لا أقصد بالعنوان كثير من الأشخاص , رغم إستحقاقهم للوصف,فهم غير معنيين بموضوعنا
لا أقصد
من يقترب منك,أو يدخل عليك غرفة مكيفة فيفوح منه عبق رائحة عرقه (رطبا أو جافا) و عبيرها الفتّاك
ولا من تشاهد على ملابسه بقايا طعام أو بقع من مصادر مختلفة ,أو من يستخدمها لمسح وجهه وما يحتويه من إعضاء
ولا من ترى على أطراف عينيه أو فمه أو عند فتحة أنفه بعض الإفرازات
وكذلك ليس المقصود بالوصاخة المعنى المجازي للكلمة حينما نصف صاحب اللسان الزفر أو النذل والمصلحجي والأناني بأنه وصخ(سنخصص لهم بوست مستقل)
إذن من هو الوصخ؟
الوصخ والقَلْقْ من ينقل قذارة شخصيته وينشرها على الملأ نهارا جهارا دون إستحياء أو خشية من نظرة الناس له وربما بسبب عدم إحترامه لنظرة الأخرين أو للأخرين عموما.
الوصخ من يركب سيارة نظيفة في ظاهرها وبدلا من أن يحتفظ بوصاخته في سيارته يرميها خارجها
الوصخ من يعتقد أن الكويت وشوارعها مزبلة له وللي خلفوه
واحد كاشخ بجاكوار رمادي والرقم شكّة تسعات بينهم صفر يخلص الأخ من سيجارته,ليش أطفيها بالطفايه؟
يقوم الأخ يحذفها بالشارع.
راعي الأودي الأبيض بط جبدي الوصخ.نفس الحركه الخايسه.وعند الإشاره وجدام الناس.
واحد عنده جمس .الإشاره توها شابه خضره ,قبل لا يحرك قَطّ كلنكس من دريشة سيارته.
سؤالي للوصخين ,
ليش توصخون ؟
ليش ماتخلي وصاختك بالسيارة وإذا وصلت عند زباله تخلص منها.فيها تعب على جنابك المعظم؟
ليش تستسهلون توصخون ديرتكم وتخافون توصخون سياراتكم؟
تعتقدون شنو يقولون الناس عنكم؟
عيالكم شلون بيطلعون,شلون يشوفونكم؟ترضون ربعهم يقولون لهم أبوكم وصخ؟
تهقون شنو قصده راعي السياره إللي وراكم يوم طق لكم هرن عقب فعلتكم السوده (سوّد الله ويوهكم)؟
شباب بكل موضوعيه إنتو وصخين
الناس يشوفونكم وصخين
والوصاخه مو زينه والذرابه والنظافه صفات جيده
شوف يالوصخ إذا سمعت هرن ترى الناس تقولك “يالوصخ لا توصخ بلدنا”
ورجائي لكل من يرى وصخ بالجرم المشهود يعطيه هرن,علشاني.
T7l6m 
السلام .. والله و يبتها عالجرح .. جد جد يقثوني هالاشكال و المشكلة مرات تلقى مو كويتيين هم يسوون هالشي و انا ما الومهم لأن الكويتيين اصلا يسونها بس شنقول؟! ما اقول الا من امن العقاب اساء الادب و بعدين يقولون شوفوا اوروبا و امريكا .. يااااااااااااو والله انقهرت .. المهم مشكوور اخوي وحيلك فيهم
فعلا يذبحون الواحد من القهر
وبعدين إساءة الأدب نتيجة قلة التربيه وفعلا غير الكويتي ماينلام إذا الكويتي ما يحافظ على ديرته
حياكم الله ولا توصين حريص ومقهور
اول شي هذا ردي على ردك باخر جزء من القصه
اكتشفت شكثر الموضوع متعب
نحمدك يااارب اخيرا لقيت اللي يفهمني
لما يحنون علي يالله وين الجزء اليديد
يالله متى بتنزلين البوست
بلاهم ما يدرون يا تحلطم حجم التعب في كتابة كل جزء
واللي يقول لي البوست ترى قصير ما شبعنا
يااا الهي
بس والله من غير مبالغه القصه كانت مشوقه يالشيخ
وانت ملكت ادواتك صح
الحين تبلش تصقل الموضوع هذا وتتحكم بهالآداوت عدل
وبالتالي تبلش بالقصص المركبه
وسهالات ان شاء الله
اما سالفه الوصاخه فحدث ولا حرج
نسيت اللي ياكل سندويتشته ويحذف الجيس بالشارع
نسيت اللي واقف بمواقف الجمعية وينظف طفايته المليانه سجاير بالموقف على الأرض
نسيت اللي قاعد على كرسي الإنتظار بالمستشفي ياكل ويمسح ايده بالكرسي
نسيت اللي يركب الأصانصير بيده جيس بطاط يخلصه يقطه بالأصانصير ويمشي
واللي بحلجه علج عزك الله يتفله على القاع ويمشي
واللي ..
واللي ..
واللي …
برايي انا اللي وصخ في بيته وصخ بالشارع
واللي ما يحب هالديره اهو اللي ما يهمه نظافتها
روح على اي واجهه بحريه يوم السبت الصبح وشوف الزبايل وبقايا الفحم وتكرم البامبرز وقشور البرتقال
واحنا عيالنا يتطوعون بلوياك عشان ينظفون الشواطيء عقب هاللفو..
وترى ما سميتهم لفو لأنهم مو كويتيين
سميتهم لفو لأنهم من غير اخلاق ووصخين مثل ماسميتهم انت
اسمح لي على الإطاله
بروح اكمل كتابه
🙂
صراحه ذكرني تعليقج بناس وايد أوصخ من إللي كتبت عنهم
أما بقايا السندويشات وقواطي العصير فهذي عقدتي
والواجهة البحرية صراحه عار على المجتمع إنه يسمح لبعض أفراده إنهم يوصخون بحرها الجميل
يسولف لي صديق إماراتي,يقول الحدايق العامه عندهم تصير بعد العطلات مزبله من كثر المخلفات اللي يتركها رواد الحدايق
مع أن براميل الزباله موزعه في الحديقه .يقول قامت دوريات المرور تسجل مخالفات على كل سياره موجوده في مواقف الحديقه
“إلقاء مخلفات” يقول بعد جمعتين صارت الحدايق نظيفه.
السوأل شنو يمنع مفتشين النظافه بالكويت إنهم يمارسون إختصاصاتهم؟
شكرا للإطاله وحياكم الله
آآآآآه
الموضوع هذا قاثني وقاهرني
ومو مال هرنات..والله رشاشات ماي تحسسهم فيها إنهم فعلا وصخين
آنا أحيانا أنحرج إني أدق هرن لما أشوف أحد يسوي جذي بالشارع
أحسها عيب ومو عدله…
يبا جيس الصيدليه وعلقه على يدة المساحات يم السكان
وإلا درام خمام صغير كبر حليب اليهال وحطه ورى يم عيالك وبس..
النظافه سهله وحلوه بس وين اللي يفهم..
أأأأف ..أحس بعد لي لحين ما عطينا الموضوع حقه
تصدق..هالظاهرة منتشره بشكل غير طبيعي
وصايره تنرفز
الله يعين هالديره..شنو متحمله بشر
قواك الله
الله يقويج
وآسف على المقثه
إللي يبي يصير نظيف وما يوصخ ما راح يتعب وعند زباله بكل مكان
الناس مو محتاجه نصايح الناس محتاجه تقدر بلدها وتحافظ عليها
حياج الله أختي ولا تلوموني أتحلطم
أنا حسبالي بروحي إلي هالموضوع يزعجني ما هقيت الكل ..
صج يحرون و الهرن أنا لاحظت روحي لاشعورية ايدي اتعلق عليه و بديت انتبه و اضبط نفسي بس صج صج يحرون احيانا ودي انزل اقولهم ما تستحون إنتوا جذي وصخين في بيوتكم و القهر لي صارت بنت و مرتبه عمرها و اتمد ايدها من الدريشه و إنت بكرامه و الحضور و ترمي كلنكس أو قرطاس إلي هو .. ومن جم يوم صادفت حرمه تاكل حب و كل اشوي تنفظ ايدها بالشارع و الشارع زحمة و تقريبا واقف و منظرها فعلا مو حلو ولا ذرب بس شدقول ناس مو متعلمه على النظافة للأسف ..
و ناس تعم على ناس ..
الموضوع يزعج كل شخص عنده دم وإحساس
منو يقبل بالوصاخه والقذاره في ديرته إلا الوصخ جينيا وأُسريا
مع الأسف حتى النماذج إللي ذكرتها ناس شكلها زقرت وكشخه وسياراتها حلوه ونظيفه من بره لكن الوصاخه بأهلها
أنا لي الحين ماضبطت نفسي مرات ,وخاصة إذا بروحي,أدق هرن وإذا مريت يمه أخض راسي
عسى الله يهديهم
حياج الله أختي
وأسعدني مروركم
فعلا مقرفين و ودك تدوسهم مو بس تطق هرن
بعد اذنك سويت كوبي بيست ودزيته برودكاست
حياج الله وماتحتاجين إذن بالعكس مشكوره عممتي الموضوع
على فكره,حاولت أرسل تعليق على بوست”شكرا” وما قدرت.
عسى الله يرحم العم ويرحم موتى المسلمين
والحمدلله كنتم قريبين من بعض آخر أيامه
لايبقى للشخص إلا الدعاء من أحباءه
ولا يبقى منه إلا الذكرى الطيبه
صدق من سماك متحلطم
تحلطمك سريع ووايد
وايضا مثير
وجدير بالاهتمام وصححح
*
*
الذاتية اللي نحتكرها
ونـحجزها خلف اسوار الشفافية
لكل منا شخصية غامضة
تقبع خلف ابتسامة حذرة
أو دمعة شفقة
لكل منا وجه آخر
الضميـر
هوه ماغيـره
الذي يؤنبنا ع مدار
الخلوة
أو الوحدة
هذا المسكين الذي يعاني
هذا الذي سبغ مـحياه السواد
وخـجل واستحياء
حين يكشف عنه
نـجده بريء منا ومم نفعل
*
*
الضميـر
التحدي بينه
وبين النفس الأمارة بالسوء
دائماً
قد ملأت صفحة سوابقه
منها , تلك النفس
التي لا يعرف له لون ولا شكل
ولا حجم
من منا يتخيـل شكلها ؟
وما هو لون النفس ؟
*
*
قيل لنبي الله صلى الله عليه وسلم
اوصف لنا النفس الأمارة بالسوء
قال , لا أريد أن تكرهوا ما خلق فيكم .
*
*
الحرب بين النفس والضميـر
جهاد
والجهاد رضا للرحمن
لو كنت تحمل ما تحمل من المعاصي
جهاد النفس
وشن الحرب عليها
وعدم إطاعتها هي طريق الصواب
أضعف ماخلق الله بالبني آدم
النفس , سهل أختراقها
وسهلة للإستعباد
لذلك هنا تحدى
الشيطان الرب بأن ( لأغوينهم جميعاً ).
وأذن الرب له بالتأثير عليها
إن أستطاع
أختياره من بني البشر
ليس العقل
أختار الشيطان النفس ليروضها
وأسعبدها مذ الأزل
وغواها
فهي مطيعة له ويتحكم بها كيفما شاء
*
*
الضميـر إلآهـ
إلاهي كمتحدي اول للنفس الأمارة للسوء
الضميـر صدى لآيات إيمانية
تكوّنا على دستورها كااا بشر
وأنتشرنا فلات بالفلات
*
*
الذي نراه من أكثـر خلق الله
تـجاوز على قانون الحياة
وفطرة بنو آدم
اللي كرم الله خلقها واحسن صورتها
وأفصح عن لسانها
ونمى لبها
مانراه من بعض البشر
من تصرفات قد تكون فينا
ولكن ليست كمثلهم بألقاء
كلينكس أو علبة كولا
قد ننحدر بأسلوبنا بمنطقنا
ويمكن بتفكيرنا وظننا الآثم السوء
اعتقد لنا قذارة لا يراها
إلا هم
هم الذين يلقون كلينكس أو علب
يمكن لا يظنون السوء
أعتقد قذارتهم خارجية
ومنهم نظيف ضميره
وينظر لنا بأن لنا ضميـر قذر
عكسهم
*
*
لا يوجد فينا الكامل
ولا نصل للمثالية
فكل صفة لنا فيها
هفوة
ولنا كبوة
ولكنها بنسب متفاوتة وتختلففف
بمعنى أقل وقع وتأثير من الغير
نرجع الى نمو تلك الخصل فينا
مذ الصغر
ان كنا شربناها على التوالي وبالتساوي
وصلنا الى اتزان بشخصياتنا
وإن كنا تعلمنا اشياء
وغابت عنا اشياء
صرنا هدف ومقصد للنقد
بمكامن لم تـنمو مع شخصياتنا
وهكذا دواليك
نبقى ناقد
وبعز النقد نـحن هدف
ورضا الناس ,, لا تـُدرك
*
*
دائماً الذات
دائماً نحن نقطة البداية
للصلاح
فأنا صلح حالنا
أمر البشر يهون
^
^
^
شايب مزيون
ملاحظة: هنا مدون او مدونة
تكتب بشكل شفاف
وتنتقد حالها
وتعري الستر عن أخطاءها
اعتقد انها / انه يلد من جديد
أقرو له
شخصياً عجبني مايكتب
وطريقة اسلوبه
هذا عنوان مدونته
http://www.lettersfrombeneaththegulf.blogspot.com/
واتمنى تتفاعلوا معها / معه بتعليقاتكم , يستحق القراءة
والتفاعل حقيقة
لانه ضميـر يتكلم بملامح نفس سيئة الشكل والسيرة
شكرا على التعليق المفيد بكلماته ومضمونه
مافي شك لا أحد منا كامل ولا ندعي الكمال
نحارب نفسنا الأمارة بالسوء نغلبها وتغلبنا
وحينما تغلبنا ننتقد نفسنا ونندم ونستغفر الله
وبالمثل ليس هناك شخص كله مساؤي ربما ينظر لنا صاحب الضمير و يلقي القاذورات
نظرة سلبية ولكننا حددنا العيب بدقة وأشرنا إليه بوضوح
نحن لا نعلم سريرة هؤلاء ولكننا ننتقد سلوكهم وبالأحرى ننتقد تلك الجزئية من سلوكهم
أعتقد لنا حق فنحن نحاسب أفعال ظاهرة لا أخلاق كامنة
حياك الله أخوي منورنا بمرورك وتعليقك
وبإنتظار المزيد