يقولون الوقت كالسيف إن لم تقطعه قطعك
وإذا هالكلام صحيح نطلع كلنا مقطّعين وصله وصله
الوقت أصبح لا يمثل مسؤولية للكثيرين وكأننا مخلدون
حتى على المستوى الرسمي الوقت أصبح يكيّل بالبيدنجان (مع الإعتذار لسعيد صالح)
الزحمه تضيّع نص يومك والمرور عادي بالنسبة لهم
بتسوي معامله بسيطه يضيع وقتك ناهيك عن جزء كبير من أعصابك
التربيه قاعده تضيع أيام ثمينة من حياة عيالنا بتعليم دون المستوي وبدون تعليم ,بالغياب بإيعاز من المدارس, قبل وبعد وأثناء العطل الرسمية
الصحه عندنا تقصّر العمر بسوءها ناهيك عن الأخطاء الطبية والأهمال
المجلس والحكومه خبراء في تضييع الوقت (لا تعليق إضافي لأنه بوست ويك إند مو سياسي)
على مستوى الأفراد وسائل إضاعة الوقت عد وخربط
مولات تهتك عرض الوقت بدون منفعة حقيقية
التلفزيون حدث ولا حرج
الأيات كلها(Iphone,Ipod,Ipad) تستهلك وقتنا الثمين
التيلفونات والكمبيوترات تستنزف وقت
الدوام البايخ وغير المنتج وقت ضايع
المباريات (ويسمحون لي متابعين الرياضه) تكبر الكروش وتضيع الوقت
ماعندي إعتراض على إضاعة الوقت,كل واحد حر بحياته,بس أتساءل
هالوقت اللي نضيعه بأشياء كثيره مو وايد مهمه بل أن بعضها خرطي مانقدر نستخدمه بطريقة أفضل تعطي معنى إيجابي للحياة
متى آخر مره تأملنا طير يطير أو حشرة تمشي
متى تابعنا نمله تسحب حبه (وايد داسوها)
متى قعدنا نطالع شجره أو نخله وتعجبنا من إعجاز خلقها وحمدنا ربنا
متى فضّينا نفسنا فعليا حق عيالنا وقعدنا نسولف ونضحك بدون نصايح وبدون تلفزيون شغال
متى قعدنا نقرأ كتاب بدون مقاطعه
متى جابلنا البحر وتنشقنا ريحته وأنصتنا لصوت الموج
متى ومتى ومتى؟
يمكن هالبوست يحمل طابع شبه شخصي لكني أجزم أن كثيرين تحسفوا ويتحسفون على أوقات كثيره وساعات طويله وأيام عديده إن لم تكن أشهر وسنوات ضاعت من أعمارنا ,ولن تعوض,في أشياء أقل ماتكون مفيدة .
وهذي دعوة لي ولكم لنستفيد من أوقاتنا
لكي لا يتحول الوقت من سيف إلى قفشه
لاتقطع ولكن تحوس حياتنا وتجعلها دوامة لا تتوقف.
T7l6m 
الوقت مهم ان الواحد يرتب وقتة بالمعاملات الحكومية لا وقت لك من الانتهاء من معاملتك بس المشكلة اذا طيارتك باقي لها ساعة وتطير وانت للحين ترتب شنطتك والحر بالاشارة يفهم لك طبعا تحياتي
إذا الطياره بعد ساعه وأنت ترتب الجنطه معناه أنك كنت مشغول بشيء أكثر أهمية من الجنطه.
شكرا لك هالبوست كنت محتاجته وايد
مممممم يمكن فرق الوقت معاي أكثر لما عرفت سلة ..
و قليل من الناس إلي عرفتهم الوقت يفرق معاهم
عني ماله داعي أقول بس إني كنت محتاجه هالوقفة .. و الأسباب خلها على الله
🙂
أتمنى لك ويك إند مع الأهل يكون مثمر و سعيد
أنا كنت محتاجه وكان الموضوع مسبب لي قلق
وقاعد أحاول أستثمر وقتي وأرتبه
وأول النتايج تأخر الرد على تعليقاتكم
وتمنياتي لك ولأسرتك بحياة منظمة ومثمرة وسعيده
ساعات أحس إني فاشلة بتنظيم الوقت
وصج أحس الوقت سيف يقطعني بشكل يومي ويتعبني
وخاصة في فترات العطلة !!
بوست خفيف وجميل
يعطيك العافية 🙂
الله يعافيج
ويكافيج شر سيف الوقت
أسعدني مروركم والكلام المشجع وحياكم الله دوم
بوستاتك تستحق القراءة
تستاهل الخمس دقايق اللي امضيها وانا مجابله اللاب توب عشان اشوف تحلطم شقال واترك تعليق على كلامه
كل بوست يحمل فكره
واطلع منه باستفاده
اليوم انت تكلمت عن شغله انا دايما انبه اصحابي والقراب مني لها
عط نفسك حقها
لا تترك الحياة والتزامتها تطويك وتنسى ان الحياة ابسط من شغل ومسئولية وركضه
تعلم تتنفس بهدوء وتلمس مواطن الجمال بكل شي
انتهز فرصة السعاده اللي تييك ولا تنتظر لحظه احسن وفي علم الغيب
لا تطلب الكثير
راح تسعد بالقليل
البوست هذا رائع بعفويته
وبساطة لغته
وصدق صاحبه
عسى الله يحفظك ويسعد قلبك دنيا واخره
الرائع هو تعليقكم واللي أختزل في عبارتين كل الهدف من البوست
فعلا الناس طايره بالدنيا وغافله عن الإستمتاع بها
كلماتج رسمت إبتسامه واسعه ,
شكرا
وتسلمين أختي
السلام عليكم…
يمكن هالبوست يحمل طابع شبه شخصي لكني أجزم أن كثيرين تحسفوا ويتحسفون على أوقات كثيره وساعات طويله وأيام عديده إن لم تكن أشهر وسنوات ضاعت من أعمارنا ,ولن تعوض,في أشياء أقل ماتكون مفيدة.
موضوع يبجي،،، غالبا وقتي منظم لكن في أشياء إجبارية غير مهمة تضيع وقتي
جار البحث عن حل ،،، والكتب فعلا قلت حصيلتي منها ما أدري من وين الغلط مني وإلا
موضوع كبير للاسف محد منتبه له والبعض يستهزا فيه مع انه احنا راح ننسأل عنه
شكرا على الموضوع المستنهض للهمم
موفق ^_^
إدراكنا للموضوع جزء من الحل والتغير الإيجابي
وأنا شخصيا فقدت القراءه وبعد البوست قلت مايصير و حطيت القراءة كأولوية في برنامجي اليومي
شكرا لمروركم وتعليقكم
حياكم الله دائما
بوست راقي ومميز,فعلا احنا مانقدر قيمة الوقت ,فعلا شغلة تبعث الى الامل لما نشوف ونتامل واحنا بالمقابل نضيع الوقت,تحياتي لقلمك المبدع اخوي
حياك الله
شكرا على الإطراء والكلام الطيب
وفعلا أصبحنا إستهلاكيين في تعاملنا مع كل شيء حتى الوقت
وضيعنا لذة التأمل والتفكير في سبيل أشياء أخرى تافهه
أسعدنا مروركم ومشاركتكم
ولا تباعد
دايماً يقولون لي الوقت كافي لكل اللي نبي نسويه … وكل شي له وقته!
عصر السرعة .. العجلة.. احنا في دوامة .. سباق مع الزمن .. على شنو؟ وشنو انجزنا؟ ولا شي!
التنظيم هو الشيء الوحيد اللي يقدر يرتبنا ويخلق لنا وقت لكل شي .. وقت للراحة .. للتأمل.. للقراءة .. لكل شي نبيه
فعلا محتاجين لتنظيم وقتنا مع إعطاء وقت للراحة والأشياء المفيده جسميا وذهنيا
حياج الله أنجنيرتنا
أسعدنا مروركم ومشاركتكم