بداية,أشكر زميلتنا صاحبة القلم المبدع والمدونة الرائعه المليئة بالفكر والأدب“سلة ميوه” على الإطراء ووصفها لشخصنا بأننا “أستاذ ومتحلطم راقي”.
شكرا دكتوره على كلامكم الطيب هذا فقط من ذوقكم وكريم خلقكم.
————————————————————————————————
آخر يوم عمل بالإسبوع و طيف الويك إند يترآى لكم يحتّمان إختيار موضوع خالي من التحلطم,تقريبا.وصباح جميل بدأ بطلّة قمرتي بنيتي على أفشلا مخطط وزير الإسكان والتنمية في حكومة تصريف العاجل(مو الشيطان)من الأمور بتخريب مزاجي وإستفزازي للتعليق على تصريحه بأن الخصخصة هي الوسيلة الوحيدة لزيادة تعيين الكويتيين وكأن تطفيش موظفين الكويتيه ونقلهم للقطاع العام أو إحالتهم للتقاعد تاريخ قديم نسيناه جميعا.
ما علينا,نرجع لجادة الصواب,قصدي المزاج,تخيلوا أشياء جميلة وونيسة في هذا اليوم المبارك :
تخيلوا ماكو حسين القلاف, ولا نواب تأزيميين, أو حكوميين إنبطاحيين ,أو حتى نواب نايمين
تخيلوا ماكو وزراء دايخين وعن وزاراتهم لاهين,وماكو صيحه بين المجلس والحكومه
تخيلوا الجرايد ما تكتب بالمغثه, والمشاكل, والسياسه. وما في كتّاب راي وأنت تصنع رايك بروحك,وأخبار الجرايد كلها فرفشه وسوالف سعيده
تخيلوا ما كو جرايم ,ولا حوادث, ولا بوق ,ولا جمبزة تجار, ولا طرارة فقاره, ولا فساد, ولا تنفيع المقربين
تخيلوا ماكو ناس وصخه ضمير, ولا وصخه فعليا تقط زبالتها بالشوارع
تخيلوا كل رقّيه تشتريها تطلع حمره وحلوه,وتلقى الهمب(المنجا)الهندي والرقي طول السنه
تخيلوا ناكل اللي نبي ونحلي على كيفنا وما نمتن ولا نحاتي تفخة الكرش
تخيلوا ما ننطر المعاش وهو ينطرنا بالحساب طول السنه,كل مانسحب من الحساب ما يخلّص ولا يهددك بالنفاذ
تخيلوا جوّنا شهر 7 العظمى 28 والأمطار خفيفه(وهم ناس راح تصيّف بره.كيفهم),وعندنا نهر
تخيلوا الشوارع مافيها مستهترين, والمجمعات ما فيها مغازلجيه ورياييل تخزّ, ومافيها بنات فصّع (عارية مو كاسيه)
تخيلوا الأخصائي بمدرسة عيالك يتصل علشان يقولك”حبيت أقولك إن عيالك خوش عيال” وما يتصل علشان ولدك مأذي مدرسه ولا متطنّز على مدرس ولا شاق ويه زميله(أو زميلتها)
تخيلوا العيال إمتيازات بدون لبحه ودبجه وراهم علشان يدرسون. وطبعا بدون مدرسين خصوصيين
تخيلوا نداوم على كيفنا ,ونطلع متى ما زهقنا, وشغلك ماشي ,وضميرك ما يأنبك
تخيلوا المدونات مافيها تحلطم ,ولا سياسه, ولا سب نواب أو وزاراء. وبالتأكيد بدون إرحل لرئيس الوزراء(اليمنيين قلدونا)
تخيلوا ماكو جذب ,ولا نفاق ,ولا غرور, ولا تكبّر, ولا طنازه ,ولا فلسفه فاضيه
تخيلوا نلبس هدومنا من نشتريها بدون تقصير أو توسيع وتضييق,يعني من المحل تطلع كبرنا(يا عقد)
تخيلوا نفهم كل اللغات ونتكلمها(مو خوش إقتراح إذا إكتشفنا شكثر البنغاليه والهنود يحشّون فينا)
تخيلوا كل التيلفونات غبيه(send&end) وماكو تيلفونات ذكيه وآي فون ووتس أب وتويتر وفيس بوك
تخيلوا راد البيت ومشتهي مرق لحم وتاكل اللي بخاطرك حتى لو طابخين مجبوس دياي
تخيلوا تمشي بالشارع ماكو زحمه ,وإذا رحت مكان تلقى موقفك جاهز عند الباب بدون نطْره
تخيلوا ما نجامل أحد ولا نِشره على أحد ولا ننقد على أحد ولا ننصح أحد ولا نتحلطم
تخيلوا قنوات الأخبار مافيها حروب ,وإنقلابات ,ومؤامرات ,وحوادث, وكوارث طبيعيه
تخيلوا بورصتنا كل يوم المؤشر أخضر(أدري صعبه بس مايخالف تخيلوا)
تخيلوا كل نكته نسمعها نقدر نقولها حق اليهال,وماكو ولا نكته بدايتها(أكو محشش),ملاقه.
تخيلوا ماكو أمراض, ولا مستشفيات ,ولا عيادات ,ولا مختبرات ,ولا تحاليل ,ولا فحوصات
تخيلوا الباجه بدون كوليسترول والكنافه تصلح لمرضى السكري والباجله ياكلها إللي فيه تكسر بالدم
تخيلوا ما كو وصاخه ولا ملوثات ,ولا زباله ,ولا مخلفات عضويه (نباتيه,حيوانيه,وبشريه)
تخيلوا السيارات والمصانع تسحب ثاني اوكسيد الكربون من الجو وقزوزاتها تطلع لنا أوكسجين
تخيلوا برنا غابات(نخش شوية منه حق عطلة نص السنه)وشوارعنا مزروعه منجا(عاصمة البرازيل بشوارعها زارعين منجا,صج مو غشمره)
تخيلوا ماكو فواتير ماي وكهربا ولا موبيل ولا أقساط. والتموين بلاش طول العمر(مع إضافة الهيل والزعفران وقيمر المراعي)
تخيلوا ماكو إيران ولا إسرائيل,وماكو سنه وشيعه .الناس تعبد الله بدون لا تسّب الناس اللي قبلنا
تخيلوا تدش الجمعيه والعربانه تنترس بروحها بدون لاتقعد تدوّر أغراضك بين الرفوف وتتأكد من المكونات وتاريخ الصلاحيه.
تخيلوا ماعندنا مشاكل بالرياضه ولا بالتعليم ولا بالإقتصاد ولا بالصحه ولا بالسياسه ولا بالسكن ولا عندنا مشاكل إجتماعيه
تخيلوا أردى لاعب عندنا أحسن من “ميسّي” وخريج العلمي أذكى من زويل وآينشتين,وخريج الأدبي شكسبير المقعّد,وسياسيينا إصلاحيين ووزراءنا ممتازين وصحافتنا هادفه وحره ونزيهه,وأعلامنا ما يسوّي فتنه بين الناس
الحين عاد الجد ,تخيلوا لو مايصير ولا شي من إللي قلته,وفوق هذا إحنا بنعمه مليارات البشر يحسدونا عليها وحتى أغنى الشعوب يتمنون النعمه والراحه إللي إحنا فيها.
خلونا نحمد ربنا وندعيه سبحانه أن يديم علينا نعمته ويجعلنا من الشاكرين.
وبالختام إذا ودكم سمعوا أغنية john lennon- imagine
دشّوا بروحكم يوتيوب ودوروها.
T7l6m 
*
تخيلنا يامتحلطم
وبصراحة لو وصلنا هذا الاعجاز
وامتلكناه , لوجدنا بأن هناك نواقص ونتمناها
لأن العالم خطواته سريعة بل يسابقون الزمن
اما نحن
شعوب واقفة وان تحركت , تحركت ببطء
وفرحنا بزحفنا , نحن نامية الى متى ؟
نعتقد بأن الحياة مؤبدة ولاحقين عليها
بئس الأعتقاد والثقة بأن ايامنا طوال
*
*
الحمد لله على حالنا
ولولا المادة والمواد
فنحن ماولنا على طمام المرحوم
نـهمة وخطام وبوم
او عيس لها حادي *
مازلنا نصنع قفاص للبلابل من سعف النخيل
مازل الجندل والباسجيل والبواري اسقف لغرف نومنا
ومازالت البرمة للشرب والجليب للحمام والغسيل .
*
*
ياترى متى يـخلص النفط ؟
متى تحل الطاقة البديلة ويطيح النفط بجبودنا ؟
حتى نرجع سقوط الى الهاوية , بينما العالم في علييّـن
ونحن بالمنحدر سافليـن !!!
*
*
تحلطم ممتن لتحلطمك الهادف
ولست وحدك
لكن تحلطمك بصوت عالي
ونحن سئمنا واكتفينا بضرب كفٍ بكف بلا عبارة .
هيـا نصنع نفكر كيف نصنع بلبل لقفص
حتى نأتي للعالم من فوق ونقول :
ماوصلتوا له بمئات السنين
جئنا به بسنة .
تـخيل لو نصنع بلبل والمدة سنة !!
يقدر الغرب يصنع نـملة ؟
تـخيل دام لا عقوبة على النوايا .
اتمنى البوست القادم تـخيلك يدخل الاماكن السرية
ويكشفها خيال , ونحن لك منا لا نصدقك ولكن نتخيل معك
الف شكر ألك
^
^
^
شايب مزيون
*
حيالله شيخ المزايين ورائد المشجعين
فعلا نحن في جمود لأنه لايوجد حافز للتطوير
إعتمادنا على النفط وسهولة الحصول على كل شيء قتلا دافع التطوير ومبرر التطور
وقتلا الإبداع والتفكير والإبتكار
لكن مثل ما قلت الناس والدنيا تتغير ولابد من مجاراة الزمن
وإذا المسألة تقتصر على العودة للغوص وحياة الفقر سهله وبسيطه
لكن الخوف على ضياع أكبر من الثروه
ضياع الإستقلال والحريه والوطن
الله يحفظ الكويت وأهلها
وما فهمت قصدك بالأماكن السريه وطلبك على راسي لو أدري شنو الأماكن السريه
الشكر ،كل الشكر لك على مرورك وتكريمنا بمشاركتك المميزة والمفيده
حياك الله دوم
هلا
مساك الله بالخير
تحلطم اليوم متغير ما عرفتك مو انته وين خذيتنا بالاحلام الحلوه يعطيك العافيه خوش احلام يقظه
اتوقع كل الاشياء الي قلتها ممكن تصير تدري وين بالجنه بس كل الي تبيه و حتى الملل ما راح تحس فيه
و يا رب يرزقنا الجنه من غير حساب إنشالله
ويارب يدوم علينا راحت البال و الصحه و يحسن
اوضاع كل وزاره و الحمدالله على كل حال
و هابي ويك اند انشالله
مساكم الله بالخير
الله يعافيكم
ودايما توقعوا مفاجأت منا اهم شي عجبكم الموضوع
اللهم آمين يجعلنا جميعا من أهل الجنة
ويديم علينا نعمته لنا في الدنيا والعافية
ويصلحنا أجمعين
وsame 2 u, happy& joyful weekend
إن شالله
صح كلامك احنا بنعمه
شكرا للتعليق
وصلت مباشرة للهدف من الموضوع
حياك الله ياغير معروف
تخيلنا….
بس جذي عفنا هالدنيا..وطمعنا بالجنه
وصاج والله..
حتى لو ماعندنا كل اللي قلته..
إحنا بخير ونعمه
قواك الله
الله يقويج أختي
والله إحنا بخير ونعمه كبيره بس ياريت نحس فيها
ونحمد الله على النعمه
حياج الله أسعدنا مروركم
لا لا بوست اليوم قتااااااااالي
زياده عليه تخيل اتخرج بامتياز و ادش الهندسه P:
و هم تخيل ماكو امتحانات بالدنيا
و تخيل ابوي يرضى ياخذلي الميني كوبر !!
تحلطم خلاص انا دخلت بعالم الخيال .. اودعكم P:
لا تطولين بعالم الخيال الواحد يزوره ساعه ويطلع منه ويرجع للواقع
إن شالله يتحقق لكم كل إللي تتمنينه
حياكم الله وبالتوفيق
وبالإمتياز
مساك الله بالخير والنور والكرامه..
الشكر موصول ودائما ما تتبارك سلتي بطواري الناس الطيبه
———-
والله الخيال حلو…
ومافيه احلى منه..
وربي لك الحمد والشكر على كل النعم
ربي لك الحمد على الصحة والعافيه..
ربي لك الحمد على نعمة الأمن والأمان والاستقرار
ربي لك الحمد على كل نعمك…
تحلطم…قواك الله
مساج الله بالخير والكرامه
الشكر لكم وإحنا اللي تباركنا يوم طريتوا مدونتنا
——————-
الحمد لله على نعمته وفضله علينا
صحه وعافيه ورزق وأمان وإستقرار وراحة بال
اللهم أدم علينا نعمك وإجعلنا من الشاكرين
قواج الله أختي أسعدنا مروركم ومشاركتكم
اتصدق ما قدرت أكمل كفاية أول الموضوع موظفين الكويتيه تدري كمية الكوادر من المهندسين إلي طالبين التحويل للحكومه و بكل بساطه يقولة اسلم على الراتب احسن من اني اشتغل في الشركه و عقب خمس سنوات يقضبوني الباب ولا يقصرون معاشي و انا برقبتي عيال و مسؤوليات و النقل للحكومه بدون أي خطه معلومه للموظفين يعني ما عندهم علم وين بيروحون بيصيرون كتبه في المستوصفات مع احترامي لهذه الفئه ولا بمكاتب كنوع من البطالة المقنعه ؟؟
أكيد محد يقدر يلومه لكن منو الملام لما اضيع مهندسين طيران مثل الورد و مشهود لهم بالمنطقة بالكفاءة .. طبعا غير التخصصات الثانيه .. هذا مثل و البقية مثلهم و يعورون القلب حسافه بس
أما عن التخيلات فما قدرت اكملهم يا أخوي كنت وزعتهم على مقالتين رأفةً فينا ..
اليوم جدامي واحد فج باب سيارة واحنا واقفين بالإشارة و حط جيس المطعم على الأرض و سكر الباب طلعت تلفوني و صورته مكاني استراتيجي و طالعت الصورة قلت ليش جذي شنو هذا ماله وصف بعرف شنو شعورهم لما يسوون جذي
و أهم التخيلات بصراحه إلي حبيتها يصير عندنا نهر وناسه و يكون نظيف عفيه ما يوصخونه نفس البحر و مايكون عندنا بنات فصع ولا بزع لوووووووووول
تسلم أخوي تحلطمت اكثر من البوست
عساك على القوة و سلامي لمدام تحلطم
سالفة الكويتيه أنا أعتبرها جريمه بحق الكويت والموظفين والمؤسسه والإقتصاد
الكلام في خصخصتها متناقض والعمليه مو مدروسه
والوصاخه جزء من قلة الأدب ولازم تصادفين واحد من هالفئة في وطننا المظلوم بهؤلاء
الله يسلمج وبالعكس ماتحلطمتي بما فيه الكفايه
الله يقويج ومدام تحلطم تسلم عليج