Articles

وينك ويا ويهك؟

In عام on 17/02/2011 by t7l6m

الناس تقول له وينك يالحبيب ؟
وآنا أقوله وينك أنت؟
مرات إييك بوقت مو فاضي له
ومرات إييك لدرجة أنه يتملكك ويأسرك بسحره ولذته
وتقعد تجابله ويجابلك وأخذ عاد سوالف
يوديك وتروح وياه أماكن
وينقلك إلى أزمنه سابقه ومرات قادمه
يخليك تسرد أحلامك وتعترف بتخوفاتك وتبوح بآمالك
تشكى همك وتقول إللي خاشه بقلبك
يخليك تطلّع شطانتك وعقلك
إذا ياك تغسل جبدك , وتتخلص من فضلات مخك
تندمج وياه وتنسى الوقت وتنسى الطلعه ومرات تكشت بالربع علشانه
ونيس وحبيب
مرات يصير دمه خفيف ومرررات دمه ثقيل لا وماصخ بعد
ماتدري أهو يشّكلك ولا إنت تستغله
صراحه فاقده والسبه الله يقطع إبليسه حسني
من صارت أحداث مصر وهو مختفي(مو وقته تنحى معاه “نصيع”)
اليوم إيي ولا إيي , لا اليوم إيي وهم ماكو فايده
خلاني أصرخ وينننننك,بعد إذنكم,يابن الكلب
صراحه علقني
تهقون ليش مختفي
يمكن يعتقد إني موحاشمه لأني أسميه مزاج
ويروح حق الناس إللي تعظمه وتحترمه وتدلعه وتسميه الإلهام

كل شي جايز!!!!!
بعدين شلون تبيه إييك وإنت تدلعه بهالأغنيه (مع ملاحظة قولة محمد عبده)

Advertisements

18 تعليق to “وينك ويا ويهك؟”

  1. هههه
    كل هالمغازل و المساحل
    حق ” مزاج ” او ماعليه عشان مايزعل “الهام “؟!!
    قلنا لكم مانبي مبارك يتنحى .. بتصير اشياء موزينه
    محد صدق ..
    شوف الحين هالونيس و الحبيب راح

    الله يجمعكم -وبينكم- على خير
    ومالك شغل ترى يتغلى عليك ؛)
    ان شاء الله بيرجع و قريب بعد هالبوست ههه
    أما القوله تحــــــــــــــفه ههههه
    ومن قده “مزاجك\الهامك” انك تهديه وينك يادرب المحبه ..
    على الاقل احسن من ” بحبك يا ح..ر ” هههه مو؟
    ماشاء الله عندكم اسلوب يشد القارء و يجذبه بكل سطر لي السطر الي وراه
    و عندكم الملكيه انكم “تنصبون ” على مخ القارء ؛)

    *p.s = الله يهيدك مو شي الواحد يصبح على محمد عبده =\
    قول : ” اللهم يا جامع النا ليوم لا ريب فيه اجمعني و\مع ضالتي ” > يمكن تلقى ههه
    صبحكم الله بالخير
    ؛)

    • صبحج الله بالخير والكرامه
      السبه مو تنحي مبارك السبب أنه طولها وخلانا مهووسين أخبار
      وعقب ماتنحي تنحنحوا البحرينيين والجزائريين والليبيين وردينا نتابع الأخبار
      المشكله مايتغلى يمكن واقف عند الباب وآنا مو حاس فيه
      والإهداء نكاية فيه لقيت الأغنيه ملونه ماحطيتها قلت بعطيه أبيض وأسود وقبل لا تخط شوارب محمد عبده(خطو الحين ؟مالاحظت)
      شكرا على الكلام الطيب والتعليق الممتع وحياج الله دوم

  2. عاد تبي الصج هالغنية أسود و أبيض ولا بالألوان في الحالتين عجيبة

    ونيـــــسة

    الله يريح بالك و يردلك مزاجك عال العال
    ويكون أطيب مزاج و إلي عافيك ما لنا خلق مع الأحداث مزاج عكسي ..

    و ما تشوف شر لا إنت ولا مزاجك
    و إن شاء الله قريبا نقولك قرت عينك في المزاج السعيد

    • أشوه عالأقل ونسناكم بشى وما طلعناكم خالين الوفاض
      الشر ما ييج ولا ايي مزاجج عاد الشعر صج يبيله مزاج
      حياج الله يالجودي دوم منورتنا بتعليقاتج الونيسه والمشجعه

  3. خوش سيناريو مع المزاج.
    تضيق وتنفرج ان شاءالله

    القولة تحدد الحالة الاجتماعية.. اعزب/متزوج..
    من عدد الزراير واضح انه كان عزوبي شبه الجزيرة العربية بهالاغنية

    • ياحيالله جندل
      صج القوله مالت عزوبي أصلي
      الظاهر أهو إللي أخترع الهاي نك
      منورتنا بمرورج

  4. الحمد اله طلعت من القاهريات
    ورحت حق المزاجيات
    وشكثر مشتاق اشوفك وناكل لقيمات
    وخلك من النوم والدوانيات
    خلنا نشوفك ونتحلطم عن الوزارات
    ونسترجع ايام القعده وشرب القهوات

    • قمت أشكي غياب المزاج
      يمكن فاقد مثلي الإزعاج
      تشتاق لك العافيه بس آنا ما إشتقت للدوام يعني ماكو إلا نتواعد بقهوه وييب اللقيمات وياك
      ونشتغل تحلطم على ودنه
      حياك الله يالحبيب فقدنا قهوة الصبح مع الربع
      تحياتي لهم جميعا

  5. تحلطم شخبار القطوة

    • أخبار خير
      كتبت نص حلقه وقفٌل المخ
      ان شالله تشوفونها قريبا
      حياج الله وتابعينا يمكن الله يهدي مزاجنا

  6. هههه

    اسلوب جميل وتحلطم خفيف طينه 🙂

    • شفتي شلون إنجنيرتنا يوم مالقيت شي أتحلطم عليه رديت على مزاج الكتابه
      حياج الله أختي

  7. تصدق @@

    نفس الحاله..بس عبرت عن كل اللي ودي اقوله
    اذا ياك طرشه لي الله لايهينك
    🙂

    ودي اعلق على كل بوستاتك اللي طافتني
    بس مستحيه..
    اهم شي ودي اقوله
    الحمدلله عالسلامه
    والله الحافظ

    🙂

    • شالسالفه
      الظاهر فيروس منتشر بالجو مثلً المظاهرات هاليومين
      وإذا ياني بقعده وأكرمه ثلاث أيام بعدين اعطيه عنوان مدونتج
      يكفينا يالليوان متابعتج
      الله يسلمج من كل شر وانتي بعد الحمدلله على السلامه

  8. شكرا على المقال والاغنية التاريخية

    • إن شالله بس عجبتك الأغنيه
      أنا لقيتها بالألوان بس أبيت اللعن إلا احطها باللونين الأبيض ونقيضه
      حياك الله أخوي منورنا

  9. يه يه شهالاغنية هههه
    اهم شي الالهاااااام
    استمتعت ببساطة البوست
    و قعدت اقرى البوستات اللي قبل
    مقصرة 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: