عندنا شغلات وسوالف ننفرد فيها عن الناس ونتميز عنهم.
شغلات تكون مو مرغوبه عند الناس وعندنا طق عصي عليها والعكس.
طبعا مو مجال تعميم بس أقدر أقول الناس العويه ظاهره .
مثلا في كل الدنيا وعلى وجه التحديد في العالم المتحضر الناس تدور السكن الهادي في المنطقه الهاديه في الشارع الهادي,
وربكم سبحانه الهادي،بس عندنا البيت إللي على الشارع العام يرتفع سعره ويكون مرغوب أكثر(ومو بالضروره يكون جدامه إرتداد)
يعني أي بريك يقعدك من النوم وإذا حادث بالشارع حسبالك الجدور طاحت في المطبخ
الناس إذا سافرت تلبس لبس واسع ومريح ربعنا (ذكورا وإناثا)آخر شياكه وسكبه وبعض الحريم المكياج تقول رايحين عرس مو راكبين طياره
وعلى طاري العروس تلقى ناس رايحه عرس ومهتمله وبعض الموظفات يداومون سواريه( لبس مو حفله)ولا جينز وتي شيرت.
مروريا،أيضا عويان، شارع داخلي السرعه فيه ٦٠ تلقي الحبيب دايس ١٢٠ والعكس تلقى على الخط السريع اللي سرعته ١٢٠واحد يتسحّب وسرعته ماتوصل ٦٠
بمواقف السيارات يعقدوني العويان تلقى الأخ أو الأخت سافطه سيارتها عويه وماخذه أو ماخذ مكان سيارتين.
عند الإشاره ماتحلى سوالف الشباب إلا إذا شبت خضره،واللي وراهم بالطقاق.
والشيء بالشيء يذكر،القرقه في المكان الغير مناسب
بالمقبره قرقه،بالعزا هذره،بالمسيد سوالف،بالسينما إزعاج،ومن زمان ما دخلت مكتبه بس ما أعتقد نعتقها من الصيحه.
منتخبنا كان متيّس فلح مره,وفرحنا,يوم أكرموه وبخّوا اللاعبن رجعوا يتيّسون بدال لا يشدون حيلهم.يعني الحافز يعتبرونه صك بأنهم الأفضل .
حتى الحكومه والمجلس يعبّرون عن الظاهره
وزبر أعلن عن إستقالته لسبب وجيه حد الدوسه الحكومه ملزّمه عليه يقعد
النواب يبون يستجوبون الوزير قبل تقرير لجنة التحقيق
أووووووووو نسيت إني مبطّل كلام بالسياسه.(يخلونك؟)
إيضاح تحلطمي:صديق كان يقول عن راعي أي شغله غلط “عوووي “بمدّ واضح
والسبب إن في فريجهم واحد مو صاحي دايما يقول”بو فرج عوووي” وصارت لزمه لصاحبنا .وعنوان معبر عن البعض.
T7l6m 
لا حشا ما يخلونك D:
أهم شي أهم شي كيييفت عليه إن الحكومه ملزمه عليه يقعد تقول عازمينه على عشا لوووووووول
تدري عاد في شغله أنا ملاحظتها في الكويتيين و هذه احتمال تكون ميزه سواء الحكومه أو الشعب ما يحبون يدقرون روحهم ولا يكسرون بخاطر أحد يعني أحد راد من بره مسوي شي أو طالع ببرنامج أمة لا إله إلا الله تطلع المطار تستقبله جنه فاتح عكة .. ترى تدل على إن الشعب طيب جد 🙂
إيه و نسيت اربط بين الموضوعين هالشي ينطبق على الوزير ما يبون يكسرون بخاطره علشان جذي يلزمون عليه لا اشدعوه مالك شغل إنت إلي قايلهم سوو جذي هم تصرفوا من كيفهم … عادي …هذه الكويت صل على النبي اللهم صلي وسلم عليه
آنا واثق إنه مايدري
ولأني واثق مستاء من عدم قبول الإستقاله
اللهم صلي وسلم وبارك على محمد
ورديتينا على السياسه
وإنتي بكرامه
مايطلعون حق إللي فاتح عكه
يستقبلون إللي طالع في برنامج سكه
وما تعجبني هالسالفه وإسمحيلي ما أشوفها طيبه
أعتبرها لقافه أو حماس ناس فاضيه ولا واحد فشل في برنامج فاشل مال طقطقه
يطلعون له نص الشباب والبنات
شكو؟أخوكم ,واحد من الأهل,ولد جيرانكم!
رزق حق مطاعم وقهاوي المطار
حياج الله
صاج ياخيي صاااااج…
ازيدك من الشعر بيت…
في مريض وانا اختك يضيق خلقه لما اقوله حالتك الصحية ماتحتاج دوا!!!
يقلب الدنيا إلا غصب طيب تعطيني دوا..زين قطرة عيون…انزين بندول…انزين ابره ..اي دوه بالله عليج بس لاتطلعيني خالي اليدين! شدعوه ياحافظ احد يعاف الصحة…بس على قولت صاحبك
عوووووووووووويااااااااان
ويك اند سعيد باذن الله
تحياتي
شر البلية مايضحك
ضحكني هالمريض بدال لا يفرح إن مافيه شي يحنّ إلا يبي دوا
أسعدنا مرورج و ويك إند سعيد
احنا حتى نومتنا عويه
ايام الإسبوع تشلع نفسك من الفراش شلاع
وبالويك اند عيونك بروحها تبطل على وقت الدوام والنومه تلوح لك باباي
@@
اعتقد احنا شعب عويان بالوراثه
وبالأحقيه
وبالتزكيه
تهقا لنا صلاح!!
صباحك طيب
أتفق مع الوراثه والأحقيه والتزكيه وأود إضافة
الأقدميه والإختيار
وإن شالله لنا صلاح وإصلاح
الله يصلحنا ويهدينا
وصباحج زين و طيب
أسعدنا مرورج
🙂
العوايه..مو ظاهره
هي نظام حياة..
وثقافة مجتمع..على ما أظن
يعني البيت الهادي وين بتحصله هني..
يا بالصبيه يا بالوفره..
بعدين مايصير الله يهداك يصفطون عدل عيييييييب!!!
وحرام عليك السالفه واصله لي بلعومه يردها علشان حضرتك تمشي …
وبعدين الوزير غلطان..من قاله يتحمل المسؤولية السياسيه..أهو مثل ما عينوه بكيفهم..لازم يطردونه أهم بكيفهم..السالفة لعب..على كيفه آآآآل على كيفه
هيضتني..وأنا مو ناقصه
بنتي مزفته بالشهاده ومنبطه جبدي
أولا سلامة جبدج من البط(والوز بعد)
وإن شالله الفتره اليايه إمتياز يلعلع ويفرحكم ويغسل جبدج(ويرقعها)
ومع الأسف صج صارت السالفه ثقافه مجتمعيه
وصج ماعندنا سالفه نبي نمشي بالخضره والأخ ماكمل سالفته
وماني معلق على الوزير خاصة بعد إجازة المجلس البدعه وكل بدعة ضلاله وتعرفين التكمله
حياج الله إختي والبوست كتبته الأربعاء علشان إذا يغث ينتهي مفعول المغثه مع الويك إند
وإن شالله بوست الويك إند مغثه Free