج بالخارج و قوانينها ..!!

    و قيس عليها باجي اللجان في الدولة ..

    و ذكرتني في دوار بأحد مناطق الكويت المنطقة زحمة طول الوقت شالوا اليوتيرن و سوو دوار بوسط المنطقة وانحلة ازمة الزحمة و صار الشارع ما يوقف بعز ساعات الذروة ماشي ولا أحلى منه اشوي و يقولون لك لا اكتشفوا إن الدوار غلط و ردوا يابوا البناني و هدموا الدوار و ردوا اليوتيرن و الزحمة بكل الأوقات و كل ما تشوف الزحمة تتحسب على اللجنه و إلي اتخذ هالقرار .. ومن فترة سمعت بالرادو ناس يتحلطمون على الدوار في مقابلة مع مسؤول في المرور و قال بيردون الدوار و لي الحين …

    على الأقل لجنتك اطلعت بحل الحيول بس ما قالوا لك الحيول عليك ولا عيلهم و طابع المعاملة من يدفعه …

    تحلطم بوستاتك قاعده اطلع مخزون التحلطم إلي عندي

    ترى خصلة ما احبها هيضتها :\

    و عساك على القوة أخوي

    • الله يقويج أختي الجودي
      ومثل ما يقولون ،سأبدأ من حيث إنتهيتي
      آسف إذا البوستات طلعت مخزونكم التحلطمي
      وبنفس الوقت أعتبر هذا نجاح للبوست أنه تناول موضوع ملًوّع جبود الناس خاصة أنه يتماشى مع أيدولوجية المدونة التحلطمي
      بذمتج ،وعلى المثال اللي قلتيه،سمعي مره طلعت لجنه بشي فيه خير
      اللجان تطبيق عملي لمقولة أكل ومرعى وقلة صنعه
      تلوميني إذا تطنزت على جمبزة اللجان وتنفيع أعضاءها

      تعليقج وارد عليه رفع هرمون التحلطم زياده عندي
      حياج الله وحيالله تعليقاتج

  2. صبحك الله بالخير مع أحلى تغريد طير

    يسلم راسك و ايدك يا تحلطم حلو تحلطمك و كل يوم يحلى اكثر و أكثر
    والله عجبني تحلطمك و اتمنى الكل يقراه و يموتون من الضحك على نفسهم

    البلبل عرفنه حلهم المزعج انزين والخيول شنو بيزرعون لهم استنشن (باروكة شعر)و صار عندهم ذيول (:

    صاج طلعوا المسؤولين خرفان ما يفهمون شي ولا يستعبطون علينا

    عن الرسول صلى الله عليه و سلم : ( ألا فكلكم راع و كلكم مسئول عن رعيته )
    اهم ماكو فايده فيهم حايشنه التخلف و السبه منهم بس ما عليك الله يخليلنا اميرنا راعي الحكمه و يسود النجاح والتقدم لديرتنا والله يطول بعمره و يرزقه الصحه والعافيه و يحفظه من الشرور بجميع انواعها…و احنا مرتاحين في كويتنا دام راسه يشم الهوا
    و الخرفان لهم حل سهل انشالله

    و قال الرسول صلى الله عليه وسلم : ( تفاءلوا بالخير تجدوه )

    الحمدلله على كل حال و كلنا متفائلين و انشالله الخير بقبال يا رب

    • صبحكم الله بالنور والسرور
      الله يسلمج هذا من ذوقكم
      الله يصلح المسؤولين ويخلى شيخنا ويحفظه
      وبأذن الله كل الأمور تتحسن وفعلا لازم ما نتوقف عن التفاؤل
      وقصيدتنا إن شالله في هالإتجاه يمكن يقراها مسؤول ويستحي على ويهه
      حياكم الله أسعدنا مروركم ومشاركتكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: