Statuses

منوعات قمميه

In أخلاقيات, عام on 07/01/2011 by t7l6m

قمة النشوه:واحد يتفلسف ويطيح بمصك يبكسه وإنت تّطمش
قمة الصبر:حمار ينظّر عليك وما تطقه بنعال على ويهه
قمة المعاناة:تسوي شي مايعجب عيالك علشان مصلحتهم
قمة طول البال:تروح ويا المدام السوق حق هدوم اليهال للعيد وما تتحلطم
قمة الطول:عملية السلام
قمة الضياع:ناس ماتفتهم تدير
قمة الملاقه:ربع يتهاوشون
قمة السخافه:أهل يتزاعلون
قمة الحكمه:ما تتعب نفسك بالدوام
قمة الإراده:إنك تسويها
قمة الشطاره:تاخذ مسؤولينك على قد عقلهم
قمة التسيب:طبيات وتأخيرات وغياب وإذا داومْت ماتشتغل
قمة الأنانيه:مسؤول يفكر بنفسه وماله شغل بموظفينه
قمة العداله:موظف يتيس طول السنه ويعطونه تقييم خايس ويقتنع
قمة السفاله:ريال يخلي زوجته تتسلف وياخذ الفلوس حقه
قمة التهور:إنشاء مفاعلات نوويه بالكويت
قمة التفاؤل:الإعتقاد بنجاح خصخصة الكويتيه
قمة الألم:عوار الضرس (ناس يقولون العين)
قمة الإسترخاء:سفره حق ديره مافيها سوق
قمة اللويه:سفره ويا العايله حق ديره كلها سوِقه وأماكن ترفيهيه
قمة الراحه :ماتسافر خير شر+أيام الدراسه
قمة الحيره:إذا بتشتري خام شتوي
قمة المستحيلات:ترضي كل الناس
قمة الخيسه:تنسى ربيان بدبة السياره يوم واحد بالصيف
قمة التسييس:الكويت.حتى السياسه سيسناها وزعّلنا سلوى
قمة الأدب:حمام بسطح برج خليفه(مؤقتا إلى حين إنشاء برج مدينة الحرير)

Advertisements

17 تعليق to “منوعات قمميه”

  1. قمة الحيره:إذا بتشتري خام شتوي

    لووووووووول 🙂

  2. احلا لون بالشتوي اللون الكحلي ما ادري ليش يمكن لاني احب هاللون 🙂

  3. تحلطم

    قمة الضياع :لما اتخرب مدونتك ولا اتعرف اضبطها مره ثانيه :/

    و طبعا سلوى لها وايد شغلات

    يعني مثلا قمة الصحة : لما الفساد يوصل الكويت و يصير ضاهرة صحيه مثل ماتشوفه سلوى

    • إذا إختربت المدونه أعتبرها قمة الصيعان والقهر
      أما سالفة الفاضله سلوى وقمة الصحه خليتيني أفكر جديا في بوست عنوانه قمم سلّاويه
      منورتنا يالجودي

  4. ههه قمم جميله 🙂 موكلها

    عاد انا كلا احسد الريايل و اقول حظهم ماعندهم لويه مثلنا بالهدوم طلع عندكم حيره في اختار لون الخام .. كسرتوا خاطري .. الله يكون بعونكم خو بروحكم مو متعودين ;qq

    قمه التحسر : لمن لابتوبك يكون فيه ثلاث كسور وشلوخ .. و السبب عيال اخوانك الي كل مره يطيحونه ويكسرون فيه شي و الابتوب ماصار له سنتين 😦

    و قواك الله 🙂

    • مساكين الرياييل يكسرون الخاطر بوايد أشياء ومالنا مقاقه على الإختيار
      يعني فعلا ينطبق علينا المثل:إذا تبي تحيره خيره
      وشالله حادج على قمة التحسر خليها قمة تحمل المسؤوليه وخلي إخوانج يشترون لج لاب توب يديد
      الله يقويج وحياج الله

  5. ايه و يالله ترى ولهنا على القطوه 🙂 و الازمه شبه عدت يعني نقول برجع لنا القطوه ؟

    • إن شالله عدت الأزمه ولا يعيد أمثالها
      وإن شالله القطوه راجعه قريبا جدا
      تابعونا

  6. انا بقولك شنو القمم اللي عجبتني..وتعليقي عليها

    قمة المعاناة:تسوي شي مايعجب عيالك علشان مصلحتهم
    انا مريت فيها وصرت الام الشريرة

    قمة الملاقه:ربع يتهاوشون
    قمة السخافه:أهل يتزاعلون
    تقريبا نفس الشي..واذا كان السبب تافه..ودك تبط روسهم

    قمة الإراده:إنك تسويها
    يارب ..ترزقني هالارادة.. واسويها..عرفتها؟؟

    قمة التسيب:طبيات وتأخيرات وغياب وإذا داومْت ماتشتغل
    واااايد عندنا منهم بالدوام

    قمة العداله:موظف يتيس طول السنه ويعطونه تقييم خايس ويقتنع
    هذة قمة الندرة و الخيال..مو العدالة..

    قمة السفاله:ريال يخلي زوجته تتسلف وياخذ الفلوس حقه
    صارت واعرف واااايد ..بس بصراحة من خبال المرة

    قمة الإسترخاء:سفره حق ديره مافيها سوق
    جربتها ..فعلا استرخاااء

    قمة المستحيلات:ترضي كل الناس
    اذا ارضيت ربك..بيرضون عنك كل الناس تقريبا..مجربتها ؛)

    قمة الخيسه:تنسى ربيان بدبة السياره يوم واحد بالصيف
    صاااااااااااارت فيني.. 😦

    قواك الله احب البوستات اللي من هالنوع

    • إذا صرتي الأم الشريره آنا أطلع أشرر أبو في العالم
      قمة الإراده عيزت أحاول بس الحمدلله دايما أفشل مع أن صديق عيز وهو يوصيني إقطع علاقتك العاطفيه بالدوام بس ما أعرف
      قمة الخيسه الحمدلله ماصارت فيني بس واحد من الربع قالي قصته يوم نسى دجاج بالدبه 3 أيام وتخيلت شلون خيسة الربيان
      حياج الله يالليوان
      وعلى فكره اليوم قريت بالقبس عن نادي الليوان التابع لجمعية المحامين زشفتيه؟

  7. ههههههههههههه

    والله خوش قمم:)

    الله يونسك بالعفو والعافيه

    امتناني

  8. توني قريت الجريدة…
    بس مادري شنو نشاطهم او توجهاتهم..

    بس جني برفع قضية اذا طلعوا منقيين الاسم عقبي!!!
    تهقى يطلع لي مبلغ يسوى والا لأ؟؟؟
    ياربي الواحد ما يعرف يحافظ على حقوقة الادبية بهالديرة
    ؛)

    صدقت نفسي وااايد هااااا

    🙂

    • الله يهديج بس ترفعين قضيه على جمعية المحامين جان إللي مايشتري يتطمش(بالمصري)
      وبدال التعويض يدفعونج أتعاب المحاماة
      شنقول حق الحراميه القانونيين
      بس شياب ليوانّا الونيس(إنتي)لي ليوانهم المليق

  9. “قمة الشطاره:تاخذ مسؤولينك على قد عقلهم”

    والله ماهي شطارة الا حاجة ولا عليك السلام

    • أفا ليش ماعلي السلام
      إدري تكملة الجمله
      بس صج مرات الواحد يقعد يشرح شي واضح حق مسؤول غبي ومايفتهم المسؤول
      أو العكس يطلب المسؤول شي غبي وتقعد تشرح له إنه مايصير هالشي وهم ماكو فايده
      الله لا يبلينا وياكم بمسؤول غبي
      حياج الله أسعدتنا زيارتكم
      بس شكله مسؤولكم معقدكم!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: