Statuses

فضايح الفنانين والتلوث

In أخلاقيات, عام on 12/01/2011 by t7l6m

كثرت النصايح والطلبات من الربع والأهل بالموضوعات إللي يبوني أكتبها
طبعا ما أقولهم :شنو أشتغل عندكم!
أو:شنو أشتغل عند إللي خلفوكم (وفقا لمدى الميانه)
بعض الموضوعات إللي يثيرونها جديرة بالكتابة وسبق أن إستفدت من هالطلبات
لكن في طلبات ,أو بالأحرى مقترحات , تضّحك وقايلينها الربع من باب الغشمره ومرات علشان يطفروني
واحد (بمعنى شخص) واااحححد(بمعنى جمبازي عود ) كل ماتم يعيد علي:جم مره أقولك بطل كلامك عن مشاكلنا وعن السياسه وسولف عن فضايح الفنانين(أدري قصده الفنانات) وصدقني إذا ما هنّج موقعك من كثر الزوار والتعليقات
مرات هالواحد يقولي ليش ما تسب فلان أو تغلط على فلنتان أو إتّهجم على علّان علشان تسلّك أمورك ,ومافهمت شقصده بتسليك الأمور (تهقون قصده قسط السياره؟)
واحد ثاني يقولي ليش ما تعلق آخر الأسبوع على الأخبار الخفيفه والغريبه مالت الأسبوع كلّه .عجبتني فكرته بس المشكله إني ما أقرأ الجرايد كل يوم .
مره طلبوا أكتب عن تحكيم مباراة الكويت والصين ,ومع إن التحكيم كان خايس والحكم ,الله يصلحه,كان جحش لكن ماني رياضي والأهم إني ماشفت المباراة.
صديق عزيز طلبني أكتب عن مديره .يعني أسفّل فيه وأطلع خياسه وثوالته,ضيّعت الصقله وغيرت الموضوع لأن ماعندي معلومات وبيانات موثقه عن المدير العبيط وإللي يدير مؤسسة إقتصادية هامة في القطاع الخاص,وهو على فكره مو كويتي.
واحد من عيالي,يحلاتهم كلهم,يبيني أكتب عنه ويقصد “يبا إمدحني”طبعا ما كتبت عنه لأني بعدين لازم أكتب عن باجي العيال,من باب العدالة والمساواة.

شياب طاري هالسالفه؟
اليوم صديق عزيز وحكيم وبعد حديث طويل عن أخبار الأحداث في الفترة السابقه وأحداث اليومين الأخيرين
قال:مع الأسف الأجواء ملوثه وماتقدر تعرف دقة الأخبار إللي تتداولها الناس علشان تتخذ موقف من هالأحداث.
ختمت حواري معاه,وبعد تأييدي لكلامه,إني ماقمت أثق بالنواب ولا بالحكومه ولا بكلام الجرايد والتلفزيونات.

صديق آخر قال لي ,بالصدفة,بعد حواري مع الأول:” إحنا بين نارين”
ماطوفتها,كالعاده,وقلت له “هذي كنافه” لكن فعلا أثرت فيني كلمته وشعرت بصدقه وواقعية كلمته وأحسست بمراره شديده.

ختاما ,لا تّوقعون مني أكتب عن فضايح الفنانين,لكن أعترف إني زهقت,ومليت ,ولاعت جبدي ,وطفرت من سوالف السياسه.وأتمنى من كل قلبي ما أكتب إلا فرايحي ,على قولة المصريين.

حسبي الله هو نعم المولى ونعم الوكيل
ولا حول ولا قوة لنا ولكم جميعا إلا بالله هو نعم النصير

Advertisements

20 تعليق to “فضايح الفنانين والتلوث”

  1. شكرا تحلطمنا 🙂

  2. 🙂

    شخبار القطوه؟؟

    • تصدقين قريت السؤال جذي
      شلك بالدندره وعوار الراس خلك على قطوتك أبرك لك؟
      وأقول صح كلامج القطوه
      أبرك
      وأريح
      وأونس
      وإن شالله تشوفينها قريبا
      على فكره مبلش من مده بجزء يديد بس كل ساعه أوقف.

  3. يا حليل ولدك لا اتخلي شي بخاطره و سلم عليه هو بالذات لووول بخرب مبدأ المساواة
    و سلم على عيالكم كلهم الله يحفظهم لك و يرزقك برهم و الجنه

    أوكي الخلاصة

    إن شاء الله راح اطلب كنافة ..!!

    • بسلم عليهم كلهم إنطلاقا من المبدأ إللي بتكسرينه
      وتوقعي كسرته لأني كل ما أتأمل بنيتي الوحيده وهي نايمه تنفتح قريحتي لكتابة بوست أبوي
      الخلاصه
      عليج بالطيباوي

  4. انا منعزله بصومعتي فتره لا لي ولا علي
    ومطفيه تلفوني …

    ماقولك ياخوي شنو راااااااااااااااااااااااااااااااحه من غير تلفون…

    شنووووووووووو متعععععععععععععععععععععه من غير حنة المسجات وزنت الاتصالات

    ابطله قبل لا انام اجيك على المسجات سريعا سريعا..يعني اشوف اذا في شي مهم
    وارجع اطفيه..لا ويوم وترك ….

    صراحه….مفتكة من كل شي خارجي…

    شاللي ياب هالطاري؟؟

    مادري حسيت احتجت اشاركم بهالفكره المريحه للمخ والبال:)

    اما عن موضوعك ..

    والله انا اتصادفني هالسالفه بعد…افكار للكتابه وكتبي عني وكتبي عنا..

    بس انا فاكه عمري..يداوب قصيص و حزاوي… و موخره عن اي شي يعور الراس وييب الشقا…

    بس وانا اختك انا اقتات على مواضيعكم واعيش عليها

    يعني السياسه ماعرفها الا منكم
    واحوال البلد بعد ما اصدق اخبارها الا لي صدقتوها ..
    يعني انتو عقلي المدبر في البلد و عيوني اللي تشوف …

    الله يعينكم على القثا والمقثه…وأنا اقول اخذلك ابريك تدويني عن السياسه

    واكتب عن الفنانين 🙂 ترى سوالفهم انطع..اونس…وتقراها من اهني تنساها من اهناك..
    وكل جمله والثانيه

    انقول ( هاو هاو هاو….ويييـــه ياحافظ من صجها سوت جذي.. )

    🙂 …

    وعسى ربي يصلح حال هالديره واللي فيها..وعسى ربي يفرجها…

    انا متفائله خير يقولك الإمام الشافعي

    ضاقت فلما استحكمت حلقاتها…فرجت وكنت اظنها لا تفرج

    نهارك سعيد

    • نهارج أسعد في صومعة الهدوء
      آنا ما أقدر أطفي التيلفون بسبة إتصالات السايق وطلبات البيت وشكاوي العيال على بعض
      أدري بالراحه بدونه وإذا سافرت أرتاح من الإتصالات طول السفره

      عن الموضوع
      معقد الربع مرات يقولون لي أكتب عن شي وأكشت فيهم ومرات يسولفون سالفه أو تصير سالفه ومن باجر حاطها بوست

      وعلى شورج ,ودي مو بس بريك تدويني عن السياسه ودي بمقاطعه دائما تفوق في شدتها لاآت قمة الخرطوم(1967)
      صراحه ما كان في بالي ولا على الخاطر الكلام في السياسه لكن تدرين شنو إللي يحد الواحد على المر والفتره الماضيه كانت علقم

      سوالف الفنانين مشكله صعبه على لأني بطلت متابعة أخبارهم من فتره طويله يعني لو اكتب عنهم ما تعرفونهم خبري بالفن أيام حسين رياض ورشدي اباظه

      الله يسمع منج إن شالله ويصلحنا ويحفظ لنا بلدنا
      والتفاؤل إن شالله يستمر مع الجميع
      حياج الله دكتورتنا منورتنا دائما

  5. انا اقول صج خلك على القطوه .. وخل يسيرون عيالك علينا 🙂
    و السياسه .. على قوله واحد ” شخص معين مو جمبازي عود ;q ” ودي اغرد خارج السرب بس ما اقدر ..
    ياخوي كويتين مانقدر لازم.. ايدنا تحكنا اذا ماتكلمنا .. طلع حركتك بس 🙂

    و على مصداقيه الا خبار زيد عليهم توييتر و الفيس بوك .. خو الحين مع هذيل الاثنين .. الاخبار – بمعنى ادق الاشاعات – تنتشر اسرع .. بس يضل اهون من الي قلتهم ..

    انا كلا اقول المعرفه تنور .. الحين بغير رااي الجهل راااااااحه بهالديره =\

    اما بالنسبه لسله الحبيبه :* و فكرتها الجميله
    انا فطره فيني و أعدها نعمه من الله .. التلفون نص اليوم ضايع .. و النص الثاني سايلنت ” بعد الكليه ” و الايام الخوش خوش .. لما انساه بالسياره او لما انسى اشحنه و يطفي ايــــــام و انا عبالي محد يدق صج رااحه 🙂

    و تسلم على البوستات بكل انواعها الصراحه وقواك الله .. والله يحفظ عيالك لك ويخليلك اياهم ويخليك لهم ونسهم واكتب عنهم ولو شوي عن خاطرهم 🙂

    صبحك الله بالخير و النور و النوير 🙂

    • صبحج الله بالخير والكرامه
      المعرفة مسؤوليه,والجهل في زمنا وبلدنا أصبح نعمة وراحه لا وصحة أفضل
      لكن مثل ما قال الشخص المعين إللي مو جمبازي حدونا غصب على السياسه مع إني هاجرها من زمان

      لا توصين حريص لازق بالقطوه لزقه لي تزهقون منها بعدين أختمها ونطلع بقصه يديده من طقة
      “الأرنب المغرور” أو “الدجاجة الحكيمه” أو “الحمامة الكسوله”
      الله يقويج وشكرا على الكلام الطيب والدعاء وتمنياتي لك بالتوفيق والتفوق
      والعيال راح أوصيهم إللي يبي يكتب أهو عن نفسه والنشر بالمدونه عندي

  6. بتحلطم اشوي ..
    ليش مدونتك مافيها مسح للتعليق ؟؟
    ياربي شوف البدليات الي فوق .. يعني ما ارضاها لنفسي جذي =\
    ابي امسح التعليق .. :”(

    هههه السموحه على التحلطم و البدليات الوايده .. بس المخ مفرور شوي =\

  7. ههههههههههه

    الله يسامحك
    والله مو قصدي
    بس صج القطوه ابرك من سوالف تافهه ما منها فوووود

    (الواحد ما يعرف يقط نقزة من غير لا يصيدووونه)
    ؛)

    كل مواضيعك حلوه ..لا تزعل
    🙂

    • أدري مو قصدج بس هذا كان شعوري وآنا أكتب البوست وهذا إللي كنت أقوله حق نفسي
      صراحه تعبني الكلام عن السياسه مع أن سياستي يوم حطيت المدونه إني ما أكتب بالسياسه
      يخرب بيت السياسه كتبتها 4 مرات بهالتعليق و آنا ناوي ما أتكلم عنها

      تسلمين وتمونين
      والطلب بالكتابه عن القطوه إطراء ما يزعل بالعكس يفرح

  8. اي والله بين نارين

    • شفتي شلون
      إن سكتنا آويلاه وإن تكلمنا هم آويلاه
      فعلا هالكلمتين يختزلون كل البوست والمشاعر المتناقضه إللي فيه
      منوره مدونتنا بمرورج وتعليقج اللي يعبر عن فهمج العميق لما يجول في فكر الكاتب

  9. مو قلنا لك من زمان خلك على القطوة!!! خل نقرأ شيء يونس بدل النكد اللي حوالينا من كل مكان (مندي).

    و تسلم يا تحلطم.

    الله يخليها لنا الكويت ديرتنا و يحفظها ، امين امين امين.

    • أولا قولو لوش ,مابغيت تبين فقدناك عدل
      وصح كلامك القطوه وايد أبرك وكفايه النكد All around ومو ناقصين لا إحنا ولا إنتو
      الله يسلمك يالغالي(بس سعرك فيك)
      والله يسمع منك ويسمعةون الناس ويجمدون ربهم على هالديره وعلى النعمه
      منورنا يابو الأنوار

  10. ذكرتني بفترة من الفترات فكرت اتفق مع مدونة ان نتهاوش مع بعض علشان يزيد القراء لوووول سوالف الممثلين يسوون حركات علشان الناس تسولف عنهم

    ومرة كان فعلا تهديد مني لاحد المدونين لانه تمادى وتعدى حدوده فكان القراء كثيريين وقتها والتعليقات مثل المطر لوول

    • هذي إتفاقيات يعاقب عليها القانون وتدخل في الغش التدويني
      الناس تحتاج إنها تروح عن نفسها وتقرأ موضوعات مسلية بين فترة وأخرى
      والمهم ان الواحد يكتب ما يراه مهم ولا يتجاهل ميول القراء
      حياج الله أختي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: