Articles

ما نبي نووي

In إقتصاد, المرور, النفط و الطاقه, عام on 19/01/2011 by t7l6m

زادت خرابيط الربع وأحلامهم الورديه وخيالاتهم الجامحه
وايد مصدقين نفسهم وآخر بدعه بيسوون الكويت نوويه.
يالطيبين فكروا بالواقع ,وفكروا:
بالموظف إللي ما يداوم,وإذا داوم متأخر,وإذا موجود ما يشتغل,وإذا إشتغل أي كلام
بالمخازن إللي تحترق ويتدخل الجيش والحرس الوطني علشان يطفونها
بالبواليع إللي طفحت وعجزنا عن علاجها وخيستها وتلوث البحر. والميد إللي صار كبر الهامور
بتلوث البر والبحر والهوا
بالقوانين إللي مسوينها للعرض فقط ومعلقينها بالفترينات
بالأغذية الفاسده إللي تارسه البلد وتجارها يتمشون بينا ومحد يسويلهم شي
بالزحمه إللي من عقود نشكي منها وما لقينا لها حل
بشوارعنا إللي تنافس ساحة حرب من كثر الضحايا يوميا ومحد راضي يطبق القانون
بتخلف التعليم وتراجع الرياضه
بمستشفياتنا والأخطاء الطبيه والبلاوي الإداريه
بالمواطن إللي مايحترم الوقت ولا القانون ولا يحترم غيره
بالمسؤولين إللي كلمه توديهم وكلمه تييبهم
بالأعلام إللي بدال لا ينور الناس ويوعيهم يشتغل ضدهم ويضللهم
بثقافه مجتمعيه تسكت عن الغلط إذا طلع من صاحبنا ونشرشح غيره على أدناة الدون
بأهم قطاع إقتصادي ومصدر رزقنا إللي لي الحين حرايق وحوادث ,ومعتمدين على الأجانب فيه
بشارع طوله كيلو حافرينه من سنتين ومعطلين الناس ويبيله سنتين زياده علشان يخلص
بسياسه عامه ضايعه بين الخصخصه والفسفسه وإقتصاد لو ما الحكومه جان عزّل
بشباب يتعبون ويتعلمون وإذا رجعوا بلدهم ينصدمون ويتحّبطون وآخرتها يضيعون وقتهم بالقز
بحكومه ومجلس تقول توم أند جيري
بالواسطه إللي خربت كل شي
بالمسؤولين إللي المعيار الوحيد لإختيارهم إنه فلان أو يعرف فلتان أو موصّي عليه علّان

فيا حضرة أمين عام اللجنة الوطنيه لإستخدامات الطاقة النوويه للأغراض السلميه الله يسلمك ويعافيك فّكنا إنت ويا ربعك من سالفة المفاعلات,ترى الكويت محنا قدها .

Advertisements

14 تعليق to “ما نبي نووي”

  1. اقتباس
    بالموظف إللي ما يداوم,وإذا داوم متأخر,وإذا موجود ما يشتغل,وإذا إشتغل أي كلام

    ارحموا الموظف مايصير زين الريال يداوم وهو يشوف الظلم و التفرقة و الواسطة و محسوبيات .. الا بطلعون في الموظف عيب !!

    خل نصير نوويين لووول حالنا حال دول الخليج ألي بنونوون روحهم !!

    نشب شمعة ابرك من نلعن الظلام !!

    وين تنصحنا نودي الالف في الصفات ولا بي بي ولا نطيرها في السوق !!

    • صح كلامك يالياباني الموظفين بعضهم خلقه ما يبون يشتغلون وبعضهم ضحايا الإحباط
      وكتبت عنهم
      ويا معود مانبي نووي خل الخليجيين ينونوون بروحهم
      وشعاري إلعن الظلام ليما يشبون التريكات
      أقول عطني الألف وراجعني عقب سنتين
      ولا أنطر التمويل يتفصخ وإخذه,إبن اللذين قوي

  2. اي والله قلتها من زمان.. اذا بسوون لنا نووي و يدار بنفس الاسلوب اللي تدار فيه البلد و مشاريعها.. انا اقول راح يكون مشروع شيرنوبل جديد و العياذ بالله
    خل يوسوون استاذ رياضي سنع اول مو مفاعل نووي

    • صح لسانك
      وآنا سبق أن كتبت عن تسلسل الأحداث بعد النووي في بوست بعنوان النووي الكويتي (تلقاه في قسم النفط والطاقه)
      آخرتها نشّب بروحنا من كثر الإشعاعات
      الله يكافينا الشر
      حياك أخوي منورنا

  3. تدري راضين يسون نووي بس اول خل يحلون بس ثلاث مشاكل من المشاكل اللي ذكرتهم بموضوعك

    شكرا على انك تكلمت بمطالبنا

    • ياريت يحلون مشكله وحده
      مشكلة الربع وايد طموحات وواقع يضحك
      وياريت يسمعون الكلام
      حياك الله بوجاسم

  4. ما اعتقد بانهم جادين بمسألة المفاعل النووي, هذي بس شغلة إعلامية وقد تكون مفروضة من أمريكا على دول المنطقة كنوع من الحرب الإعلامية تجاه إيران

    اللجنة الكويتية الخ الخ, هذي مجرد لجنة ويا كثر اللجان عندنا بالديرة ومن غير اي فايدة

    اصلا امريكا والغرب ماراح يسمحون بوجود هالشي بمنطقة الشرق الاوسط (بس إسرائيل مسموح لها), ولو كان الشيء هذا صحيح كانت السعودية اول بلد تستخدم المفاعل النووي للأغراض السلمية

    لنفترض مثلا مثلا إ هالشيء صار, فأعتقد بان اللي راح يديرون المشروع وحتى الموظفين والعمالة راح تكون من الخارج, ربعنا مو ثقة أصلا, هم خل يداومون بالاول او يشتغلون بضمير 🙂

    • الله يسمع منك ياريت مو جديين
      ونتمنى تكون شغله أعلاميه
      المشكله إن أمريكا والغرب يبون تصير في المنطقه مفاعلات لتوليد الكهرباء
      الإمارات وقعت مع كوريا والسعوديه حسب معلوماتي في تفكير جدي بالمفاعلات
      والسبب إستهلاك المنطقة من النفط لتوليد الكهرباء(الكويت بروحها ٤٠٠ ألف برميل باليوم)
      والإنتاج النفطي العالمي في تراجع والطلب في زياده فالمفاعلات تقلل إستهلاكنا من النفط وتتيح مزيد منه للتصدير
      حياك يابوعلي

  5. ليش كل هـ التشاؤم ؟ لا احنا قدها وقدود وبليز لا تعمم

    انا اقول الشر يخص والخير يع

    • مع الأسف مو تشاؤم
      كل الكلام واقع
      وأتمنى من كل قلبي أن الشر يخص
      وأن كل الكلام إللي قلته يطلع غلط
      لكن تجاربنا سيئه وخصوصا بالمشاريع فما بالج بمفاعلات
      سوري ما أتفق معاج محنا قدها
      حياج الله

  6. والله بصراحه ما دري شقول..!!

    يمكن معاك حق.. بس هم المفروض إن احنا ما ندقر عمرنا
    يعني احنا نقدر ..بس الظروف والاوضاع ما تساعد..

    والله يلعن الواسطه ستين ألف لعنه..
    ياكرهي لها وللي يسعى فيها..

    • إحنا ما ندقر عمرنا
      أنا أقول هذا خطر وإحنا بظروفنا مو قده
      شوفوا لكم سالفه ثانيه ممكن نطبقها ونعلم عيالنا وإذا الله كتب نطورها
      عندج طاقه شمسيه ورياح والأهم ترشيد إستخدام الطاقه
      والواسطه إهي سبب ضياعنا
      حياج الله

  7. شوف كشعب شقرديه و عندنا مخ و مثل ما يقولون شعب بو قليب الحمدلله اللهم بارك لنا ماشاء الله تبارك الرحمن يعني نقدر مو مانقدر بس يمسكونه كويتيين مخهم نظيف مو طنق و عمك و خالك و خشمك …

    ومن جهة ثانيه اتفق معاك اشلون بنسوي نووي و احنا بنيه اساسية ماعندنا يعني البنيه حدها قديمه ومتهردقة ابسط مثال إنت قلت المستشفيات و الأخطاء الطبيه خل الأخطاء شايف مباني المستشفيات و توزيعها يعني الحامل على ما توصل الولادة إلا والده بالطريج اشدعوة و مليون مطبه و طرق مكسره و إلي بيسعفونه بيودونه الصباح بيتكه صدره من التنك من غبار المباني و ريحه البحر سوري المو نظيفه ..

    معاك أأيدك تحلطم

    • والله إن المأساة قدرتنا ووجود ناس متعلمين ومؤهلين لكن البلوه نظاميه
      سوء إداره وقتل المواهب والواسطه ومسؤولين دايخين
      شلون نقدر ننجز مع هالبلاوي خاصة إنا نتكلم عن تكنولوجيا متقدمه وحساسه وخطيره ,صعبه وايد.
      حياج الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: