الكلام وصف للمشاعر وسرد للأحداث.الكلام أفكار وخطط،طموحات وأمنيات.الكلام حكم وعبر، شعر ونثر، مقال وبوست.ومنذ القدم الكلمة سلاح بيد من يمتلك ناصيتها ومن روضها لخدمته.وأصبح الكلام سلعة تباع بالسطر أو بالصفحة ومرات بالكيلو.
صج نسيت أقولكم الكلام نستخدمه لوصف الأشياء،وهذا موضوعي.
شنو تقولون لوصف عطر: خنين، ريحته حلوه، منعش، أخاذ ، يهبل، يدوّخ، شحلاته.
صراحه هذا حدي بالكلمات إللي طلعت معاي وممكن الرجل أو المرأة يقولونها عن العطر.
لكن لما قريت ،وأنا حدي فاضي، مجلة الصوغه مالت الكويتيه تفاجأت وضحكت على وصف العطور وباقي البضايع اللي يروجونها بالطياره.وهذا إستعراض سريع:
– العطور النسائية:
*تخالينه ترنيمة أناقة رومانسية وأنشودة إحساس ساحرة.(تخيلي نفنوف يطق موسيقى)
*يمنح شعور بالسعادة…..لأحاسيس صادقة من القلب.(عطوج مليون وودج تجسمين نصه على الفقاره)
*مشاعر قوية تستحوذ على النفس وتتملكها.(صار حادث جدامك وشفت الناس تموت جدام عينك)
*أعجوبة تحول اللجظات الحالمة إلى حقائق ملموسة.(مصباح علاء الدين)
*عطر للأنثى بدفء وحرارة الرجل(للمرأة المهاوشجيه)
*عطر يجسد قمة الأحاسيس المرهفة والمشاعر العميقة(للإستخدام عند الرغبة بالبكاء وكسر خاطر الزوج)
*عنوان الرقي والأناقة البوهيميه.عنوان للرفاهية المطلقة.(أي شارع)
*عطر أنثوي ضاحك رقيق بقلب مخملي حساس مضيء.(الجمبزه شلون صايره؟على فكره لا ينصح بإستخدامه في العزاء لكي لا يتحول إلى party)
الحين ,وبعد عينة من العطور النسائية ,خل نشوف شلون يقصّون علينا إحنا يالرياييل:
*عطر الرجل الذي يختال بمظهره ويزهو برجولته.(على هالمواصفات المفروض الحكومه توزعه مع التموين-تنطبق المواصفات على 90%من رواد المولات)
*يلهب المشاعر(تنور مو كلونيا)
*حاد النظر والطباع وحضوره ملفت مؤثر(ماتحتاج تطلع إذا إستعملته,أقعد سولف وياه)
*تمنح الرجل حضورا ملفتا وتواجدا إستثنائيا(يعني تحط الريحه وتداوم ربع ساعه ,كفايه)
*منعش يفيض حيوية وينبض نشاطا(يبقبق بالغرشه)
*عطر الرجل الأنيق لإطلالة مؤثرة وحضور ملفت يسدل الستار على كل من يحيط به.
(يقولك النواب والوزراء راح يستعملونه بجلسة التصويت وبنشوف منو إللي ستارته تغطي على الثاني)
*عطر البطولة ,الرجولة بلا منازع(مخصص للمصارعين والملاكمين وألعاب القوة)
*رجل ديور دائما في المقدمة ومن خلفه الجميع(ينصح به للطلبه إللي يبون يطلعون الأوائل على الصف)
*يتألق ترفا وإحساسا لا يمكنك الإستغناء عنه.(هذا إدمان ,يقولك إذا ما إستعملته يوم تقعد إتّحكك)
*يمنح الرجل نسمات عليلة ثلجية منعشة (إشتره إحتياط إذا طفت الكهربا)
*للرجل المتأهب دوما للمغامرات والتصدي للتحديات بقلب جسور(ياويل القوات الخاصه إذا طاحوا عليه الناس)
*عطر يتحدى الثوابت ويخالف التقاليد(مخصص لإستعمال رجال الأعلام)
واضح من النماذج السابقة أنك تستطيع تحوير الكلام وإستغلاله بما يخدم أهدافك.
الله يعينا على الأعلام المخرب(طلع عيب تقول الإعلام الفاسد)
T7l6m 
ماخلوا شي هالإعلانات
ضحكتني يبقبق بالغرشة
بالفعل الكلام يمكن يستغل بالطريقة الي يبيها المتكلم
والكلام سلاح فتاك مانتصور شلون قوة مفعوله
وقالوها جرح السِنان ولا جرح اللسان
والكلمة الي تطلع ما ترد
وكل عام وانتوا بخير
مافي شك الشخص يقدر يحور الكلام على مشتهاه ويستخدمه بالطريقه إللي تناسبه وتخدمه
وإن شالله عام الجميع خير وسعاده
شكرن تحلطم 🙂
عفون
وكلو عامن وأنتي بخيرين
قبل أي في القرن العشرين،على الMBC أذكر وصف واحد لعطور المرأة، دائمًا الدعايات تنتهي به:
“عطر المرأة الجديد….من محمود سعيد”*
* شركةعطورات
مشكور يا”متحلطم” بجسارة، وكل عام وأنت بخير.
حياك الله أخوي غانم
وربي يجعل أيامك وسنينك كلها سعادة وسرور
لالالا
بلييييز لا مو من صجك؟؟؟؟
وااااي ما دري اعلق على شنو والا شنو
بصراحة كل مره اقرا الاعلانات ما انتبة لها
الحين اول ما اركب الطيارة بدور هالمجلة وبقعد اضحك ضحك السنة بساعة
الله يفرح قلبك دووووووم
والله ضحكت وكنت مالي خلق افج برطم عن برطم
تعليقاتك بتصير حديث السنة القادمة بالدوام..عادي ؟؟
🙂
والله مايبت إلا التعليقات والا الباجي كلامهم،طبعا فيه إضافات ماتستحق الكتابه مثل
بزهرة الباتشولا وزهور الربيعأو بلمسة من التوابل المنعشه ولا برحيق الحمضيات
والمجله مايبيلها دواره تلقينها جدامج ،يبون يبيعون
ونعيد ونقول البلوج بكبره حلالج يالليون
Hey my friend,
I just want to say its time to move on into something will really make a difference. I know what u r capable of writing amazing things, things that will make a change, in terms of life and u know it.
ُThink beyond and I know you can, t7l6m is a great start to find your self within. It is a matter of time my friend. I truly believe in the path ur taking and let me say its the right one. Dont waste your time blabing about the non sense around. There are much more beautiful things to grasp in life my friend. you got what you wanted….and its about time 🙂
Wishing u all the best my friend & a very happy new year.
Peace & Love
Your comment i see as a complement
U don’t know how much i learn with every post and how much i improve my writing with each comment
Right now i have a story in progress and another one in the pipeline
U know i hate writing about the nonsense around us but i have to share my feelings with others .at least i have to though it out of my chest
Very soon in shalla i will write what’s in ur mind,and mine
Wish u a year full of peace ,joy,happiness,love,and fulfilment.
Happy new year Sandarari
كاااااااااااااااااااااااااااااااااااك
والله قعدت اضحك على الكلام وعليك انت يالفاضي قاع تقرا مجلة نسائية ماحب اقرا مجلات عطني مجلات كركتير يهال جذي حلو … هذا اولا
وثانيا جذبتني هالجملة ..عطر للأنثى بدفء وحرارة الرجل(للمرأة المهاوشجيه)
وين هالعطر ؟؟؟ تكفة بشتريه لوووووول باخذ منه غرشتييين لان بيخلص بسرعة كاااك
هذي مو مجله نسائيه
الصوغه هي مجلة مبيعات الكويتيه وفيها عطورات نسائية ورجاليه وساعات وشوية أجهزه
وبعدين شلون تصدقين وصف العطر والموضوع يتكلم عن كذب الإعلانات وكيف يحورون الكلام
ما شاء الله عليك تبارك الرحمن اشلون لاحظتها ولا مره انتبهت للحجي
كله استعين فيها لما انسى أحد في الصوغة تكون عطوراتها هي البديل
بس الحين بقراها و بتصيد كل تعليق جديد فيها تدري و بشوف إلي بخطوط الطيران الثانيه
تحلطم بأول يوم من السنه عطر بدعة فيه إلا سؤال العطر الرجالي إلي الواحد ما يحتاج يداوم وياه إلا ربع ساعه ما ينفع للحريم ؟؟!! يا أخي أعتازه لوووول
كل عام وأنت بخير 🙂
و الأهل بخير
عادي يصير بس طلعوا لي هالعطر :@
من صجك يعني ابيه ؟
والله يبط راسي انا مهاوشجية مع الناس بس عنده انا كتكوت لطيف وطيب القلب ورقيق لوووول
صباحك blackberry & vanilla musk
fresh, sweet and modern
ترى هذي دعاية كلونيا اسمها Trish McEvoy
🙂
امس قاعدة اقرى المكتوب عليها واليوم كملتها ببوست مجلة الصوغة
بوست ممتع جدا بس ما وفيته حقه واختصرته, الظاهر وصلت طيارتكم قبل لا تكمل باقي صفحات المجلة… انا اقرى القلبتين… ابلش بالعربي وبعدين الانجليزي
🙂
وفعلا الكلونيا ممكن تعدل المزاج وممكن تعكره
كل عام وتحلطم والأهل بخير وصحة وسلامة
وإنتي والأهل بخير وسعاده
صح كلامج البوست مختصر بس ماتلحقين عليهم كلونياتهم شكثرها
وخفت أكثر تمصخ السالفه
منورتنا يا جندل
المرة الياية بيوزعون اعلانات حسب المناطق
مثال عطور الرميثية : زخة واحدة وتشعر انك في كباب الحجة !
الصباحية / الرجال : الراحة المعاريس الاولى .. رائحو عجلات الزد المحترقة !
والله يزيد الحجي
ودّك عاد
ويسوونها على حسب الدول
-تشعرك بطعم الكباب الحلبي
-الرائحة الأصيله للكنافة البيروتيه
-كأنك ترتدي قفطانا مغربيا
-لذة الفول والطعميه بدون إفرازات هوائيه
منورنا يابن محمدي
هههههههههههههههههههههههههههههههههههه
غشيت من الضحك
ماشالله تبارك الرحمن ربي يحفظك ويحميك
دمك خفيف…وطينتك خفيفه ربي يبارك
والله انا دايما اقراها واتوهق خصوصا لما بشتري عطر رجالي..
لأني مو مطلعه على العطورات وروايحهم
فماعندي فكره ولازم اشتري اكون متوهقة بالصوغه
وعلى قولتك …
تعال اخذ…يعني عطر مخلوط برائحة الرجولة والسنديان!
هالعطر انا شترجمه؟؟؟ شريحته بالله عليك
🙂
وكذا مره اتوهق ادور احسن وصف ويطلع العطر بعيد عنك فليت
ههههه
والله ونستني على هالبوست الخفيف الله يونسك بالعفو والعافيه
كل عام وانت وعائلتك الكريمة بالف خير وصحة
وعساها سنة يديده بقراطيسها وروايحها المنمقة الجميله…سنة خير ومحبه عالجميع
على الهامش:
وخر الله يعافيك مجلة الصوغه عن مجلس الأمه..لايتأثرون فيه ونروح وطي:)
مشكوره سلتنا على الإطراء والكلام إللي يتفخنا
ومثل ماقلتي ماتقبضين شي من كل صيحتهم ماتشوفيني ترجمت كلامهم
والمجله المفروض ممنوعه على المجلس والحكومه
كل عام وسلتنا وأهلها وكل من يعز عليها بخير وسعادة وهناء