الزعل لا تخلو منه أي علاقة حتى الحبايب يدشّ بينهم هالوكيح المدعو “زعل”.
وهذي هدية مجانية لكل عاشق زعّل حبيبته(والعكس بالعكس)
أستعملوها وأدعوا لي (طبعا إذا لم يتم تطبيق البيت قبل الأخير):
إنتي نثر,إنتي شعر ,أنتي ×أعذب كلمات القصيده
أنتي قصيص الحب بقلبي مطبوعه ×مو بصفحات الجريده
إنتي الهوى إنتي العشق ×وللحب عنوان برِيده
شوفتك بشاره تفرحني ×تنوّر أيامي تخليها سعيده
شوفة وجهك الفتّان متعه دنيتي× ويجعل حياتي جديده
اسمك بقلبي ومنه تهنّى× وشوفتك بالفرحه تزيده
إنتي هوا الروح كل أيامها × و دُواها بالأيام الشديده
قلبي العيار على الفخ × عينك بدون قبّي تصيده *
حبّك ملك مهجتي × و بالفكر صار مذهب وعقيده
و السفيه لين أخطأ × يرجو العفو من أهل العقول الرشيده
وأنت راعي العقل وكِلّك حكمه × الطيب أصلك و أخلاقك حميده
لك فكر و راي ما يخر ماي×خل العفو من أرائك السديده
مهما تجسي علي أحبك × وأحبك لو تطقني بحديده
من يقدر يزعّل العسل × وأنت شهد وأنطع من العصيده**
*العيار هو الطير الذي يحوم كثيرا حول الفخ ,والقبّي دودة حية تستخدم طُعم للصيد
**العصيده:إللي مايعرفها (وبدون زعل) يروح يسأل أمه!
T7l6m 
من وين مطلع كلمه أنطع بس ؟؟؟؟
العصيده إلي ما يعرفها مو يروح يسأل أمه أخاف أمه ما اتعرفها
إلي ما يعرف العصيده خل يسمح لي مو خليجي
مساء العصيده الناطعه
مساء النور
ومساء عدوى التحلطم السارية في الأنحاء
حياج يالجودي ولا تصيرين قاسيه على اللي مايعرف العصيده
الحين كل شي تغير .حتى الرهش سووه بالشوكولاته.
أسعدنا مروركم
انت شاعر ؟
انا اول مرة اقرالك هالوحيده
الله يباركلك بهالباكورة الوليده
كنت احسبك بالتلحلطم فالح
أثر حتى الشعر تـجيده
ليتك تكتب التحلطم على هالبديده
مو موزون ومكسور مو مشكلة , نريده
المهم التحلطم ساخر يوصل ع طول سيده
*
*
والعيار والقبـي فكرة برايي بعيده
مثل العاشق للمعشوق, سيد لعبيده
يطلب رضاها والعفو ,وهي عنيده
والعسل والعصيد مثل مرق وثريده*
هذا حلو وذاك مالح اشتفيده
يغمز لقلبك العيار برمش الطريده
وتتهنى معاه بقصة عشق عتيده
لا يغيرها حاسد اهدافه لبيده
ينوي يـخرب علاقة وطيده
انبنت على فخ وقبـي وشريده
تثت * عقب مالها تردد رديده
صادته بأشباكها وحلف لا عاد عيده
العياره مع القبي تاب ماعاد يعيده
الثريدة * التشريبة
تثت * صوت لحظة صيد الفخ (;
حقيقة استمتعت وكانت خفيفة دم
ولها معنى وتحلطم قلب موفق
^
^
^
شايب مزيون
ماشالله عليك وحقيقه انك مزيون
وكلامك لطيف على القلب وخفيف على العيون
بالعشق كلامك مطرز وبالحب وصفك معيون
على التعليق شاكر وممنون وفوق الشكر لك مديون
زيارتك غاليه وتعليقك عندي أونس من مليون
نورت مدونتنا وشبيت السريّ وليتات النيون*
حياك الله شايبنا المزيون دايما تحرجنا بالتعليقات الونيسه والمشجعه والمفيده
وما نقدر نوفيك حقك بالرد المناسب
*نيون:لمبة غاز
هههههههه
يازينك يا تحلطم
دمك خفيف يالشيخ عسى الله يحفظك
والقصيده عجبتني
حيل عجبتني
يعني صج كويتي يتغزل بحبيبته
جريده وعصيده ويطقك بحديده
🙂
عجيييبه
عسى الله يسعد قلبك دنيا واخره
رساله صغيره حق عزيزنا الشايب المزيون
ردك لا يقل خف طينه عن رد تحلطمنا
🙂
رغم اني زعلانه منك بس يالله
انا قلبي طيب
صباحكم خير يارب
صباح الخير وويك أند سعيد
الله يسلمج ويسعدج ويهنيج يالزين
هذا من ذوقج
وأهم شي أن الجريده والعصيده والحديده تكون نتايجها إيجابيه
حياج الله وأسعدنا مروركم
ما أعتقد إن حبيبكم هذا أنطع من العصيده
🙂
جني باجر بسوي لي عصيده وأحلي فيها
و..خووووووش قصيده
تسلم
الله يسلمج
والله يسامحج بعد
الحبيب اللي مو أنطع من العصيده المفروض ينطق بالحديده
وعليكم بالعافيه بعصيدتكم