من أكره الأشياء بالناس ،بالنسبه لي،الكبر بغض النظر عن مصدره.
في ناس إتّكبّر بسبة فلوسها مثل قارون وأحفاده الحاليين.وناس بسبة فلوسها وجماعتها مثل إللي بسورة الكهف.
وفي ناس يحوشها الغرور بسبة العلم أو الوصل الرسمي بأن حامله يحمل درجة علميه معينه(شهادته) .
وفي ناس بسبب شكلها تتكبر يعني يغْترّ بجسمه أو تغتر بجمالها.
وناس إتّكبّر بحكم وظيفتها يعني من يصير وزير ولا عضو ولا مسؤول كبير تتضخم مؤخرته ويتضاعف حجم الأنا لديه مع إنه يمكن قبل لا يمسك المنصب كان يمسح إفرازاته الأنفيه بأكمام دشداشته .
وفي ناس متكبرين خلقه يعني تلقاه/ها جيكر ومنتف وماعنده شهاده أو منصب وهم متكبر وهذا يمكن تكون أسبابه جينيه أو مكتسبه، الله العالم، وموضوعنا ماله علاقه بكل أنواع التكبر المذكوره.
إللي يبط الجبد البني آدم إللي يتكبر بسبب جهة العمل،ولا أعمم في ذلك(مع إنه ودي).هناك بعض الموظفين من بعض الجهات إللي يتكبرون على الأخرين لسبب وحيد:
“آنا أشتغل بالمكان الفلاني”.
ولا يرتدع هؤلاء عن التكبر حتى لو كان غيره أكبر منه سنا وأكثر خبرة منه ,و/أو افضل منه في التحصيل العلمي (شهاده أو الجامعه إللي متخرج منها)
موظف الخارجيه يعتقد إنه يفهم أحسن من غيره ليش؟
لأنه دبلوماسي
بس يافلان إنت توّك طالع من البيضه,توّك ملحق دبلوماسي
عادي آنا أفهم من الناس كلها.آنا دبلوماسي.
الله يصلحك!
بعض موظفي هيئة الإستثمار أيضا من المغرورين وأهل البرستيج
نتصرف بملايين أكيد إحنا فاهمين وفلتات زمانّا
الله يهديكم
موظفين الماليه شايفين حالهم على بعض الوزارات,والأدهى والأمّر أن موظفين بعض إدارات وزارة الماليه شايفين حالهم على زملاءهم في الإدارات الأخرى,ليش ؟معاشهم أكثر.مع إنهم نفس الشغل وساعات العمل.
الله يرزقكم
بالمطار:
موظفين الكويتيه شايفين نفسهم على موظفين الطيران المدني,والطيران المدني على الجمارك,والجمارك على الجوازات.
اللهم لاشماته
موظفين البنوك شايفين حالهم على موظفين الحكومه,وموظفين البنك المركزي شايفين نفسهم على موظفين البنوك.
اللهم لا إعتراض
المشكله إللي عنده عقل من كل هالفئات المفروض يتواضع ويتعلم.
من منو يتعلم؟
موظفين شركات الإستثمار كانوا يعتبرون نفسهم ملوك الموظفين,رواتب عاليه,عمولات بالهبل,أسهم منحه على أفا من يشيل,مكافآت سنويه ,سفرات بسبب ومن غير سبب .وآخرتها طردوهم من مكاتبهم وقاموا مساكين يدورون أي وظيفه.
الله يسامحكم
الحكمه من الموضوع:إحترموا نفسكم ولا تكّبرون على الناس.الدنيا دوّاره والنعمه زوّاله.
T7l6m 
مساك الله بالخير،،،
تصدق اني ساعات اوصل لمرحلة كره المتكبر..وبغضة
ياربي الكبر لله وحده سبحانه..
اي آخرتك شنو ؟؟ قبر ..نسأل الله السلامه
والله ياتحلطم هذا على مستوى الوزارات..
تعال شوف على مستوى الحريم
وحدة تتكبر على رفيجاتها لانها تزوجت وهي صغيرة ..قبلهم
وحدة تتكبر على خواتها لان بنتها يابت نسبة وااايد عالية
وحدة تتكبر على حمولتها لأن بيت اهلها يديد وبيتهم قديم
اعرف وحدة تتغدا عند بيت حمولتها على الطاوله وكلهم ياكلون على القاع تقول مو حلو شكلنا ناكل على الارض انا ما تعودت في بيتنا ؟؟؟؟ هذي شتسوي فيها..
… والله ما اقول الا الحمد لله الذي عافانا
سامحني بس موضوعك وااايد اثار حفيظتي(حلوة هذي..)
🙂
سلامة حفيظتج
أدري مستويات التكبر لا نهائيه
بيتنا هني وبيتكم هناك ,سيارتي وسيارتك,آنا كول وإنت مو كوول,آنا خريج بره وإنت جامعة الكويت,إحنا مودرن وإنتو “سوفاج”ومن هالمقارنات التافهه
والله ياريت الواحد يشوف نفسه بالمنظره ويفكر بآخرته
كل واحد ذنبه على جنبه والدين نصيحه
والبوست من باب النصيحه من مدخل الإستخفاف بالمتكبرين
ويالله حسن الخاتمه
اوله نطفة مذرة واخره جيفة قذرة .. فما الغرور الا لذلة في نفسه
صح لسانك
أجزم أن المتكبر عنده نقص في مكان ما في شخصيته
أوافقك بكل كلمة قلتها،
شايفتها بعيني سالفة الدوامات وكلمن يتكبر على الي يعتقد انهم أقل منه،
مثل ماقلت شوف هذيل شصار فيهم
الحمدلله
الدنيا دوارة
وأعوذ بالله من الكبر
شتسوين فيهم مخهم صغير
صدقت
بس يا تحلطم هالناس ما يمشون عندي انا ، يعني ساعات اقعد مع خواتي ولا رفيجاتي ويقولون فلانة تشتغل بالمكان الفلاني وفلان يشتغل بالمكان الفلاني واشوفهم وايد يقدرونه ويحترمونه الحمدلله والشكر هالناس لمن تيي صوبي والله احسسهم ترا انتو ولا شي .. مو سالفة غيرة بس شنو هالانسان الي مكان عمله يرفعه ؟؟؟ يعني اشكرة اهو يدري لو ما يشتغل بهالمكان ما يسوى بيزة ولا احد يلقيه بال
ومايمشون عندي
اعوذ بالله من شرور انفسنا ومن سيئات اعمالنا
والكبر لله
ليش معصب؟
:p
اللهم آمين
ومن قالج إني معصب
قاعد أتطنز عليهم
عندنا وعندكم خير .. والمصيبه ماهي في الكبار بس
حتى بعض الاطفال يقول للطفل اللي معاه نفس اللي قلته فوق ..
الواحد لا يتفاخر بمنصبه وماله وووإلخ المفروض يتفاخر بدينه
والسلام عليكم
والله يابن الغامدي المفروض التواضع
والطفل يتعلم من الكبار
حياك الله ومنورنا
السلام عليكم
السبب في ذلك عزيزي تحلطم ان محد من هالمتكبرين يسوي شغله او يعرفه حتى ، لو ان يعرف شغله جان احترم شغل الاخرين.
اما عن اصحاب الشهادات فحدث و لا حرج دكتوراه من امريكا و ما يعرف انجليزي.
و اللي كلش عاد ما عنده/ها ، شيء فهولاء مساكين ندعو لهم ان الله يخفف عليهم.
بس اعتقد ان مالوت الطيران المدني يظنون انهم احسن من ( NASA)، صح ؟
مبجججر ربع الطيران المدني أحسن من ناسا مليون مره
خاصة العفش المتخلف
وماعندي أكثر من تأييد باقي الكلام وشفت بعيني نماذج تفشّل من حملة دكتوراه وأصحاب مناصب
احس انه هالناس فيهم نقص كبير و من داخلهم يشوفون نفسهم بصوره مو حلوه بس يقصون على نفسهم .. يكسرون خاطري اصلا
صج صفه منفره
تسلم ايدك 🙂
الله يسلمج
وانا مثل ماقلتي أشوفهم مساكين مع إنهم يبطون الجبد
حياج الله بوكيه ومنورتنا
إيه و الله الكبر لله
قال النبي صلى الله عليه وسلم: {لا يدخل الجنَّة من كان في قلبه مثقال ذرَّةٍ من كِبْر، الكِبْر بطَر الحق وغمط الناس}(صحيح مسلم)
بس ترى موظفين الكويتية حبوبين ليش انا ما اشوف فيهم كبر ؟!!!
الأمور نسبيه
مايتكبرون إلا على الطيران المدني
وبعدين بيني وبينج أطفر أخوي وربع الدوانيه
اهيا دائره .. كل وااحد وفوقه وااحد
الحمد الله و الشكر و ربي لا تبلينا
و ان كنا متكبرين ياربي فسامحنا واهدينا
و لا تجعل في قلوبنا ذره كبر
قواك الله 🙂
اللهم آمين
وسامحنا يارب وإصلحنا
الله يبعد عنا الكبر ويبعد عن ” قطاعنا” المتكبرين 🙂
الله يقطع المتكبرين