Articles

الفقير مقرود

In حلمنتيشي on 22/04/2011 by t7l6m

أكو موضوع وايد قاهّرني , وبعنايتكم وإهتمامكم جدير
السالفه مرض بالناس و على المجتمع جايد خطير
الموضوع أبدّ موسهل ,وعند إللي يخاف الله كبير

القصه بالفلوس وتعاسة من كان بهالزمن فقير
الفقير مقرود ونظره الناس له فوق الوصف والتعبير

الناس خلّوه أخو الكلب,مايحشمونه يعتبرونه حقير
إذا عنده معامله ردّوه ,قالوله مخالف وممنوع ما يصير
وإن ترجّاهم وشكى الحال,زحلقوه قالوله شوف المدير

والغنيّ أبن اللذينه شغله يمشي ,ولو مو قانوني يصير
لين شافوه تراكضوا صوبه,الكل علشان خاطره يطير
ويكرمونه الناس لي ياهم,يفرشون له الزل والحرير

أكو ناس حشاكم كلاب , تتلزق بأهل المناصب والوزير
وإللي دونه همّ قايم حظهم ,من طقّة قنصل وسفير
وين مايروحون وراهم الناس, ويلاقيهم “جمعٌ غفير”
الحظ قايم للي مومحتاجه,قايم لراعي المال الوفير

والفقير ما يعطونه ويه ,عندهم مستواه حارس خفير
لو يمّر صوبهم مايطالعونه ,الكل عن شوفته عمَيْ ضِرير

الغني إن فاحت خيسته ,قالوا الناس الله شهالعبير
والفقير لي تطيّب إستنكروا ,سألوه شماكل؟ جرجير
الفقير عندهم مايفهم لو هو ,فلتة زمانه عالِم أو خبير
والغني لو يكسّر كلامه, قالوا أفصح من المصباح المنير*
وإن قال الشمس تشرق من الشرق ,قالوا شهالعلم الغزير
ياجماعه بسّكم عجاف وكلكّ,ترى الجذب حبله قصير
من يحترم الناس بسبة فلوسها, غلطان و للأوهام أسير
من يحشم الأدمي على فلوسه ,مسكين من جنس الحمير

وإللي يظلم الفقير يبشر ,أنه بالأخره من أهل السعير
الظلم ظلمات يوم القيامه, أهله بجهنم وبئس المصير

هذا شوي من اللي بقلبي ,همّي بسبة الموضوع كبير
الحمدلله ربي رازقني لكن كاسر خاطري إللي بهالديره فقير
الغني الله يهنيه بفلوسه ويزيده,الشرهه على العجّاف الحقير

*المصباح المنير تأليف أحمد بن محمد بن علي الفيومي المقري

Advertisements

10 تعليقات to “الفقير مقرود”

  1. يامتحلطم , انتقادك هادف

    وقبلها ينتقد ساخر
    الشعر غامض بطبعه
    اغلب الاحيان جاير
    تفسيرة عارف ربعه
    ومن على فهمه قادر
    ينثره ,ثـم يـجمعه
    اهل التجربة والمخابر
    مافيهم احد أمعه

    *
    *
    الشعر
    هيل ونـجر
    غامض وظاهر
    يطرب مسمع الـ يسمعه
    من جالس وساير وعابر
    الشعر لا ضاع بالمعمعه
    وحـميّت وطيس الدواير
    أصبح عتب ,وحق لك معه
    اعطه باللي انت خابـر
    لسبه لين على ظهره تقطعه

    *
    *
    لسبه تـحلطم شاعر
    تقاسم الكدر مضجعه
    شكوى تـحكيها مـحاجر
    لسبه ولسانه اقطعه
    لا صار ينهى ويامر
    فـي الضيق وفي السعه
    رويبضه يناقز ويطامر
    يفتـن بالعامه مافضعه
    اشتبـي تسوي زلق واير
    إن طاعك الزمان ولا طعه
    أصبـر وتـحمل وكابر
    لين الله حقك يطلعه
    يـجيبه زاحف او طاير
    وفقر الحال حنا نصنعه
    والغنـى غناة الضماير
    لا صارت نفسك تـمنعه
    وبالرضا مقتنع وصابر
    الغنى , الفقر يشفعه
    والحاجة تبني لك عماير
    والاختراع امها المرضعه
    لليتيمه الّي دارتها دواير
    الفقر ماهو ضرس ونـخلعه
    ولا هو عيب يلحقنا عاير
    الفقر اسـمه للاسف يشنعه
    عكس اسم الغنـى يفاخر
    الفقر شرف يـحط اصبعه
    بعين الغني الفاجر
    مثل نقدك ذا ما اروعه

    *
    *
    متحلطم خطى سيرك منتظمة
    ومواضيعك متنوعة
    وغير مملة
    وترضي جميع الاذواق
    السياسي
    والعاطفي
    والحرامي البواق
    ممتن حقيقة لجهودك المبذولة
    وكرم عطاياك هنا
    وبغير مكان من وجودك
    بتلك الصفحات
    ^
    ^
    ^
    شايب مزيون

    • لك مني يالمزيون جزيل الشكر على كلامك الطيب بحقنا وبما نكتب
      والفقر حشى مو عيب وأوائل من يدخل الجنه أهله
      أخجلتني بالفقره الأخيره المشجعة جدا لأني عاجز عن الرد عليها
      ويكفي أقول إنها ملئتني حماس
      اكرر لك شكري على مروركم الكريم وتشجيعكم الجزيل
      منورنا دائما وبإنتظار رأيكم بالقادم من الموضوعات 

  2. ممممم

    أصابع إيدك ما تساوت

    ولو خلية خربت …

    الدنيا ما تخلى من المنافقين و المتملقين

    بس أنا ما أحب الناس إلي تقبل بضياع حقوقها ..

    أو تطلب معونات في غير مكانها

    و بعد ما أحب إلي ياخذ حق مو له حتى تجاوز الدور يزعجني

    إلا بمبرر قوي و باستأذان الجميع ..

    شكرا لك تحلطم

    عساك على القوة

    • الله يقويج
      ما في شك الناس مختلفه
      ولم يكن القصد التعميم
      القصد هجوم نقدي على المتملقين
      وعلى من يكون مقياس تقديره للأخرين حجم رصيده المصرفي
      حياج الله أختي والشكر لكم على مشاركتكم

  3. اي والله صج
    اتوقع الغني يراكضون له مو عشان فلوسه لان ما راح ياخذون من فلوسه شي اهم يقومون فيه عشان يتذكرهم و يضبطهم بالواسطه اغلب الاغنيه واصلين بكل مكان وامورهم ماشيه

    انا اشوف هالسوالف بالسوق بعد تدخل محل و تشوف الكل يقوم فيه مايدرون شسوون لو بيدهم جان يشيلونه من الارض و يمشون فيه أو يفرشون له الارض ورد عشان يمشي عليه بس تدخل وحده على قد حالها مو شايله جنطه ماركه و مو لابسه ساعة ماركه ما يعطونها ويهه و تصير نفسهم خايسه عليها صار ما يهمهم إلا المظاهر

    ذكرتني بصدام حسين لما يقط نكته بايخه اللي قاعدين معاه كلهم يضحكون تقول طاقهم بزر و طلع صوت الضحك إحنا صرنا جذيه بعد الغزو ولا أول الكوتيين قلوبهم طيبه ما عندهم هالافكار و هالتعامل مع الناس والله الكل تغير
    وانا اقرا إلي كاتبه تذكرت القذافي الله يهديه 🙂

    العجاف مشكله اهو إلي ياخذ القلوب في المعامله والكلمه لحلوه

    عفيه تحلطم لا تشيل بقلبك ولا يهمك كل واحد راح يتحاسب على أعماله و الفقير له الله و ربك كريم انشالله

    الله يسعد قلبك يا تحلطم و الله يهدي الناس و الخير موجود انشالله والله يكثر من امثالك بطيبت قلبك

    • أتوقع الغني يراكضون وراه لأنهم أغبياء وما يعرفون مقاييس الرجوله
      وإللي بالسوق ماعندهم سالفه لأن محد ينشف ريج البياع والبياعه غير إااي عندهم فلوس وآخرتها مايشترون

      صراحه مو شايل بقلبي بس قاعد أوضح شي للناس
      ومافي شك الحساب عند رب العالمين
      جزاكم الله خير على الدعاء
      وحياكم الله

  4. والله كلامك فيه من الصحه الشي الكثير
    في نماين مثل ما تفضلت…
    تحشم..علشان الدينار.
    حتى في مقعد الحريم..
    أحيان وبعض ناس مو الكل علشان لا نعمم
    إذا دخلت وحده راهيه ولابست لك الماركات كلها..يفزون لها اهل البيت ويحشمونها ويقومون فيها..وكل من يوسع لها بالمكان..
    والفقيره اللي على قد حالها..مالها الا الخز والتحلطم..حتى لو انها اقرب لهم بالنسب

    الله المستعان..
    والناس بالمخابر مو بالمناظر

    • ونعم بالله
      لكن وين اللي ما يغتر بالشكل ويعامل الناس على أخلاقهم
      المشكله مشكلة الغشيم إللي يغتر بالمظاهر وذنبه على جنبه
      حياج الله أختي منورتنا بالمرور والمشاركه

  5. موضوعك ساخن وحيوي من آمن العقوبة أساء الأدب,,,,,لكن عزاءنا أن الشخص يبدأ من نفسه بعمل الصح والقناعة….أرجو قراءة مدونتي غزال والشر زال.

    • حاولت الدخول والبحث عن مدونتك لكن دون جدوى
      يرجى كتابة عنوانها الكامل بالإنجليزي
      شكرا لمروركم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: