Articles

إللي ماله أول

In إقتصاد, عام on 24/01/2011 by t7l6m مصنف:

ذاك اليوم قعدنا نسولف بالدوانيه عن موضوع يضيق الخلق( مو كالعاده) وأعتبره موضوع عاطفي.لا تروحون بعيد مو قصدي بعاطفي روميو وجولييت قصدي موضوع فيه ذكريات وتراث إلا . الموضوع ،كما أصفه ،أحد النماذج العمليه للتنمية الشكليه،وأضيف الغير مدروسه.

الموضوع،وبعد الديباجه،بإختصار :موضة هدم المسايد وإعادة بناءها أكبر من أول.المساجد الحاليه تصميم فترة الطفره العمرانيه و إنشاء العديد من المناطق السكنيه في الستينات والسبعينات.والتصميم مألوف ودارج ومميز وجميل ،والقدامى من هالمسايد فيه زجاج ملون في القبه والنوافذ العلويه،والدرايش خشب.
حاليا,مع الأسف قاعدين يهدمون هالمسايد ويبنون مسايد أكبر.عندي وايد ملاحظات على هالموضوع,منها أن التوسع لايراعي صغر حجم مواقف السيارات وسيسبب مشكلة للمصلين والبيوت المجاوره,ثانيا من كثر المصلين.عمري مادخلت مسيد ولقيته متروس حتى بصلاة الجمعه يمكن بإستثناء المناطق ذات الكثافه العماليه.
إذا فيه توجّه للتوسع ليش ما يكبرون المسايد بدون لا يهدمونها ونوفر وقت وفلوس وراحه للمصلين بدال لايصلون بجبرات لمدة سنه أو أكثر.
والأهم,هذا طراز معماري ليش مانحافظ عليه بدال لا ننسفه ونمحيه من الذاكره.
الدول المتقدمه تحافظ على المباني التاريخيه,وإحنا ما نوهّل المبني ليما يصير تاريخي .بلندن يهدمون المبنى من الداخل ويحافظون على شكله الخارجي.بمصر يحافظون على مثل هالمباني وآخرها فندق هيلتون النيل قاعدين يطورونه ويضيفون بالحوش الخلفي له مبنى جديد بدون هدم أو تغيير الشكل الخارجي للمبنى.
من الأمور العجيبه أن في مدينة مراكش في المغرب ممنوع إزالة أي نخله,وإذا قاعدين يسوون شارع وطلعت نخله في النص يسوون دوار ولا يقطعونها أو ينقلونها.في مدينة توسان بأريزونا إذا شريت أرض وتبي تبنيها ماتقدر تشيل كل نباتات الصبار إللي في أرضك لازم تحتفظ بنسبه معينه.
الزبده,الناس تحافظ على القديم والنافع ليكون تذكار وذكرى وتاريخ لها وإحنا مع الأسف طايحينله هدم ونسف للماضي ,وماتعلمنا من تجاربنا السابقه.الحكومه ثمّنت بيوت الديره وهدمتهم كلهم وبعد خمسين سنه قالت نسوي قريه تراثيه والحين الشغل واقف والمقاول مغرّز.جان من أول خليتوا فريج ولا فريجين وحافظتوا عليهم بدال الهدم وإعادة البناء.
شتقول شتحجيي!!!

Advertisements

20 تعليق to “إللي ماله أول”

  1. شكرا على الموضوع الحلو
    والملاحظات الحلوه

    تصدق اللي ماله اول ماله تالي مو بس بالمساجد حتى بالاذان بعد
    في قناة قطر شوف شلون يطلعون الأذان شي عجيب
    شايب يمشي … يدخل المسجد … يصعد على منارة المسجد …يحط ايدينه على اذانيه ويبدء بالاأذان بدون تنغيم او لحن

    يعني اذان الأولين

    صج اللي ماله أول ماله تالي

  2. في مسيد قديم صاير عند قصر السيف, قريب من مبنى وزارة التخطيط, راحوا الإخوان من جماعة (تخريب وهدم التراث) وقرروا إنهم يرممونه مع المحافظة على مظهره القديم

    تعرف شلون صار الحين؟ شايف لما وحدة عيوز تروح تسوي عمليات تجميل وتحط خمسين ألف شي بويهها؟

    شايف عند المسيحيين لما الواحد من ربعهم يموت ويودنه لفني مهمته إنه يرمم الجثة ويصبغها علشان تطلع من غير خدوش؟

    هذا اللي صار, يعني لاهو بالمسيد القديم, ولا هو بالمسيد اليديد

    نفس الشيء (الظاهر نفس المقاول) ايضا تم بالنسبة للمستشفى الامريكاني وبيت ام سعود

    حتى السوق القديم وسوق الحريم صار مسخ

    • هذا مع الأسف الفهم الخاطيء للتطوير والتحديث
      ياريت يتعلمون من الدول الأخرى كيفية المحافظة على التراث
      حياك الله ومنورنا يابوعلي

  3. قد اسمعت لو ناديت حيا …
    شكرا لك

  4. اي والله صاج…
    يازين اول وبيوت اول ومسايد اول وريحة الناس اول…

    انا احس اني عتيجه ما اصلح حق هالزمن…
    ودي اني عايشه بالعشرينات والاربيعينات

    ترى القديم يعطي للبلد اهميه تاريخيه..
    يعني شلون نثبت للعالم ان احنا دوله قديمه لها تاريخ على الخريطه..
    ماكو..طفى يكافي الشر..كل شي انهدم
    الله يهداهم..بس
    ويخللون لهالشياب شي يتذكرون في ماضيهم الحلو

    good choice for the post

    • بذاك الزمن تعب وشقا ,لاماي لاكهربا لاغاز
      لامايكروويف لا مولات لاسفرات لا كورن فليكس أو حتى فواكه
      مافي شك القديم يعطي إحترام وتقدير لتاريخ البلد وشاهد على التطور

      الحمدلله الموضوع عجبكم وإن شالله المسؤولين يعيدون النظر
      حياج الله أختي

  5. الله يا هالموضوع يحررررررر

    تدري اتعزز لي مريت الديرة و أمي اشرت لي على براحه فيها سدرة و قالت هني مكان بيتنا بشرق … يعني معقوله هالتفكير من شالوا بيت أهل أمي و الفريج كله أشوف ما سووا شي براحة و اشدعوة إلي مبني سنع على طول شارع فحيحيل لي الديرة البنايات صايرة مساكن عزابية هذول شلعوهم من عرجهم من بيوت الطين …

    بس مثل ما قلت شنقول اشنحجي كور مخلبص مع إن الديرة متروسه فنانيين و حرفيين كويتيين ليش ما يوكلون لهم هالمهمه و كل واحد يحلل دراسته في بيت عتيج .. أو مسيد .. بدال مقاول اييب له شغيله من … أو من … و كلهم طبيعة ديارهم و بنايهم مختلف ..

    خلها على الله يا أخوي

  6. اي والله صاج

    يعطيك العافية

  7. مع الاسف مافي وعي ولا حرص… يستبدلون الذي هو ادنى بالذي هو خير… والا اكو احد صاحي يعاف هالزجاج الملون ويشيل الخشب ويحط ألمنيوم… وعلى قولتك طايحين له عمران على غير دبرة.. وين ووين اذا كملوا صفين ورا الامام وزين ما يغيرون اسم المسيد على اسم المتبرع… والله اني اشوف مأذنة مسيد قطعتنا من بيت خالي اللي بالمنطقة المجاورة

    بعيد عن تغيير نطفة المسايد والديرة بكبرها… ترى معظم الكويتيين غافلين عن هالموضوع ويحبون يغيرون بكل شي… خاصة بعد اكتساح المنتج الصيني بكل الامور… صار وايد سهل انك تغير كل ما تميت
    يعني بداية المشكلة بالبيت قبل البلد

    عندي صديقة مصرية كتبت عنها من فترة
    لما زرتها في بيتها تعجبت من حلاة اثاثها وليش اني امون عليها سألتها من وين الموبيليا بتاعتها
    قالتلي ده جهاز المرحومة ماما
    صديقتي عمرها تسعين سنة الله يعطيها الصحة والعافية, ولك ان تتخيل جم عمر جهاز امها
    كل شيها من حق طيب وطبعا ما راح تلقى نفسه بالسوق الحين لأنه dis-continued
    وقيس على هالقصة طبيعة الشعب المصري بشكل عام

    سمعت عن قصة هيلتون النيل, اخذ وقت على ما وافقوا على ترميمه مع المحافظة على الهيكل والطابع القديم

    اذا تبي شي يرد الروح
    زور المستشفى الامريكاني وبيت الطبيب والكنيسة اللي وراه
    محافظين على كل شي مع الترميم المستمر للمبنى

    وبس… كتبت قد اللي كتبته فوق لأن قلبي متروس بس مسحته حقنا للثبرة
    شكرا تحلطم

    • المشكله تنميتنا وتغييرنا بالشكل وبدون داعي
      بذمتج جم مره غيروا البلاط بمنطقتكم
      والبيوت حدثي ولا حرج
      البيت مسؤولية أهله وكيفهم لكن البلد والمباني العامه المفروض يكون للحكومه والجهه المختصه راي وموقف واعي ويحافظون على الطرز المعماريه
      وعلى طاري الأثاث مره رحت ديوان الموظفين القديم بشويخ وشفت فيه كراسي مكاتب قديمه والله يبيعونهم بأمريكا بالشيء الفلاني
      والربع قاطينهم بالشمس
      مع الأسف ربعنا دبش
      بعدين ليش تمسحين إللي كاتبته كلنا قلوبنا متروسه وحاطين المدونه علشان نفضفض
      لازم نأكد ونقول خبقي زبيلج
      حياج إختي ومشكوره على التفاعل والتعليق المعبر

  8. صدقت!
    مانوهل المبنى يصير قديم وتاريخي
    معناته احنا ماشفنا التراث ولا عيالنا راح يشوفون شي اسمه تراث !!

  9. اتفق معك…

    انا من محبي كل شيء قديم…احيانا التدخل للمحافظة عليه يفقده رونقه…يفقده شخصه…

    يفقده طابعه….

    شكرا للموضوع الجميل
    كن بخير

    • ياريت يتدخلون علشان يحافظون عليه
      مع الأسف قاعدين يهدمون
      شكرا لمرورج وحياج الله

  10. ايييه يبا شنحجي شنقول
    وقسمن بالله حكومة دايخة
    بكل شي فشل
    حتى بموضوع بسيط مثل هذا فاشلة
    :)))
    شر البلية ما يضحك

    • أي والله شنقول
      المشكله مو قاعدين يحسون بالدمار وطمس التاريخ إللي يمارسونه
      الله يصلح الحال
      وحياك الله أخوي لو كويت منور

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: