إحتفالا بأسبوع المرور الخليجي أبت الإدارة العامة للمرور بالتآمر,قصدي بالتعاون,مع وزارة الأشغال إلا أن تُشعر المواطنين والمقيمين وكافة مستخدمي الطريق بأن هناك شيء ما.
أكيد لاحظتوا الإزدحام المروري الرهيب مؤخرا.آنا أمس قطعت المسافة من الضاحيه إلى الروضه بساعه إلا دقيقتين هذا وآنا كنت على الخط السريع(المغرب).المرور النصّابين كتبوا على اللوحه إللي جنها قول على الخط السريع “المغرب والدائري الرابع مغلق حارتين” .كلنا ندري أن الخط السريع أربع حارات والمفروض على كلامهم حارتين مسكّرين و ثنتين شغّالين .يوم وصلت عند الزنقه (بالمصري مو بالليبي) إلا ثلاث حارات مسكّرين وحاره وحد شغاله والناس قاعدين يستخدمون حارة الأمان.كانت شاحنات موجوده على الحارات الثلاث المغلقه واللي شايلين طبقة القار عنهم.
حجم الزحمه هالأيام فاجأني تطلع من الديره تلقى السيارات واقفه من بداية الشاميه(على شارع الرياض). بالليل شارع دمشق واقف من أول الفيحاء.الربع يقولون شايفين العمال يبدلون القار على الدائري السادس الساعة وحده الظهر.
الموضوع جدا مزعج.ماتدري سوء تخطيط بتنفيذ عدة إصلاحات في نفس الوقت,أو مقصود علشان الناس ماتطلع من بيوتها؟
T7l6m 
المشكله مو بالطلعه العاديه
المشكله بروحة الدوام الصبح
يعني اطلع من بيتي الساعه 6 مثلا؟؟؟؟
ياربي والله ابي هلوكبتر بس حق الدوام
وريولي اللي تخدر من دوسة البريك والبانزين على التوالي
عندك اياهم زين ما سويت فيهم
أمس آنا ما إستخدمت دوسة البنزين مايمدي أدوس بنزين
هبابي أشيل ريلي وأحطها على البريك
شسويت فيهم آنا أصلا ماقلت شي ولا بردت جبدي فيهم
عسى الله يصلحهم
قعدوا في البيت و تابعوا الأخبار ..
و ادعوا للبحرين …
مع تحيات الإدارة العامة للمرور
P;
أخبر قبل إذا بغوا يسكرون شارع يطلع الشرقاوي على التلفزيون و يقول بدال هالشارع روحوا هني وين الشرقاوي تقاعد ؟؟
والله صح كلامج الظاهر هذا اللي يبونه المرور
ما أذكر الشرقاوي
خبري يوسف السعد
أنا من الأعصاب والتوتر من امتحاناتي…
بجيت بنص الزحمه…بجي القهر …احي السيايير اللي يمي يوخرون عبالهم عندي حاله طارئة!!!
ياخي شهالزحمة…من السره لي الشاميه ساعه الا ربع
نص ساعه بس عند اشارة دمشق!!
لاعت جبدي…وقلت شالسالفه وفعلا كل الشوارع مسكره!!!
مادري شالحكمه يشتغلون بوقت الذروة!! ليش مايشتغلون الفير.؟؟؟؟
استغفر الله احنا سوء التخطيط عندنا بكل شي يحظي…
مساك الله بالخير
صبحج الله بالخير
صج الزحمه مو عاديه أول مره أشوف مثل هالزحمه
والمشكله بكل مكان
وإذا تتسآلين عن الحكمه,ترى ماكو حكمه
إلا إذا كان الهدف يخلونا نقعد في بيوتنا ونطلع للمشاوير الهامه بس
الله أعلم
حتى انا مو مستوعبة شالحكمة وشنو قصدهم من الزحمة بأسبوع المرور؟!
كل الشوارع مسكرة وعمال يشتغلون ويبدلون قار!
يمكن طريقتنا الرسميه بالإحتفال بأسبوع المرور نسوي زحمه بشوارعنا
وما تذكروا الصيانه الا الحين وحق كل شوارع الكويت بنفس الوقت
عجبي!