Articles

أم كشّه

In حلمنتيشي on 18/04/2011 by t7l6m

مسويه نفسها محجّبه ,وحاطه على راسها بقشه
طلعت تمشي جدامي ,تتدربح تقول بشّه
راسها تقول تفّاخيه ودّك بدبوس تبط حجابها وتفشّه
يبا مو جذي الحجاب ,الحجاب مو بس شعر وتخشّه
الظاهر حجابها مو على ديانه ,قصدها تغطي الكشّه
تسوّي نفسها محجبه وبحجابها الغشيم ماتغشه
بغيت أقولها مشطي شعرج وأنصحها بالماي ترشّه
وبالدهن تليين الليف وتنسل شعرها عقب ما تمشّه
وإذا شعرها ما منه علاج ورجا تفتك منه وتحشّه
خفت أكلمها تزعل وتنفعل تطير وراي توشّه
قلت شلك بالطلايب لو تلحقك ماكو مكان تدشّه
شكلها تربي جلاب مو وقته تييب واحد عليك تهشّه
مشيت وأدعي لها يرزقها ريل يحبها ويسكّنها بعشّه
ويعيشون بسبات وتبات وتخلف له الصبيان أم كشّه

اللهم أصلح كل من تضع علبة روب,أو بزاليا,قبل إرتداء الحجاب.

Advertisements

15 تعليق to “أم كشّه”

  1. هذا داخل في التحذير الذي جاء عن النبي صلى الله عليه وسلم في قوله ‏:‏ ‏‏‏
    (‏ صنفان من أهل النار لم أرهما بعد ‏)‏‏‏ وذكر الحديث ‏:‏ وفيه ‏: (‏ نساء كاسيات عاريات ، مائلات مميلات ، رؤوسهن كأسنمة البخت المائلة‏ )‏ ..

    • مع أن القصد مو ديني
      لكن صراحة حتى الشكل مو مريح للنظر
      وشخصيا مو لايق على البنت تسوي بنفسها جذي وفوقها كلامك
      كملت السالفه
      الله يصلح بنات المسلمين يارب

  2. السلام عليكم ورحمة الله وبركاته

    الحين بوست هااااادف جدا الإعتذار اشماله ؟؟

    يعني هم يشوفونه حجاب و الدنيا كلها تشوفهم تطيبق لحديث الرسول صلى الله عليه وسلم

    ورد في صحيح مسلم (2128) عن أبي هريرة رضي الله عنه قال : قال رسول الله صلى الله عليه وسلم :
    صنفان من أهل النار لم أرهما : قوم معهم سياط كأذناب البقر يضربون بها الناس ونساء كاسيات عاريات
    مميلات مائلات رؤوسهن كأسنمة البخت المائلة لا يدخلن الجنة ولا يجدن ريحها وإن ريحها ليوجد من مسيرة كذا وكذا .

    +-+-+

    و ضيف عليه اللبس يا الله من فضلك نفنوف قصير و قبل يلبسون بنطلون تحته الحين ولا شي و تقولك متحجبه اشلون بس متحجبه و شالله حادج على هالتهول ..

    إحنا ليش نستحي نقول الصج و نراعي الكل … و ما نفكر برب العباد

    يالله العفو و العافية يارب نسألك مغفرة من عندك يا أرحم الراحمين

    سوري تحلطم بس هالموضوع يحرني سوري مرة ثانيه

    و عساك على القوة على هالنقد الهادف

    • الله يقويج
      خليتيني أغير كلامي وأعدل الإعتذار خليته دعاء,اللهم تقبل
      أما اللبس فالبعض يلبس أشياء لها علاقة بكل شي إلا الحجاب
      ناهيك عن القذله بره والمكياج الأقشر وتفسّر الجموم

      اللهم آمين يغفر لنا أجمعين
      ومافي داعي للسوري والموضوع إللي يحر طلعي حرتج فيه وتحلطمي

  3. لالا بديت تتقن الحلمنتيشي وتبدع فيه 🙂
    وهذي أم قوطي الروب وصاحبتها أم البكلة مالازم تعتذر منهم قول الي بقلبك والي اهو الصح

    • شكرا على التشجيع
      وشلنا إعتذارنا وحولناه دعاء لأم القوطي والبكله
      حياكم الله
      أسعدنا مروركم ومشاركتكم

  4. بصراحه…الجودي قالت اللي بقلبي وزياده..
    حتى الشكل مو حلو..
    وين الناحيه الجماليه بالموضوع..
    إلا إذا قصدهم يطولهم..شويه
    بس هم مو عذر!!!

    والله خوش شعر وتحلطمك دائما في محله
    قواك الله

    • الله يقويج وحياج الله أختي
      صراحه مالهم أي عذر بهالبقشه إللي على روسهم

      الله يقويج وأسعدنا مروركم ومشاركتكم

  5. الصراحه كل مالي و انعجب بكتاباتك
    صج اني مو صوب السياسيه بس هم اشوف حلمنتيشياتك p;
    عاد انا كله ازف رفيجاتي اللي يسون هالحركه البايخه
    مادري متى يفهمون انه هالشي يلوع الجبد و يضحك !!
    صج اني بنت بس الصراحه اقولها النساء ناقصات عقل و دين

    تسلم ايدك 🙂

    • الله يسلمج
      وشكرا للإطراء
      ولاتوقفين زف بكل وحده تعرفينها حاطه بقشه وياريت تعطينها نسخه من البوست
      أما سالفة العقل والدين.لا تعليق:وشهد شاهدٌ من أهلها
      حياكم الله أسعدنا مروركم

  6. ~ ~ صباح الخير ~ ~

    يا تحلطم اهم إلي لازم يعتذرون أطفالنا يخترعون لمن يشوفونهم بكل مكان تقول هجوم مخلوقات من كوكب ثاني ( :

    هالحجاب له قصه بدايته أول ما طلع في الجامعه يعني البنيه تبي تبين ان شعرها طويل ومن طوله تلفه جم لفه لين يصير بقشه تقول جنهم بيدخلون موسوعة غرينتش بأكبر كشه اقصد اطول كشه اهم بس يبون يلفتون أنظار الشباب عليهم و سنه بعد سنه و تكبر البقشه لي وين راح يوصلونها ما يندرى هاذي القصه إلي مالها نهايه …..

    الله يهديهم مادري هذيل بنات ولا ريايل في أحد يتحمل كل هالثقل على راسه فتره طويله و يمارس حياته عادي هذيل الله بيعاقبهم و بيصير فيهم روماتيزم في الرقبه و عظامهم اتجكجك و راسهم مو ثابت ويختل التوازن عندهم (:

    بس شوفهم لي سافروا برى ما يلبسون هالحجاب اتحدى وحده اتسافر و حاطه على راسها هالبقشه والله شبهه سيده يسحبونها يقولون ارهابيه شنو حاطه تحت هالبقشه متفجرات اهم النقاب يسون عليه قصه بعد هالراس شكله خطير والله .

    الله يهديهم و تنتهي هالموضه و يحفظ البنوتات و أجيال المستقبل و لا تطلع موضه تخرب الحجاب

    الله يعطيك العافيه ما قصرت و صح اللسانك و تسلم ايدك على هالموضوع و انشالله يهتدون على ايدك و يصير بميزان حسناتك و جزاك الله ألف خير

    • صج أشكالهم تخرع الكبار مو بس اليهال
      اعتقد ان الوضع الحالي إبتعد كثيرا عن أصل قصته أتوقع الحين حتى إللي شعرها قصير تحط بقشه
      يعني طول الشعر صار مو مقياس ولا سبب
      وأيد كلامج,ما أعتقد يلبسون هاشي بالسفر فعلا شبهة إرهابية جنائية
      الله يهديهم إن شالله
      وعسى الله يتقبل دعائكم وجزاج الله خير عليه
      حياكم الله

  7. صبحك الله بالخير

    بس للتوضيح لا حرام أنا ما اقصد اليهال
    اليهال يخترعون لمن يشوفون الكبار إلي مهولين بأشكالهم في المجمعات حتى او ابو الهول أحلى منهم 😉

    صح كلامك انا معاك صارت موضه بس هم الغرض منها لفت الانظار عليهم وكل ما زادت البقشه بالطول زادت قوة جذب الانظار ؛)

    و جزاك الله مثله و شكرا و الله يحييك

    • كان قصدي إن أشكالهم مو بس تخرع اليهال حتى الكبار يخترعون منهم
      المشكله الحجاب معناه ستر شلون يبون يلفتون الأنظار.جان ما تحجبوا

  8. مساء الخير

    سوري على سوء الفهم كنت مستعيله وانا اقرا ما استوعبت عدل صاجين اخوانه في المرور لي قالو ” في السرعه الندامه و في التاني السلامه” 😉

    أنا اقولك اهم يتحجبون عشان اهلهم و يعني عشان واجب فرضه علينا الله حبيبي بس تدري هالبنات مساكين ما خذهم طيش الشباب يبون يكونون على الموضه يعني استايل و يبون يحسون بأنوثتهم و جمالهم من نظرات الشباب بيعيشون شبابهم و ما راح يصحون إلا اذا شافوا الموت بعيونهم يقولون انطر لما الله يهديني و بعيش حياتي لي ال50 و بعدين احكر عمري بالحجاب الصح و بكل ما افرضه الله من ستر و عدم تبرج و…الخ بس منو ضامن عمره الحين شباب راحوا من جيس اهلهم و هم بعز شبابهم و اغلبهم من حوادث السيارات و القز في الشوارع
    الله يهديهم مرحله صعبه صج بس الله الهادي الحمدالله الحل موجود ان البنت اتحط حب الله وامها وابوها بين عيونها و الام والابو لهم دور مهم في حياة بنتهم لازم يحبونهاو يعطونها حنان ويظهرون اعجابهم بشخصيتها و يمدحون جمالها و يشبعونها كلام حلو 24 ساعه و لا يسمعونها كلام يدقرها و البنت حساسه واتحب الكلام الحلو لان البنات عاطفيات وقلوبهم أهي الي تتحكم فيهم نادر تلقى بنت ابوها قلبها صخر و عقلها اهو الي يتحكم فيها و الامهات لا يقصرون بالدلال بس مو الدلع الزايد لي كبرت تقولهم مالكم شغل بروح شرم الشيخ وبلبس مايوه و بستانس على كيفي لا خلكم بالمعقول الشي لي زاد حده انقلب ضده باجر بيصيرون تروفه ومالهم خلق التعب و تحمل المسؤوليه باجر لي كبرتو وعيزتو ما يشيلونكم ولا يقومون فيكم كل منه يحب نفسه, تقدر تزرع حب و تحصد ود واحترام بس بذكاء
    جذيه البنت اذا تربت على الكلام الحلو بتعرف قيمتهاو اشكثر اهي محبوبه و غاليه عند امها وابوها وما راح يهمها راي احد و اي كلام حلو تسمعه ما يأثر فيها و لا تاخذ بمقولت اكل ما تشتهي والبس ما يعجب الناس و كلكم حفظوا اعيالكم وغنو~ ~ ~
    شويخ من ارض مكناس وسط الاسواق يغني ايش علي انا من الناس وايش على الناس مني 😉

    و السموحه ادري كثرت بالتعليق فيني حجوه اتقرقع بفلبي و قلتها و سلامتك وتعيش الله يطول بالك علي و لا تكلف على روحك وترد 😉 بس كافي قلت الي عندي و مشكور وايد وايد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: