قراءة الجريدة أصبحت بالنسبة إلي عادة مسلية ليس لمتابعة الأحداث (كلها ماصخه)وليس لقراءة مواقف السياسيين (كل يغني على ليلاه)وليس كذلك لمتابعة أخبار الفن والفنانين (المدام تطقني),ولكن قراءتها يجلب لي الضحك ويصنع إبتسامة حتى لو قاعد من حلم يخرع.
اليوم ضحكني موضوع القطاع العام.ديوان الخدمة المدنيه أعلن عن توفير 12 مليون دينار بسبب وضع ضوابط لفرق العمل يعني وفر علينا حوالي 4 بالألف من موازنة الرواتب(0,4%) مع إعتراف الديوان بظلمه لبعض الوزارات ودراسته لإستثناءها من ضوابطه.
الصفحه إللي بعدها خبر يقول إن موظفي وزارة الصحة سببوا خسائر للوزارة بقيمة 139 مليون دينار .يعني الفلوس إللي يقصها(ويوفرها) الديوان من الموظفين لمدة 11 سنه و7 شهور يضيعها موظفين الصحه بسنه وحده.يعني الحكومه تسكّر حنفيه تنقّط وتخلي حنفيه تهدر.كبيره يا حكومه.
القطاع الخاص وما أدراك مالقطاع الخاص
طبعا كما عودنا القطاع الخاص من جمبزه وتراخي حكومي في الرقابة عليه يحتم إعادة النظر في خطط الخصخصة و متابعة تطبيق القوانين علي شركات القطاع الخاص.
شتقول الجريده,
وزارة التجاره تقول أن 115 شركه من 226 شركه في المنطقة الحره مخالفه(يعني شركه وترك)وتم تحذير الشركات أكثر من مره بدون فايده(ولي متى تحذرون ,ومتى الله يهديكم وتخالفونهم)
وشوفوا شلون قطاعنا الخاص مزّفت بالمنطقه الحره وبثلاث شهور بس:
3000 مخالفه
إغلاق 33 منشأة و 102 محل
إغلاق 30 مصنع
سحب 9 قسايم
وفي الختام شكرت الوزارة المستثمرين على تفهمهم “لأهمية الإلتزام بالقوانين” وأهابت بجميع ممارسي الأنشطة”التعاون معها في تطبيق القوانين واللوائح والنظم المعمول بها لخدمة المصلحة العامة وحماية المستهلك”
بذمتكم ما تحسون إن الوزاره طيبه وعلى نياتها .عفيه يا تجار ويا قطاع خاص خدموا المصلحة العامه وإحموا المستهلك,
ياحبايبي ماتفهمون؟!
هذي وظيفتكم وشغلكم. القطاع الخاص نظريته وهدفه خدمة نفسه وزيادة فلوسه والمستهلك الله وياه(ما بغيت أقول طز فيه)
الآن الخبر الشرباكه:قطاع عام وقطاع خاص والقضاء
واحد ترشح يصير عضو مجلس إدارة بنك ودوا أوراقه لسيادة المفتي(البنك المركزي).إكتشف المفتي أن الأخ كاتب شيك بدون رصيد وحكمت عليه المحكمه بغرامة 100 دينار وبالتالي رفضت عضويته وكتب المركزي للبنك سبب الرفض إستنادا إلى مادة بالقانون وذكر ماهي الماده.
الأخ تظّلم وبعدين رفع قضية بالمحكمة الإداريه وحكمت له لأن البنك المركزي ما كتب ( تفاصيل الجريمه) وأن فلان كاتب شيك بدون رصيد وإكتفى بذكر مادة القانون دون نصها ودون الإشارة إلى قضيه المذكور
وأضاف الحكم”وإذ خلت الأوراق مما ييثبت تنفيذ هذه العقوبة إعتبرت المحكمة أن المدعي إسترد إعتباره سابقا”
يعني البنك المركزي ما يعرف يكتب الصيغة القانونية للرفض مع أن مستشارينه القانونيين يستلمون رواتب ومكافآت راهيه,زائد أصبح أحد أعضاء مجلس إدارة بنك صاحب سوابق ماليه.
T7l6m 
ما فهمت الجمله الأخيرة .؟
المهم
تدري ماني عارفه شكتب لك تعليق أنا هادة الجرايد تقريبا صار لي 5 سنين و ماشيه في السادسه …
الوضع وايد مريح الحياة سعيده ما فرقت معاي إلا الأعلانات ولا اعرف متى معارض أرض مشرف
بس
و دامها اتوسع صدرك عليك بالعافيه تونس 🙂
أدري ما ورا الجرايد إلا الغثا بس شر البلية ما يضحك
قاعدين نضحك على التناقضات والكسل والرباده وقل الحرص(ما ودي أستخدم كلمة غباء)
حياج الله وشكرا على متابعتج وتعليقج
الدنيا حتئطم بعض يا بوحميد !
وشكرا لك
حياك الله يابن محمدي
يأطمون ويقطعون مثل مايبون بس خل يوخرون عنا
اه بس شنقول
المضحك المبكي
نضحك يبه شورانا الدنيا ماتسوى :’)
صح كلامج مضحك ومبكي
ويعور القلب ويضيق الخلق
ويخلينا ما نوقف تحلطم
حياج بوك مارك
والله انا مثلك….
اممم ومثل الجودي…
اقولك شلون
انا ماقرى جاريد بتاتاً بتاتاً:)
وما اسمع اخبار…
ليش اقث عمري…
دام الاعلام كله جذاب..وماعنده مصداقيه..قمت اخذ الحجي من الناس ابرك على
الاقل على مايوصلك الا متبهر وزاد نطعه:)
المهم…يوم ايي وبقرا جريده..
اقراها بصوت عالي…
و ادور الاخبار التحفه اتحس وحده تقرا جريده عشان تنتقد العالم:)
الله يعين على هالقثا وانا خيتك مبكي مضحك الوضع صاير…
مساك الله بالخير والنور والكرامه
صبحج الله بالخير والكرامه مبدعتنا سله
آنا كنت ولا أزال,بشكل عام,أقرأ الصفحه الأولى والأخيره والأخبار الإقتصاديه
وما أطوف الأخبار الأنتيكات الغريبه والمضحكه
وقت الأزمات الجايده جدا جدا أتابع على مضض وأنغث زياده
آنا عكسج إذا خذيت خبر من الناس أطلبه حاف بدون أي ملح أو بهار آنا أبهره بمخي وبمعرفتي
الله يصلح الحال
صراحه .. وبرا البوست اشوي .. مخك حسابي عدل .. شكلك شاطر بالحساب و الرياضيات 🙂
^^ ماشاء الله لا اله الا الله 🙂
و على المنطقه الحره .. اي و الله صارت اتضيق الخلق كل شي مصكر .. =\
بس اتصدق يستاهلون الخاص الي ياهم .. خل يتادبون و على قولتك الوزار طيبه و على نياتها ” ما اظن ” فـبالنهايه يساتهلون .. بس عاد خل يردون يبطلونهم =\
الخبر الشرباكه .. @@ والله من صجهم .. ما اقول الا مالت على الاثنين ” المحكمه ” و البنك المركزي ..
و على الجرايد انا ما اقرى الا اول و اخر صفحه ” الغلاف يعني ” لما ابوي يقضبها ويقراها و انا اكون قاعده جدامه .. شسوي اونس عمري بشي مو ونيس .. وعشان اشارك الوالد بسالفه او سالفتين =\
قواك الله 🙂
الله يقويج
الحساب أحبه وبسرعه أقلب الأرقام نسب وهالشغله وراثيه عندنا وأتمنى أعادي عيالي
الوزاره لا طيبه ولا على نياتها وهي جزء من المشكله
تخلي الناس تصرف فلوسها وتستثمر وتحط ديكورات وأثاث وتدفع كهربا وغيرها وبعدين تقول لهم مخالفين وينكم من أول
والخاص قلعته تدرون النشاط مو مسموح ليش تجازفون
ما أعلق على القضاء واللوم على المركزي ومحامينه
الله يخليلج الوالد ويكثر سوالفكم
منورتنا
welcome to kuwait
:)))
من زمان ولكم تو كويت
بس إن شالله ما نقول Goodbye
حياك أخوي منور مدونتنا
ما بغيت اقول طز..
اي قلتها شعقبه!!!
بس والله هالعالم تحفة..
تستأذن علشان تطبق القانون..
لا ويتعذرون اذا طبقوه لحد يزعل
تحححححفه..
قلتها بلسان القطاع الخاص
وصاجه تحفه الأوضاع