الدنيا تراويك العجايب.والناس مْشَكّله،منهم المحترمين ومنهم دون ذلك.
مرات تشوف ناس في مواقف،وتحتار فيهم،وتستغرب شلون يسوون جذي.وأول تقييم لك للشخص،ذكرا أو أنثى،تقول عنه مو محترم ومو متربي وقليل أدب.
من هالناس اللي مو محترمه:
– إللي يخلي مسافه كبيره بين سيارته والسياره إللي جدامه،عند الإشاره، علشان يسولف مع السياره اللي يمه.(بروحك بالشارع؟)
-الأخ السخيف أعلاه إذا كمّل سوالفه والإشاره شبٌت خضره .(إللي وراك مو بشر ؟)
-الموظف أو الموظفه المشغولين باللعب بالتيلفون أو السوالف أو الجرايد أو الأكل والمراجعين في إنتظار جنابهم ومعاليهم .(ترى معاشاتكم علشون تخدمون الناس)
-الحمار إللي يسوق سيكل ،ومن يوصل يمّك ينفخ بنزين علشان يخرّعك لا لسبب آخر.
هديتي له دعاء(مساء الكوابيس,وأحلام تعيسه).
– راعي البنشي إللي أول ما تشبّ الإشاره خضره (ويّل) والسيارات تخفف خايفه عليه,أو منه,ينقلب.يالحبيب إذا تحب تستعمل تايرين بس ,إشتر لك سيكل وخلصنا.
– إللي يلحقون بنيّه وهي مو معطيتهم ويه.أولا تطلعون دعّل وماصخين ولزقات أصليه ماركة “عنزروت”,ثانيا تشكلون خطر على البنيه واللي بالشارع(وإنتو بالطقاق)بمطاردتكم إللي تصكّ على أقوى أفلام هوليوود بالبتوينات والسرعه والدفاشه والثواله.
– إللي يسوي نفسه ,أو تسوي نفسها,عبيط وغشيم (وعمَي)ويطوّف الناس إللي واقفه بالطابور ويتجدم عليهم.ترى كل الناس مستعيله,ومحد له خلق,واللي ساكت عنك محترم نفسه لأنك بكل أمانه قليل أدب.
-البنات اللي ما يستحون ويعلّون على الموسيقى أو الأغنيه عند الإشاره وما يتمالكون رغبتهم العارمة بالهز أو التمايل(كحدّ أدنى).
“باردون” بالكلمه بس فوق قلة الأدب اللي هالنمونه Cheap حدهم.
-الشباب إللي مسوين نفسهم cool وتلقاهم يصارخون ويتراكضون ولّا يطقّون بعض علي غشمره وصيحتهم شايله المول أو الجمعيه.
ترى الناس يشوفونكم يهااااال.
-إللي يسوون نفسهم شطّار وكباريه ويتفلسفون على جرسون بمطعم أو فرّاش سواء يتطنزون عليه أو يزفونه .
ترى فوق دعاوي هالفقير عليكم كل واحد يشوفكم تطيحون من عينه ويبصم إنك”قليل أدب ومو مربينه أهله”.
ماودي أختم بنصيحه لكن أذكركم بقول الرسول صلى الله عليه وسلم”إنّما جئت لأُتمم مكارم الأخلاق”.
يعني إللي بدون أخلاق يروح يموت أحسن له.
اللهم لا تجعلنا ممن يصفهم الناس بسوء الخلق.
-أخيرا,وليس آخرا,هناك ظاهرة لا ترقى إلى قلة الأدب ولكنها أقرب إلى قلة الذوق.
ربع التكنولوجيا ومدعّين متابعتها و معرفتها,شلون؟
تدش دوانيه وأول ما تنتهي من السلام على الحضور طلّع كل واحد جهازه (تيلفونه الذكي)سواء بلاك بيري أو آي فون أو حتى سامسونج وجابله.وتشوف فلان يضحك بروحه(الحمدلله) والثاني معلّي الصوت مادري شعليه والثالث يقول شفتوا الشغله الفلانيه.
ياجماعه صلوا عالنبي وأجلوا “تويتاتكم” و “وتس أبكم” إلى وقت لاحق ترى الدنيا مو طايره.
أدري في ناس يبون يقولون محتر ولا ماعنده ولا مايعرف.أقول لهم من الحين لا تعايروني علشان ما أقول عنكم جنكم يهال مو مصدقين عندكم هالتيلفونات.
T7l6m 
صح السانك ,زايدة قلة الادب هالايام شنقول شنخلي
نقول كفايه
يا قليلين الأدب
إحترموا نفسكم
صباح الخير وياسلام عليك وعلى تحلطمك كل صبح لا واللي يبط الجبد اللي مخلي شغلة ودوامة وشغال واتساب وتويتر والمفروض كل دوانية تعلن بمنع الايفون والبلاك بيري ومن غير زعل هاذي حوبة الكاتل من نوكيا
صباح النور
ويا سلام على متابعين التحلطم من الصبح
وأنا اول مؤيدين منع هالتليفونات من الدواوين
اخييه قلبك متروسه p;
عاد اليوم صارلي موقف مع ناس مو محترمه من الفئه المريضه اللي من تشوفها تقول هذي صاكه الديانه و ماكو منها و اهم شي الاخلاق ماكو !!
الله يعينهم على نفسهم
إي والله الله يعينهم على نفسهم
ومشكله إللي مسوي نفسه ديّن وأخلاق ماكو
يعني يبي يكحلها وعماها
برافو برافو يامتحلطم
كل اللي قلته عين العقل
ويجيب القهر ويقهر
ويتلف الاعصاب
والشكوى لله نصبر
كل يوم
الصبر نصبر
التحلطم يطرحنا
مرضى
ووجوهنا تصفر
مجتمع يحوي
جميع الثقافات
والتفاهات
وجميع الجنسيات
والجن والانسيات
مجتمع متعدد الديانات
حتى عبدة الشيطان
والاخوان والاخوات
عيالنا تتكلم أمكسر
واخلاق فلبينيات
كلمات مهجنة
خـل وهـات
والقانون مهتوك
ودمه مسفوك
ليلة يبات
*
*
أقولك حادثة صارت امس
كنت على الخليج جاي من
ممشى الاكواريوم لما موقف مطعم روك
وطلعت على الخليج ورجعت تيرن
وبغيت ادش السالمية
من صوب فندق بالاس الابيض
اللي عند الاشارة
ووقفت على اشارة مسجد
الشيخة بدرية
قاصد دوار الشيوخ
وسينما السالمية
وقفت على الإشارة ماسك الحارة اليمين
وجا يمي واحد مع زوجته
كان يمشي وراء
ويبي يوقف يساري
يعني بالحاره اللي بالنص
جات بي ام دبليو حجم متوسط 2011
وراه تسوقها بنت محجبه
شكلها بالثلاثين
يعني حرمة يافعة
جات وعلقت على الهرن لدرجة الكل تذمر من حركتها
الغير أخلاقية , وصفطت على
يسار الرجل اللي مع زوجته
وقامت تعبل وترعد وتزبد
وحال لسانها يشتم ويسب
كانت الالوية للرجل انه يسفط
على الاشارة قبلها
لأن هيه وراه
لكن هيه كانت تسوق بسرعة
تبي تسفط مكان ماسفط الرجال
مع ان تقدر توقف على
الحارة اليسار
او تعطي الاولوية للرجل
وتسفط وراه .
المهم الرجل انحرج جدام زوجته
وجدام الناس وهاذي
هرنها ازعج العالم
وغير شكلها انقلب حقير
وهي معصبة والفطين
استشف من اي بؤرة متخرجة
هالمحجبة للأسف
المهم الرجل انقهر
وما كان منه إلا طق جامة
دريشته اللي كان مسكرها بوكس
بيده تعبيرا على عدم رضاه
وأشارة منه ان كف على وجهك
لما شافت حركة الرجل يطق جامته بوكس
كردة فعل على اللي سوته
قامت اتفلت عليه هوه مع زوجته
وتقدمت بسيارتها اشوي
ماخذه مكان افضل , اشارة منها
ان الموضوع الى اهنيه انتهى
الرجل انفعل ونزل على
الاشارة وفصخ عقاله
وراح فتح الباب عليها
وتلسب يامتحلطم
وهوه يسحبها من حجابها
وكشف شعرها وهاج بحالة
هستيرية
وعلى ظهرها وهي تمد ايدها عليه
وتصارخ وتسب وتشتم
وتقوله يا حقير يا ( عرص )
يلعن ( بيـَك ) وهو يلسب لما طيحها بالقاع
وهو يقول ( بعد طلعتي من هذيلا بديرتي وما تحمدين النعمة
وتفلين عليي وتبين تاخذين الاولوية يابنت ( النـّور ) يافلاحة
وقعد يسوق عليها وهي اقلبت الدنيا
والناس عاد اللي يبي ياخذ البطولة
وقال ليش تطق حرمة
واللي يدور احموضة راح حط غترته على شعر
الحرمة بدال حجابها اللي انداس
واختفى , ويحط ايده على اماكن بقصد يوقفها
ويساعدها ويشيلها
( مادري منو اعطاه الحق يمسكها)
المهم النجدات بشارع مركز سلطان
بالجملة مسرع وجات وحده من النجدات
بعض الناس اوصفت على حسب ماشافت
والبعض تعاطف مع الرجل وزوجته ( ما أنزلت من السيارة ).
والبعض قال تستاهل وقام يسبها ويشتمها
وهناك بنتين واقفين على الاشارة
نزلوا يشتمونها لما اسمعوا لسانها
وهي تسب الريال وزوجته ,
( وقالت عن زوجته روح انت مع الشرمو… تبعتك )
بعد ما فكوهم الناس
المهم انا اشوف من النمايم
لكن اطنش والله لو شنو .
تدري ليش ؟
اولا راح تصير مشكلة
ومخافر وتعطل شغلك
وتتعطل عن البيت
لو تجادلت وكان بأمكانك ان تبلعها
وتتحمل وكأن شي لم يكن
وتشب الاشارة وتروح على دربك
وهوه موقف وليس عار
ينتهي في ارضه ويبقى من مشاكل
الشارع اللي تحدث يوميا
انا لو منه لكنت تصرفت بصمت
ان كانت معي زوجتي او لحالي
مع اني لم الوم الرجل بل شعرت
انه برد جبدي لان الاهانة كانت
على مرأى الجميع على الاشارة
*
*
انتو اشرايكم ؟
^
^
^شايب اليوم متحلطم
وتجمعت الناس
والله يالمزيون الأخ صج ما قصر وطلع حرته وحرة(بعض الناس) لكن ما يسوى عليه الأعصاب والنرفزه والمشاكل بالمخافر
وصدقني بعد ما يهدي راح يتحسف ويندم
والله إن الشوارع صارت مصدر للمشاكل والهوشات
ومثل ما قلت الكويت جمعت كل أجناس الدنيا
وما تدري اللي جدامك شنو طبعه,صاحي سكران,عاجل مينون
أنا من راييك
أبعد عن الشر وغني له
المشكله أنا ما أقدر أسويها
لأن
صوتي مو شي
حياك الله ياشيخ المزايين
مرورك يسعدنا
وتعليقك يفيدنا و يونسنا
عساك على القوه يا تحلطم
فيه بعد جليليين حيه إلي يدخن بسيارته و يقط رماد السقاره من الجام و لا يقط السقاره نفسها من السياره خطر ما تحرق احد من اليهال نمشي وتحتنا سجاير شاب ليش يعني في طفايات انزين دوس عليها طفها عدل و اذا ما تبي تدخن بالسياره خايف على الاهل و سيارتك من الريحه مو لازم تدخن صراحه حركه مو محترمه كلش
و بعد قلة ادب لما اتكون ناطر موقف و تجي سياره ابسرعه و تصفط مكانك على الجاهز حركه تحر والله
و بعد إلي يصفط مكان المعاقين حرام تبي الله يعاجبك و اتصير معاق من حادث و تالي تحس فيهم
وبعد قلة ادب من إلي يتفل ( يبصق )و هو ماشي على الارض يلوع جبد الواحد خطر ما نتعرجب من تفله بعد الواحد ما يبي يوسخ ملابسه
تحلطم لا تلوم ربع اللسته في الدوانيه ترى صج إدمان بس انا من رايك لازم ما يستخدمونه في الدوانيه
و يا رب انكون من إلي قال عنهم حبيبنا الرسول صلى اللّه عليه وسلم: { إن أقربكم مني مجلساً يوم القيامة أحسنكم أخلاقاً }
و يا رب يرزقنا جنة الفردوس مع الحبيب قول آمين
الله يقويج أختي
سالفة إللي يوصخ الشارع بازجير كتبت عنهم بوست عنوانه الناس الوصخه(100% تحلطم حتى أنا حسيت إني تحلطمت وايد يوم كتبته)
وموضوع اللي يسفط مكانك وإنت ناطر كان على بالي ونسيته (لو يصير لي ,هوشه مافيها غشمره ولا يطلع من الموقف)
اللي يسفط مكان معوق فعلا مايستحي
شكرا لتأييد منع الإدمان التقني في الدواوين
اللهم أمين نكون جميعا أقرب الناس مجلسا للحبيب محمد
شكرا للمرور والمشاركة التي لا تخلو من إضافات فاتتني
جبتها على الجرح يالشيخ
قلة ادب وقلة ذوق
ازيدك شويه
اللي يدخل قهوة ويلاقيك واقف ناطر تطلب ويتعداك بكل برودة دم
اللي قاعدين بقهاوي الأفنيوز بس عشان يتمنظرون بخلق الله واخذ عاد من الخز والتنقز او العيون الزايغه .. هذولي هالكثر فاضين
اللي ما يحلى له يخمس بالبانشي يم بيوت خلق الله الا تالي الليل
لو عندي شوزن جان فتحت شباكي ورميته
الموظفات اللي تبي منهم شغلة تتم تدورهم من مكتب لين مكتب واخر شي ترجع مكتبها ريحتها اكل تصك الراس وقاعدة تتمطق
لا وتحاجيك بنفس جنها متفضله عليك
واللي يدشون عليك مكتبك وانت على التليفون قاعد تخلص شغل ماعنده مانع يقاطعك
تعال قول لي من قال لك ان انت وطلبك اهم من شغلي
ويطلع الطلب سخيف او السؤال اسخف او يبي المكتب اللي يمكن وغلطان
والشغلة عاد اللي انا ما اطيقها البنت اللي تتعلج بمكان عام
انزين تعلجي آمنا بالله .. بس الحنج يوصل لين صدرج والتمطق اللي يلوع الجبد ليش؟؟
والحلوين المعاريس اللي توهم متزوجين وتصادفهم مثلا بالسوق
وربي قمة بقلة الأدب لما يتحرش فيها جدام الناس على ابو ان السوق فاضي الصبح وماكو ناس وايد
واهي الأخت سايحه والدلع املق من الملاقه
يبه روحي بيتكم صكوا على روحكم الدار وتدلعوا على راحتكم
ليش احنا لازم نشوف قلة الحيا هذي
عيب عيب عيب
نسينا اصولنا
اما المراهقين فقصة ثااانية
مراهق توه تخط شواربه
يلحق وحده تصلح تكون اخته الكبيره
ليش ياماما .. ناقصني شنبات حرير مثلا
اذا بكمل مراح اخلص يا تحلطم
نكتفي بهالقدر افضل مو!!
لا مو أفضل الإكتفاء بهذا القدر لأن المدونة تفتح أبوابها لتحلطمكم دون تحفظ
تجاوز الناس بأي طابور وقاحه وقلة أدب
رواد القهاوي أهل العيون الزايغه تصنتفهم في قلة الأدب يتجاوز البوست لأنهم حدهم سفله
الموظفات اللي يقضون دوامهم أكل فعلا قلة أدب
البايخ إللي يقاطعك وأنت تشتغل أقرب للملقوف وقليل الذوق من قلة الأدب
التعلج تأييد للوصف,لكن سالفة المعاريس صراحه ما مرت على لكن إحتمال مو معاريس( السالفه تصير أخّس)
المتزوج ويسويها من أمه وأمها قليلين حيا
ويحليلهم اليهال طلعوا يغازلون اللي أكبر منهم يالله سميهم(مبتدؤ قلة أدب,أو السائرون بقوة نحو قلة الأدب)
حياج الله أختي منورتنا وتعلمنا من تعليقكم مواقف نجهلها في قلة الأدب المحلية
عسى الله يصلح الجميع
يصير أعلق؟؟
واتحلطم معاكم؟؟
مو قايلتلك باخذ لقب التحلطم لهالسنة…
عندي كميه رهيبة من قلة الأدب الي اشوفها
لما اييك مريض ناطر دوره بالساعتين والثلاث واييك واحد
بكل بروح طايف على رقمه امية رقم ويقول اسمحي لي دكتورة
رقمي طاف ويبي يدش غصبا علي هذي قلة ادب موالا موقلة ادب؟
ولما اييك واحد بكل برود رقمه 300
ويبي يخطر ال250 ادمي اللي قبله
ويآمرني ..دكتوره شوفيني قبل الناس؟؟ هذي قلة ادب والا مو قلة ادب؟
ولما أرفض وأقوله بالدور أخوي مايصير اشوفك قبل الناس مثل ما انت
ناطر اهم بعد ناطرين…
يسفّل فيني ويغسل شراعي ويغلط علي وعالصحة وعالمستشفى جني
انا مو قاعده اشوف مرضى لا متربعه والعب كوت واشرب بربيكان ..هذي قلة أدب والا مو قلة أدب؟
ولم اتيك مريضة الساعه 1 بالليل
وانا من سبع الصبح مدوامه على حيلي
اكرف واشوف بهالمرضى واخرتها الساعه 1 بالليل وانا من سمتت الصبح
لأني قمت من العياده رحت اجيب لي قهوة من الكفتيريا وارجع..
تصرخ بويهي واتقولي انتي اتمشين واتبلعين وتاكلين وتاخذين راحه
واتحجين بالتلفون واتسولفين واحنا ملطوعين اهني ننطر..وتصرخ وتسب وتسفل
وتحسسني اني لابسه ملابس غوص و صوت اليامال وراي من صراخها ولعلعتها…هذي قلة أدب والا مو قلة أدب؟
ولما إييك كاتب ويهد الكاونتر لأنه خلص شفته من غير ماينطر الي عقبه ويلطع المرضى ساعه ماكو أحد يقص أوراق هذي قلة أدب والا مو قلة أدب؟
ولما إييك دكتور كبير مخضرم والمفروض محترم ويعطيني تقدير جيد ويجذب ويطلع اشاعات
بالمستشفى اني ما اداوم واتأخر ومكبرّة المخدة لأني ماعطيته ويه ..هذي قلة أدب والا موقلة أدب؟
ولما إتيي من صباح الله خير وتجبّل على موقفك وتلقى واحد صافط ومسكّر عليك هذي قلة أدب والا مو قلة أدب…
ولما تقعد بالعياده واتشوف 82 مريض في 6 ساعات وآخرتها اتيي وحده واتقولك
دكتور ليش بتمشي ..بالانتظار وايد ناس..فتقولها شفتك خلص فتدعي عليك دعاوي تخرع
هذي قلة أدب والا مو قلة أدب…
ولما نفس هاليوم اللس شفت فيه 82 مريض
إييك مريض ويقولك انت تفحصني أي كلام..وانا رحت الخاص أمس وفحصوني احسن (ماني فاهمة دامك رحت للخاص شيابك اليوم اهني تختبر ذكائي مثلا) هذي قلة أدب والا مو قلة أدب..
ولما اتييك مريضة تبي تدخل قبل الناس لأنها قاعده على ويل جير
(كرسي متحرك) واهي مافيها الا صداع و اتسب واتسفل واتقولي بويهي
غصبا عن أهلج بتشوفيني..ولما أرفض اتقولي ((عساج ماتردين بيتج سالمه..
وعسى باجر يفقدونج ربعج بالدوام وحزنتها يدرون إنها حوبتي…))
بذمتك يا اخوي يا تحلطم..هذي قلة أدب؟؟ والا مو قلة أدب؟؟؟
تعبت:)…ولاحظ أنا ما قتلك ليلحين على قلة الأدب اللي بعد االساعة 2 الظهر..هالحجي كله قلة أدب الدوام..
لو أتكلم..صدقيني يبيلي بوست:)
مساك الله بالخير وسامحنى عالطوالة
صراحه كنت أتوقع إنج تبالغين أول سطرين لما قلتي بتاخذين لقب التحلطم هالسنه بس لما قريت كلامج
صراحه نطلع تلاميذ
بكل أمانه دكتوره أقول زين منكم تصبرون على هالمواقف وعلى قلة أدب الناس
ومن كل قلبي أدعي لكم الله يعينكم ويصبركم على الناس
الواحد ممكن يبلع تذمر الناس لكن الدعاوي ,حسبي الله ونعم الوكيل
الواحد مايقول الا الله يصبركم على الناس وبلاويها وياجركم على صبركم
آنا ودي أقترح إذا واجهتي مثل هامواقف تتركين الأمور وتسلمينها حق “بزّه”
وبإنتظار تعليقكم على قلة الأدب اللي بعد الساعه 2
مافي داعي للأعتذار بالعكس المدونه المركز الرئيسي للتحلطم والعضويه فيه مفتوحه لكل واحد منغث
الله يجيركم من المغثه
وحياج الله دائما
شكرا على المقال الاكثر من رائع ..
لكن عندي تعليق جدا بسيط .. انا من رواد السياكل و حبيت اوضح انه التنفيخ حق السيايير عشان لفت الانتباه و لحد يلف عليك او يفتح الباب وهو واقف بالاشاره و اتدش فيه .. يعني سالفت التنفيخ مو عبط .. ممكن يكون في مرضى يحبون بسوون الحركه بس عشان يزعجون .. ولكن اصل الحركه عشان الناس تدري انك ياي بالسيكل ..
قبل يوميين انا راد من المكتب بالليل على الدائري الثاني ( ما كنت قاعد اقز ولكن هذا دربي حق البيت غصبن على ) و انا امشي بين السيايير وله واحد يفتح بابه و بغيت ادش فييه ( مع العلم اني ما اطلع بدون عده السلامه safety gear ) عشان جذي الواحد ينفخ لانه في ناس همج بالشارع مثل ما حضرتك تفضلت بالمقال
شكرا أخوي عدنان على مروركم وعلى التوضيح
والموضوع عن إللي يقصدون إرباك وإزعاج الناس وليس من يلتزم بقوانين السير مثل حضرتك
حياك الله أخوي وإن شالله كل الشباب يلتزمون بالنظام والأمان في شوارعنا
اي صح قليلين الادب
الحمدلله تأييد يشجعني أني أطب فيهم
حياكم الله
وه بس على هل الايام مافيه ماأدبين الا البعض هع هع
مع الأسف قلة الأدب تنوعت أشكالها
وبالتالي إنخفض عدد المؤدبين
يالله تصلحنا جميعا