خلصنا من القصه بعد طلعة الروح هذا وكلهم شخصيتين وموضوعها تقريبا مافيه تعقيدات.ماشالله على اللي يكتبون قصص موضوعاتها مركبه وشخصياتها وايد وأحداثها متشعبه.وأحس عقب ما كتبت الجزء الأخير إحساس لاعب عقب مباراة,بغض النظر عن النتيجة,ماوقف فيها لحظة. أبي أريّح شوي.
مع الأسف ,وعلى ما يقولون إخوانا المصريين “يموت الزمار وصوابعو بتلعب” .ماقمت أعرف أوخّر أصابعي عن الكيبورد,أنشر بعضه ومحتفظ بكلام وايد كتبته.واليوم وايد طلعت لى موضوعات ,مثل شنو؟
مجلة نسائية إعلاناتها ترس الشوارع أسمها “ماري كلير ” .ما أعرف المجله ومو وقته ,ولا قصدي, أسوي دعاية ضدها لكن إعلانهم ياب لهم الكلام.
“نقرأ أنوثتك” بذمتكم هذا إعلان مجله .خابر الناس إهي إللي تقرأ المجله لكن هالمجله بالذات تحطها المره جبالها وتقعد المجله تقراها.حتى الذكي مدير التسويق أو الإعلانات ماعنده سالفه.أكيد قصده إنهم تعرفوا على إهتمامات وإحتياجات المرأة والموضوعات إللي تحب قراءتها وحَطّوها بالمجله لكن طريقة صياغة الأعلان وايد ضحكتني وخلتني أفكر بجرايدنا شيكتبون عن نفسهم لو يبون يحطون إعلان مثل الحجّيه ماري كلير.
القبس:نقرأ رأس ماليّتك .
الجريده:نقرأ ليبراليتك .(وبالزاويه اليسار صورة وحده حلوه,وأي خبر عنها يمشي)
الوطن:نقرأ زغالتك.
وإخذ عاد قرايه من باجي الجرايد, كل جريده شلون تقراك . وتكون إعلاناتها “نقرأ :
طائفيتك,بلاغة شفّك(الجريمه),ملاقتك ووقتك الفاضي(ليالي),رصيدك بالبنك(المال والعقار),مصلحتك,عجافك ,طفولتك(مجلة ماجد).
وبما أن مجلة ميكي للأعمار من (6 إلى 66) فإنها تقرأ طفولتك ومراهقتك وشبابك وكهولتك ليما تخرّف (وإذا بتقرأ كل هذا وخروا عنها لا تفضحكم ).
وأخلي باجي الجرايد والمجلات لتقديركم لأني صراحة ما أتابع صحافتنا المحليه .
مروريات:
المرور عندنا معقّدني وسبب رئيسي إني حطيت المدونه.
فوق شينه قواة عينه:واحد قليل أدب طايف الحمره من أم أمه وفوق هذا يتسحّب جنه يتمشى عالكورنيش ويا حبيبته .يا الأخو في ناس شابه لهم الخضره وينطرون جنابك تعدّي.
موقف مروري متكرر الله يكافينا وياكم شرّه:
واحد مسوي شغله بايخه(لكم الإختيار) وهو طاير.المتضرر شب العالي .
خفف راعي الشغلة البايخه سرعته ,صاروا جبال بعض.الأول يبصق على الآخر.الثاني يرد التحية بأصبع واحد.
قد يكتفون بذلك أو تتصاعد الأمور حتى تصل إلى مستشفى الرازي.
يازين المرور عندنا كل واحد يحسب الشارع مال ابوه.
T7l6m 
تحلطم قد ماتقدر تحلطم
وشوف واكتب وتحلطم
قبلك تحلطمنا وماكو فايدة
ماراح اتخلص
لو بتنطر يصلح الحال
مـحـال
انتقد في كل شي
مسموح لك
لان اللي حوالينا
اجناس واصناف
وكل يلعب دور
ويمثل نفسه على مسرح
حنا مشاهدين ونقاد
ويمكن من ضمن الممثلين
ولكل منا رسالة
وكيف نوصلها
مثل ماوصلوها لنا
اللي سبقونا
واللي وصلوها لهم
اللي سبقوهم
كل منا يلعب دوره بالحياة
*
*
لو تحسب كم فكر يفكر
ويترجم افكاره افعال
وكم تفكير سوي وصح
وكم افعال تتولد صح
وكم تفكير غير سوي
وكم افعال متهورة
وكم فكر جاهل
يُولّد افعال طايشة
يتضرر منها الاسوياء
وتكون ردات افعالهم
احيان وخيمة عواقبها
تضر الطرفين
بسبب جاهل
بسبب ناقص يدعي الكمال
وما اكثرهم حولنا
سيجد له طائش مثله
وتعلمه الدنيا
بأن العقل زينة
*
*
ما تخلص لو تدقق
تبي تتعب
على حساب صحتك
هيه الاوادم
اختلفت من زمان ابوها
بين هابيل وقابيل
واقتتلوا
لانهم تـخالفوا
فالاختلاف افسد الود
ومن قال غير ذلك
غير صادق
لان قاعدة ابو البشر وامها
خلاف ,
خلاف على ثـمرة شجرة
وإلا لما نزلنا الى الارض
نحن كسلالة
كوكبنا كاااا ارض
وجد للمخالفين
على حد سواء
وهنا نسب بالخلاف
ولكن الكل مخـتلف
*
*
الجنة التي كنا بها <….مفترض
هي لغير المخالفين
من بادي الساعة
وفاز بها الملائكة
ونحن لسنا هم
نحن اطلق علينا بشر
انسان
مع سبق التكوين والايـجاد
وحسبت علينا
بالسالب والموجب
ولنا ميلاد
ولنا انبعاث وايفاد
الارض لم تك لنا
لولا مـخالفة ابونا لخالقه
ولولاه لكانت فقط
للشياطين
*
*
تحلطم رجعتني الى التحلطم
وايامو
وانا اللي نسيت
لياليه واحلامو
أبعد عنه
ليكون
بعيد عنك
^
^
^
شايب مزيون
يا حيا الله المزيون
والله يسلمك على هالتعليق الكافي الوافي
اعتقد اذا ماتحلطمنا وانتقدنا مافينا خير
على الاقل قلنا اللي نشوفه غلط والباجي على اللي بأيده القرار بالإصلاح
نورتنا بزيارتك
ولا تباعد
القصه و تداعياتها تبي الصج على قد تعبها بس تستاهل التعب كانت حلوة وايد
أما الإعلانات هي لضحك في غالب الوقت أكثر منه للإفادة و النادر إلي ينجح بشد انتباهك و يحقق أهدافه .. اعتقد في الغالب نكون تعودنا على استايل الإعلانات و نكون مهيئين لتقبلها بأي شكل كانت عليه …
أما المرور فأنت قلتها قليل الأدب صح و هو كذلك
في مقوله لدكتور الخليفي شفتها أمس بتويتر يقول :((المحترمون يحتفظون بالنظام حتى في غياب السلطات لأن النظام لهم وهم يملكونه . و الهابطون في احترامهم لذواتهم يراعون الجو العام فمرة ومرة !!! ))
تحياتي و أمنيات بنهاية اسبوع سعيده و بداية اسبوع مثمر لك وللأسرة الكريمه
شكرا على تكرار الكلام المشجع عن القصه
مع أن واحد من الشباب وصف النهاية بفلم هندي من كثر ماهي سعيده
وهددته بنهايات القصص القادمه,إذا الله أحيانا,البطله تموت أو البطل تدعمه سياره أو يتهاوشون الأهل يوم العرس
والله صدق الخليفي ومع الأسف الهابطون في إحترام ذواتهم ترس الشوارع
حياج الله أختي وأسبوع مليء بالإنجازات لك ولكل المتابعين
🙂
نايس بوست عقب القصه
ولا يبرد حيلك نبي قصه يديده..
تعودنا على هالموووود…
قواك الله
شكرا أختي والله يقويج
المشكله القصص صارت هاجس بالنسبة لي وبالبال أكثر من فكره
الله كريم بس خل نتحلطم جم يوم عقبها بإذن الله نطلع بقصه
حياج الله منورتنا
عزيزي تحلطم
تركت لك تعليق على الجزء الأخير من القصه
ان شاء الله اكون وفيتك حقك
🙂
شكرا للمرور والتعليق
وتعليقج ما وفاني حقي
أعتقد أني أخذت أكثر منه