Statuses

حديقه عامه مو حكوميه

In أخلاقيات, إقتصاد on 19/04/2011 by t7l6m مصنف: , ,

مريت ويا العيال مرّه بالمغربيات(الوقت وليس الحريم) صوب حديقه بالجابريه قلنا ندخلها.طلع مو بكيفنا!
الحديقه ليتاتها شابّه بس الباب مقفول بسلسله وقفل(الظاهر خايفين أحد يبوق الشِيَر) و مكتوب عليه الدخول من الباب الآخر.مشيت وعدّاد التحلطم شاب أحمر.
تذكرت أيام الدراسه .كان في حديقه بمدينتنا فيها مدخل بدون أبواب والسور نص متر,قعدت أسولف حق العيال عن ذيك الحديقة وأن الحدايق حاطينها علشان الناس تستانس فيها وتحس بالإنطلاق والحرية بدون قيود وإحنا مسوينها جنها سجن بأسوار وبوابات حديديه.
أمس شفت حديقه صغيره بالشعب غيّرت فكرتي عن حدايقنا وخلتني أكتب هالبوست علشان أشكر صاحب الجهد والفكرة والتمويل لهذه الحديقه.
الحديقه بوابتها عبارة عن إنقطاع في السور الذي لا يتجاوز إرتفاعه 0,3 متر,نعم ثلاثين سنتي متر يعني بإرتفاع مسطره,بمعنى أنه ليس سورا بقدر ماهو تحديد لحدود الحديقة لا أكثر.السور المنخفض محاط أعلاه بحبل إضاءة,والحديقه حلوه ومرتّبه وفيها ممشى ودائرة كبيرة في منتصفها,وبعض الصخور الموضوعة بطريقة فنية وجمالية.أونس مافي الحديقه إنها بدون سور يعزلها عن الفريج ويعزل من بداخلها عن الخارج,ويحجب الرؤية ويشوه المنظر.

الحديقه حلوه لأن الحكومه شالت إيدها عنها.كانت الحديقه قبل داثره ,كلها تراب وجم شْيَرَه,وسورها الله يزيد النعمه.تطوع واحد من أهل الفريج وراكض في هيئة الزراعه علشان يسمحون له يعيد تصميمها وزراعتها بمعرفته وبموافقة الهيئه.بعد موافقتهم باشر الريال الشغل على حسابه وعدّل الحديقه وخلاها ورده وإفتحوها قبل جم يوم والحين شغالين بتبليط المواقف المحيطه بالحديقه.
بكل أمانه الريال صاحب الفكره والمبادره يستاهل الشكر على تفكيره الإيجابي والمبدع وعلى جهده والفلوس إللي صرفها,وإن كان يرغب بتسميتها على إسم المرحوم والده فهذا شيء بسيط مقابل ماقام به.
المعلومات قالوها لي الربع(وحدّهم مستانسين) بيتهم بالفريج ويعرفون الريال صاحب الفكره وهو “إيهاب محمد درويش العرادي” .آنا شخصيا ما أعرف الريال ,حتى لو أشوفه ويه بويه, لكن له مني جزيل الشكر والتقدير.وأتمنى أن يقوم الميسورين في كل منطقة بتجميل منطقتهم بطريقة مبدعة ومفيدة للناس.
وتقع الحديقة على شارع الإستقلال(مو وقته غيروا إسمه) في منطقة الشعب بعد إجتياز الجسر اللي يربط الدعيه بالشعب.

في الختام أسألكم الدعاء لها,
أم حسين إمرأة كبيرة من عيايز الكويت,تنضح طيبة وتشّع أمومة تغمر الجميع .محبوبة من الأهل والجيران ومن كل من يعرفها,تستقبل زائريها بتحية صادقة وتودعهم بدعاء.لا تفارقها الإبتسامة رغم جديتها.وجهها ينطق بالسماحة والطيبه.دائمة السؤال عن الزوجة والأبناء.تشعر بالحرج إذا لم تتطمن عليها لأنها تستحق أكثر من ذلك.هي أم لأصدقاء أعزاء وأكاد أن أكون إبنا لها .
ترقد أم حسين حاليا بالمستشفى,ومن المقرر أن تُجرى لها عملية في القلب يوم الخميس.
اللهم إشف أم حسين وجميع مرضى المسلمين.

Advertisements

10 تعليقات to “حديقه عامه مو حكوميه”

  1. الله يشافيها ياااارب ويرزقها الصحه والعافيه
    ويبارك بعمرها
    ويكشف ضرها وكل مستضر

    وبالنسبه للحدايق
    إحنا بحاجه فعلا لتجميل البلد بهالنوع من الاماكن
    وبعدين الزرع إشبيكلف الدوله؟؟

    ووايد مواطنيين من هواياتهم الزراعه ومجابل السقاي والزروعات بالحديقه
    حطوا إعلانات واللي يحب يساهم بمجهوده
    أو حتى بأمواله الله يجزاه خير
    مادام إنتوا مالكم خلق…
    خلوا الاوادم تشتغل

    • اللهم آمين ويشافي مرضى المسلمين أجمعين
      صراحه الريال ياب شركة تسوي الشغل لأن الحديقه كبيره ومساحتها مو أقل من 5000 متر
      لكن ضبّطها عدل وخلاها شرحه مو مثل حدايق الحكومه إللي بنفس المساحه
      وفعلا محتاجين مبادرات من الناس وتحفيز لهم
      ولا على الحكومه ما راح نشوف غير هالحدايق البايخه

  2. الله يشافيها انشالله

    اذكر و انا كنت صغيره جدام بيت يدي في حديقه عاديه ما فيها اي شي بس دوارف على زاويه كنه كله نروح نلعب فيها يعني تقريبا قضيت طفولتي بهالحديقه ليما الحين مرات نمر عليها و نتذكر ذيج الايام < حسيت اني عيوز لول
    بس الصراحه شكلها صار يضيق الخلق و تخرع !!
    انا يكسرون خاطري عيال هالايام احسهم ماذاقو هالوناسه لعب بالحديقه و بالشارع كل واحد قاعد و مجابل ال ipad
    حتى لما اقول حق اهلي خنروح كشته بحديقه يقولون من حلاة حدايقنا !!
    بس ضروري نروح هالحديقه و اخلي يهال العايله يجربرن وناسة ايام اول

    • اللهم أمين ويشفي مرضى المسلمين
      والحديقه وناسه حق الكبار والصغار
      رفيجي اللي الحديقه بفريجهم يقول الناس قاموا يدعون حق الريال ونّسهم و ونس عيالهم
      ويقول إن عياله يوميا إذا ملوا من قعدة البيت يروحون الحديقه
      الحديقه صج مو كبيره وايد لكن راح يستانسون اليهال فيها

  3. أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها
    أسأل الله العظيم رب العرش الكريم أن يشفيها

    ما عليها شر إن شاء الله عملية القلب الحين ماصارت مثل قبل صعبه و اتخوف
    إن شاء الله سلامتها جدامها 🙂 لا اتحاتيها ربي لا يرفع عنها ولا يبلانى ولا من نعز

    حجيك عن الحديقة ذكرني بحديقة جمال عبد الناصر و اشلون كان لها دور اجتماعي كبير العوايل كانت اتيمع فيها و عقبها جمعيه كيفان و بعدين حديقة مشرف و بعدين ما أدري شالسالفه ليش اندثرة الحدايق ما أدري حالها حال كل البنية التحتيه في الديرة إذا مافي رعاية لها أكيد بتدثر

    الله المستعان

    ترى أحس صرت وايد اتحلطم كل ما ادخل مدونتك الجيله زايدة عندي :\

    • اللهم آمين وإن شالله تكون العملية سهله وناجحه
      وفعلا كانت للحدايق دور وكانت مكان للترفيه وقضاء وقت الفراغ
      يمكن الحين صك عليهم المولات والواجهه البحريه بس هذا مو عذر علشان يهملونهم

      ولا تحسّين هالإحساس لأن مدونتنا مُعدية بطبيعتها ولازم الواحد يتحلطم فيها
      يعني نقدر نوصفها بأنها القيادة العامة للتحلطم
      الله المستعان
      وحياكم الله دائما

  4. اي والله يا تحلطم تغيرت الحدايق اول تروح وتستانس مع الاهل في الجوالحلو والمكان النظيف
    ألحين حدايقنا كلها ظلمه الواحد يخاف يخلي اعياله يلعبون بروحهم و صارت حق مواعد الحبايب و صارت وسخه و كلها آثار شوي اخوانه الاجانب اهم الي عايشين حياتهم بهالحدايق
    ولا احنا الكويتين نسينا الحدايق ومتعتها و الكويت كلها في المجمعات تغيروا الناس وتغيرت معنى الوناسه عندهم

    صج يعطيه ألف عافيه إيهاب العرادي و الله يوفقه و يعوضه خير سمعت في ناس يبنون مسايد و يسوون ماي سبيل بس حديقه اتوقع اجرها كبير عند الله انشالله لان الحديقه مكان استمتاع اليهال والاطفال احباب الله الله يجزيه كل خير

    و الله يشافي ام حسين ويحفظهاو يطمن قلوب اعيالها عليها و يطول بعمرها يا رب

    والله شوقتنا على روحة الحدايق شخبااري ياله يبله روحه بزهب مطاطير القهوه والجاي و الصمون والجباتي وجبن بو قلاص و كاكاو نوتيلا حق اليهال 😉 يالله انشوفكم على خير 😉

    • صح كلامج والله
      وإن شالله بناء حديقه يكون له أجر كبير ومن الحين الريال يدعون له أهل فريجهم والمنطقه
      اللهم آمين يتقبل دعاء الجميع لأم حسين
      زهبي عدة كشتة الحديقه وودي اليهال وإذا إستانستوا إدعوا
      حياج الله أختي
      مروركم مدونتنا ومشاركتكم مميزه
      حياكم الله

  5. سلامتها جدامها ان شاالله
    الله يشافيها ويشفي جميع المرضى

    ما قصر اللي سنع الحديقة، وانت بعد ماشاءالله عليك وصفك نموذجي
    يا ليت اهالي المناطق يساهمون بإعادة احياء الحدايق
    احسن مكان حق اليهال عقب البحر طبعا

    • اللهم آمين يشفيها وكل مرضى المسلمين
      صج الريال ما قصر ويستاهل الشكر
      وياريت تكون الحديقة نموذج لباقي المناطق

      حياج الله بعد الغيبه الطويله
      اسعدنا مروركم ومشاركتكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: