يقولون التجارة شطاره .وآنا مقتنع أنها عياره
تجارنا كما عهدناهم بلاعين البيزه ويتعلّثون بأي شي علشان يرفعون الأسعار.يسولف لي صديقي المقهور(الله يحفظه من القهر) واصله خبر أن تجار التواير ناوين يرفعون الأسعار .يقول سئلت ليش وشنو السبب, أو بالأحرى شنو العذر,قالوله بسبب أوضاع اليابان.يقول رديت عليهم بس التواير توصلنا من كل العالم من البرازيل والمانيا وكوريا وأندونيسيا وهونج كونج ودول ثانيه.ردوا عليه صح كلامك بس الماده الخام أصلها ياباني.
بذمتكم مو عياره و جمبزه وبوق عينك عينك.
وإذا كان ذلك كذلك,توقعوا إرتفاع أسعار الأغراض إللي نستورد بعضها ,أو كلها,من دول عندها بعض المشاكل:
حلوى ,ومتاي, وماي لقاح ,ومرقدوش
بعض الفواكه,ومربى المشمش,وقمردين ,وشوكولا غراوي,مخام وممسحات,بالإضافة الى النخي
عسل,بن ,قات(صج مانستورده)
طماط,وزلاطيمو
وإذا قاموا الإيرانيين على طغيان وقسوة نجاد ونظامه توقعوا إرتفاع أسعار
الجز,والساهون ,والعسل الفاتح,والسجاد ,والفستق ,
ناهيك عن الآش .
الله يحفظ جميع المسلمين ويحقن دماءهم ويصلح ولاة أمورهم
ويا تجار بسكم وكفايه
وكل شي ترفعون سعره عندكم له مناسبه.
وديروا بالكم الناس على طرّيف,فجأة وإلّا مجاميع تهتف
“الشعب يريد إسقاط التجّار”
مايسوى تقوم الناس عليكم بسبة جم دينار وإنتو الله يزيد ويبارك مو ناقصتكم بيزات زياده.
ملحوظه:لا يطوفكم الجزء الثالث من القصه.ترى إتحسّفون.
T7l6m 
اكيد التجار بيرفعون الاسعار دام مدير عام غرفة التجارة والصناعة سابقا هو نفسه وزير التجارة والصناعه حاليا طبيعي يبي يغض الطرف عن ربعه لأنه مرده لهم (حاميها حراميها)
الوزير ماله شغل
تجارنا يرفعون الأسعار لو أنت تصير وزير
مو تنسانا
حياك الله وإستمر بالمتابعة
أسعدنا مشاركتكم
اكيد عيارة ذاك من ذاك الشاطر الشريف.
صديق مصري يحجي لي عن البياعين و اشلون يحلفون و يقسمون جذب ؛ يقول ان البياع قبل لا يطلع من بيته ، يحلف على المصحف ان كل حلوفه و ايمانه بالمحل راح تكون جذب !!!
اشرايكم ؟
يخرب بيت الفلوس
شلون يحلفون جذب مايخافون من الله
تصور عندما تقول دعاء السوق تكتب لك الف الف حسنة و تمحا عنك الف الف سيئة
وهذا أحد شواهد البلاوي اللي تصير بالأسواق
لااااا
كمل باجي القصه بعرف شيصير بعد ما عرف انها مي
🙂
بإذن الله مستمرين
وإن شالله يعجبكم القادم من أحداث
الله يفكنا من هالتجار بصراحة نهيبة
في كل مكان بالعالم تنزل الاسعار الا في الكويت ! مادري على شنو ..
الله المستعان
حياج الله انجنيرا
فعلا نهيبه
والأسعار اللي تنزل بالعالم إنسي تشوفينها بالكويت
فقط قارني أسعار الإتصالات والإنترنت بدول العالم وبالكويت
والله المستعان
شنو هالترتيب شوكولاااا و عقبها مخام و مماسح مو راكب ..
وشنو زلاطيمو ؟؟
إيه القصه أنا مو ملحقة عليها من الأول النت كان فاصل و وايد شغلات طايفتني
إن شاء الله لي جدام بتفرغ لها وايد امدحوها لي و يقولون اسلوبك شي اشعليه :))
تبارك الرحمن وما شاء الله
سلام
ضروري يركب؟ بس صج الشوكولا قويه وبعدين مخام.وجهة نظر
زلاطيمو حلويات مشهوره بالأردن
وبكل أمانة تشققت من كلامج عن القصه
يزاج الله خير
وإن شالله يشبك النت ونشوف رايج بالقصه
حياج الله ,وشكرا مجددا
(آخر كلمتين بايقهم من القصه)
يااااازين زلاطيمو بس..
ليش كلما يبت طاري شي قديم واحبه أحقد عليك
يعني الحين من بييب لي زلاطيمو؟؟؟؟
حلوة دعاية القصة آخر البوست
عجبتني..
🙂